放狗好去處 | 放假想帶狗狗一齊出去散步？全港又有邊啲地方方便得嚟可以放狗？即刻睇睇小編為大家推薦10大放狗好去處，除咗放狗之餘都相當適合帶埋小朋友一齊放電，計劃一個開心嘅親子遊！
圖片來源：官方圖片、Instagram@abby.corgi.hk、mungchu__pom_borbee、poodlebunbun、raina__nanaaaa、yuenyuen.is.a.dog、marella.bordercollies、babyhazelnut.diary、misu_pom、loklokchung、Facebook@West Kowloon Cultural District 西九文化區、The Mills 南豐紗廠 | 撰文：Hedy
放狗好去處1. 將軍澳海濱南橋
連接日出康城同將軍澳長廊嘅海濱南橋最近正式開通，橋拱及橋身均均以波浪為設計主題。南橋更面向巴倫海峽，可以遠眺大橋景觀，喺日落時分帶住寵物散步甚或親子遊都相當適合。當中更設有觀景台，畀大家欣賞將軍澳灣以及東邊水道嘅美景。想近距離同大橋打卡，大家都可以帶愛寵乘坐最新往來將軍澳南銅西灣河嘅新航線，同寵物出遊相當方便。
【INFO】
《將軍澳海濱南橋》
地址：將軍澳東邊水道兩岸
放狗好去處2. 茶果嶺海濱公園
茶果嶺海濱公園佔地約1.8公頃，除咗有超過60組遊樂設施，更設有涼亭、園景區、草坪同健體設施。同時海濱空間亦都係寵物共享公園，大家都可以攜帶寵物入內。有小朋友嘅家庭更可以一次過幫小朋友同狗狗放電，面對海景打鞦韆，仲有相當吸引嘅8米高滑梯，相信一定可以令小朋友同狗狗玩得開心！
【INFO】
《茶果嶺海濱公園》
地址：茶果嶺偉樂街西北面
放狗好去處3. 西九龍文化區
西九龍文化區可以一次過令狗狗享受大草地以及海景，無拘無束咁奔跑，盡情放電！一家大細帶埋寵物嚟野餐都相當適合，享受一個休閒嘅下午。節日嘅時候附近更會有唔同嘅裝飾，幫寵物打卡一流！
【INFO】
《西九龍文化區》
地址：九龍西九文化區
放狗好去處4. 南豐紗廠
位於荃灣嘅南豐紗廠係寵物友善商場，由於係室內商場，咁就唔怕天氣嘅影響，隨時都可以去帶寵物行下，見見朋友。商場入面更有餐廳設寵物餐，相當貼心！就連寵物嘅零食以及日常用品都可以喺度買齊。假日嘅時候更會舉辦市集，氣氛相當熱鬧。
【INFO】
《南豐紗廠》
地址：荃灣白田壩街45號
放狗好去處5. 屯門浩和街
有港版邁阿密之稱嘅屯門浩和街，有大片嘅草地以及長堤壩，沿途更有一棵棵棕櫚樹，相當適合放狗之餘又可以欣賞眼前迷人嘅景色，令你放鬆心情。天氣好嘅時候，更可以睇到藍天白雲，仲有機會見到飛機，超寫意！不過由於地方較唔方便，比較適合自駕嘅朋友。
【INFO】
《屯門浩和街》
地址：新界屯門浩和街
放狗好去處6. 東岸公園
位於炮台山嘅東岸公園佔地10萬呎，除咗有巨型維港字型藝術燈光裝置打卡，公園嘅主題區更係24小時開放嘅寵物友善地帶，咩時候都適合帶寵物過嚟散步！長100米嘅防波堤，更可以令大家360度飽覽維港景色，帶住寵物跑都冇問題！
【INFO】
《東岸公園》
地址：炮台山屈臣道以西
放狗好去處7. 彭福公園
彭福公園嘅大型草地絕對係狗狗們超中意嘅地方，除咗可以見到好多朋友之外，更可以盡情放電！不過大家要記得，彭福公園只會喺非賽馬日對外開放，去之前要留意清楚！
【INFO】
《彭福公園》
地址：新界沙田沙田馬場
放狗好去處8. 將軍澳環保大道寵物公園
將軍澳環保大道寵物公園佔地4,000平方米，設有五大草地區域，當中仲有分為大寵物園區以及細寵物園區。公園更設有完善嘅寵物設施，包括狗廁所及狗糞收集箱等。帶寵物散步完之後更有寵物沖洗間，有齊花灑同淋浴間，超方便。不過公園嘅位置較為偏僻，對於自駕人士相對會較方便。
【INFO】 《將軍澳環保大道寵物公園》 地址：將軍澳環保大道
放狗好去處9. 粉嶺高爾夫球場
佔地約32公頃嘅粉嶺高爾夫球場，喺冇比賽嘅時候，會開放用作寵物公園，由朝早9點開放到夜晚6點。場地更設有步行徑，開放時間由早上9時至夜晚9點，超大嘅草地可以畀寵物盡情奔跑！
【INFO】
粉嶺高爾夫球場
地址：香港新界上水粉錦公路地段1號
放狗好去處10. 蝴蝶谷道寵物公園
蝴蝶谷道寵物公園最適合訓練狗狗，當中設有多種寵物戶外設施，例如係模擬排水管道以及跳躍圈環等等。寵物公園更係位於天橋底下，所以無論咩天氣都可以帶狗狗去玩，而且附近更設有咪錶位及停車場，自駕都相當方便！
【INFO】
《蝴蝶谷道寵物公園》
地址： 深水埗蝴蝶谷道2號
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
