上次就同大家介紹咗幾間中價預算嘅新式酒店，但如果想住得再豪華啲又大啲，有冇咩好推薦吖？想另一半過一個難忘嘅週年紀念日或者生日，不如就從呢幾間酒店入手啦！由其係呢排咁多5星酒店做緊Staycation Package，多Budget嘅你又點可以唔Book返晚玩吓呢？想知邊間多好評就記得碌落去睇內文喇！
圖片來源：酒店官網、Klook｜撰文：Debbie
香港豪華Staycation之選（1）：The Ritz-Carlton Hotel
相信大家對Ritz-Carlton都唔會太陌生，2011年開業嘅麗思卡爾頓酒店係香港最高嘅五星酒店，由102樓至118樓都屬於酒店範圍。酒店房型由540呎起，佢亦都擁有全港最大宴會廳之一，所以好多人都喺度設宴亦係求婚聖地添！
第118層為健身中心及全球最高嘅游泳池，可以坐擁百萬美景嘅風景之下打卡游水都咪話唔爽！
Ritz-Carlton嘅特色除咗夠高之外當然就係佢嘅打卡洗手間啦！中間一個正方形大浴缸，望出去就係絕美維港海景，試問你喺呢間房同女仔求婚，仲有邊個唔應承呀～不過有咁超水準嘅房就有一定嘅付出，一晚大約$6-8000就有交易啦！
《The Ritz-Carlton Hotel》
地址：柯士甸道西1號環球貿易廣場
房間價錢：大約$3400至$18000
推薦指數：★★★★ （5星為最高）
香港豪華Staycation之選（2）：Rosewood 瑰麗酒店
2019年先開幕嘅Rosewood一向都係港女嘅頭號NumberOne酒店，同Ritz-Carlton一樣，都係商廈嘅頂層作酒店用途，不過就冇咁高，界乎24至40樓共17層。房型方面有多達16種選擇，最細都有570呎，差唔多係一個屋企咁大。
其中最出名嘅一定係IG打卡位-雲石浴室！係女仔都會爭相喺廁所留下倩影，確保夠靚相出POST先肯走㗎！
Rosewood有無邊際室外游泳池對望住維多利亞港，真係望到都想跳落水呀。
最誇張嘅係原來Rosewood係有海港別墅套房，佔地12,000呎坐落57樓全層仲有兩個户外私人游泳池。除咗有私人電梯直達玄關之外仲有五間獨立臥室同私人健身室，不過想住就要7位數一晚，小編自問就冇咁嘅能力喇但普通房都仲可以Affort到嘅～
《Rosewood Hong Kong》
地址：香港九龍尖沙咀梳士巴利道 18 號 Victoria Dockside
房間價錢：大約$3600至$35000
推薦指數：★★★ （5星為最高）
香港豪華Staycation之選（3）：The Upper House 奕居
之後就要講吓喺Staycation關注組風評最好，連Bob叔都話正嘅奕居喇。我發現頭三間酒店都係佔據大廈頂層作賣點，唔同呢個就係成功嘅關鍵？講返正經先，2009年開業嘅奕居位置同JW萬豪酒店一樣，不過奕居就喺38至49樓一共有十層，係明乎其實嘅「Upper House」。
私隱度高嘅奕居係連入口都低調過人，Check-In會喺房間辦理並會有專人為你服務帶你上房，服務水平好高！房型方面有分五款，最入門版會係Studio70不過已經比好多人屋企同其他酒店大，足足有730呎，係全港最大面積嘅酒店房！而且無論係入住邊個房型，都有靚靚浴室畀女士們爭相打卡。無論房型係望海定係望住城景都別有一番風味～
房同員工都OK，咁餐廳又得唔得呢？2021年重新裝修兼開業嘅Salisterra，係酒店嘅唯一餐廳。基本上酒店早餐同下午茶都會係呢個絕美環境度開餐！餐廳以地中海為主題，用上大地色系營造舒適感，Tea Set價錢亦都唔算天價，$530兩人就可以有靚景加美食，非常划算！小編決定咗生日要去住呀！
《The Upper House 奕居》
地址：金鐘金鐘道88號
房間價錢：大約$3600至$8000
推薦指數：★★★★ ★（5星為最高）
香港豪華Staycation之選（4）：Mandarin Oriental, Hong Kong香港文華東方酒店
另一間小編想試住嘅地方就係香港傳統嘅五星酒店文華喇。擁有長遠歷史嘅文華東方酒店係1963年開業並且全面裝修後於2006年重開。目前嘅文華東方酒店依然係全亞洲其中一間最佳酒店，而且咁多年都Keep到水準！
文華東方酒其中有個特色，就係皇后像廣場景觀客房，住過嘅人都話呢個咁特別嘅景色真係只應文華有㗎！
打卡浴室位亦係小編覺得見過咁多間酒店以嚟最靚最有特色的，大浴缸大空間靚景，望住呢個畫面都想即刻住吖！
文華東方酒店其下仲有八間餐廳，每間嘅裝潢至風格都彷如置身於唔同空間同領域，有機會就算唔入住酒店都要去食呢度嘅餐廳，肯定有另一番體會。
酒店餅房亦都相當出色，不能夠不食嘅就係文華出品嘅英式鬆餅同招牌Cheesecake。
《香港文華東方酒店 Mandarin Oriental 》
地址：中環干諾道中5號
房間價錢：大約$2255至$17000
推薦指數：★★★★ ★（5星為最高）
香港豪華Staycation之選（5）：St.Regis 瑞吉酒店
St.Regis瑞吉酒店算係小編介紹嘅六間酒店入面新進駐嘅酒店，2019年開業嘅St.Regis屬於萬豪集團旗下Catagory8高端奢華酒店，仲一度登上各大旅遊平台香港酒店排名第一位，大有來頭。
講到St.Regis有啲乜嘢特別就係佢哋首創嘅管家服務，無論小事至沖茶或預訂的士、執行李等，只要一個Whatspp，幾分鐘之後管家就會幫你搞掂㗎啦。
瑞吉酒店樓高27層，一層只有八間酒店房，最入門房亦400呎起跳。一層只有八個單位亦畀人感覺私密度十足！呢種既安靜又唔擠擁嘅環境好有遠離煩囂嘅舒適感呀～
同樣地，St.Regis嘅浴係大不過同其他比感覺上平實啲亦自在啲，當中最為吸引小編嘅係巨型浴缸，鴛鴦戲水冇問題連洗面盤都有兩個，仲有隔板畀人客人放上電話紅酒等，認真寫意～
《香港瑞吉酒店 St. Regis Hong Kong 》
地址：灣仔港灣徑1號
房間價錢：大約$3000至$10000
推薦指數：★★★★★（5星為最高）
香港豪華Staycation之選（6）：The Murray 美利酒店
最後一間亦都係人氣爆登，最近瘋狂出現超抵Staycation Package嘅Murray美利酒店喇！2018年完成活化嘅美利大廈搖身一變就成為咗五星級酒店 The Murray，以象牙白、大理石為主調嘅酒店外觀都吸引咗唔少訪客過嚟打卡Po相，呢間酒店亦係六間入面唯一Pet-Friendly嘅大型酒店添！
The Murray嘅住宿套票相當吸引，有時會有一泊三食連泊車都包埋，最近就係房價包餐飲消費額嘅優惠，叫人點樣唔心動呢～
留意返，如果想間房可以有打卡浴室記得要預訂Grand Room以上嘅房型先有㗎，雲石設計夜係美利浴室嘅Signature～
天台餐廳同酒吧Popinjays會供應自助早午餐、下午茶同晚餐等佳餚，係迷人嘅景色下享受美食真係好正，不如記住預早Book定靚位吖！
《香港美利酒店 The Murray 》
地址：中環紅棉路22號
房間價錢：大約$3000至$6000
推薦指數：★★★★★（5星為最高）
相關文章：【2022 情人節STAYCATION】嚴選5間香港新派酒店！唔洗過千蚊/打卡ABLE/平玩介紹
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
