葵芳寵物公園 | 相信每逢假日主人都會帶住佢哋心愛嘅毛孩出街～而葵芳新都會廣場全新嘅「Pet Park」就啱晒大家，等大家食完飯之後就可以帶埋毛孩到佔地1,800平方呎嘅寵物公園玩！即刻睇睇有咩咁特別！
圖片來源：官方圖片 | 撰文：Hedy
帶毛孩出街除咗要方便泊車之外，就連環境都好緊要，而葵芳新都會廣場全新嘅「Pet Park」就可以滿足晒所有人嘅願望。大家除咗可以喺度享受美食同購物之外，仲可以帶埋毛孩一齊嚟放電。荃葵青區終於有商場常設寵物公園啦！
葵芳寵物公園 | 葵芳新都會廣場「Pet Park」
「Pet Park」以Pets Glamping為設計概念，全場鋪滿綠油油嘅人造草皮，模擬大自然柔軟嘅土地，毛孩喺上面來回奔跑都超舒服，同時又保護寵物嘅足部。而公園內除咗用天然原木色調嚟打造遊樂設施之外，仲運用咗多巴胺糖果色系嚟創造熱情活潑，令人望到都覺得開心！寵物公園共設有3大區域包括「打卡區」、「歷奇區」以及「休憩區」，合共有6大歷奇玩樂點畀寵物盡情放電！
葵芳寵物公園 | 6大歷奇玩樂
當中「打卡區」入面就有成3米高巨型毛孩打卡裝置畀大家打卡，仲有12米長霓虹森林搖椅打卡牆，等各位主人都可以紀錄低毛孩嘅成長點滴同玩樂時刻！而去到「歷奇區」就有跑・獨木橋隧道以及跳・跳台跑道，等毛孩可以上上落落同鑽出鑽入放電，同時訓練埋平衡力！玩到攰嘅時候就可以到「休憩區」齊齊休息，毛孩隨時都可以喺Glamping 帳篷同遮蔭長椅叉電，而主人都可以喺隔離幫佢哋打卡影靚相，感覺就好似去咗Glamping一樣～
葵芳寵物公園 | 《寵愛夏日 Bubble Paw-ty》
為咗慶祝「Pet Park」開幕，新都會廣場由即日起到9月22日喺商場L4平台打造5大期間限定毛孩放電區。當中包括Feed Me餅、Doggy搖搖椅、萌寵笑臉自畫板、萌寵階梯以及巨型泡泡槍等。只要每逢週末巨型泡泡槍就會無限量噴出寵物專用無害泡泡，喺呢個時候幫毛孩影相就相當夢幻～同場亦有「與寵同樂」市集，咁大家就可以一次過買走寵物零食以及護理產品等！當中仲有唔少自家設計嘅精品，幫毛孩扮靚就最啱！The Point會員由即日起憑即日電子消費滿HK$300或以2,000積分即可換領一節「泡泡狂歡派對」，由專業攝影師幫你同寵物贏泡泡照，留底最可愛嘅時刻！
【INFO】 新都會廣場「Pet Park」常設寵物公園 時間：10:00至22:00 地點：新都會廣場 L5 平台 費用：免費 《寵愛夏日 Bubble Paw-ty》期間限定毛孩放電區 日期：即日起至9月22日 時間：10:00至22:00 地點：新都會廣場 L3-L4 露天廣場 費用：免費 「泡泡狂歡派對」活動 日期：2024年8月24、25、31日及9月1日 時間：15:00至17:00（每節15分鐘） 地點：新都會廣場 L4 露天廣場 參加方法：The Point會員由即日起憑即日電子消費滿HK$300或以2,000積分即可換領一節（每節名額10組包括主人及毛孩）
延伸閱讀：【全港10大室內外放狗好去處、集結室內外地點人寵放電必去！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
