澳門美食2024 | 好多人都會選擇趁短假期過海去澳門嚟個小旅行，講起澳門就一定會諗起五花八門嘅美食。今次小編為大家推薦澳門7大平價美食小店，性價比高之餘，又可以留返個肚試多幾款美食，即睇以下介紹啦！
圖片來源：Openrice @hoikiwong522、Facebook @澳門大利來記咖啡室、Openrice @Big_Smile_、Facebook @澳門世記咖啡外賣店、Openrice @lst.aa、Openrice @Lolinglingg、Openrice @Kabii、Openrice @dinewithyy、Openrice @Derekbigjj | 撰文：Icy
澳門美食2024推薦 | 1. 瑪嘉烈蛋撻店
去澳門當然要食葡撻啦！位於新葡京飯店附近嘅瑪嘉烈蛋撻店，主打新鮮出爐焦糖葡撻，只售澳門幣$11，所以經常都吸引大量人大排長龍。蛋撻表面呈亮澤金黃色，酥皮香脆可口，而蛋漿非常嫩滑，散發陣陣蛋香。
【INFO】 瑪嘉烈蛋撻店 地址：新馬路馬統領街金利來大廈17B地舖 營業時間：星期一至五 08:30-16:30 / 星期六日 10:00-18:00（星期三休息）
澳門美食2024推薦 | 2. 大利來記
大利來記開業30多年，以招牌豬扒包最為出名。炭燒豬扒包售價為澳門幣$40，豬仔包搽上牛油烘烤，口感香脆。豬仔包中間夾住大大塊炭爐厚切豬扒，咬落juicy啖啖肉，而且肉質充滿油香～
【INFO】 大利來記 地址：氹仔舊城區告利雅施利華街35號地舖 營業時間：星期一至日 08:00-18:00
澳門美食2024推薦 | 3. 世記咖啡
於1965年開業嘅世記咖啡係澳門老字號早餐店，多年來一直受到街坊捧場。特別推介店內招牌炭燒瓦煲咖啡，售價為澳門幣$25，以瓦煲新鮮製作，口感香醇細滑，並且散發出陣陣焦香。
【INFO】 世記咖啡 地址：澳門氹仔舊城區消防局前地1號舖 營業時間：星期一至日 11:00-19:00
澳門美食2024推薦 | 4. 澤賢記
澤賢記嘅人氣雞蛋仔十分馳名，有多款特別口味，例如黃金鹹蛋黃、靜岡抹茶手工麻薯、香甜紫薯等等，當中最受歡迎就係招牌葡撻味，售價為澳門幣$38，聽聞高峰時需要排隊等2小時先食到！雞蛋仔即叫即做，新鮮出爐熱辣辣，裏面包住一粒粒葡撻蛋粒，食落外脆內軟，而且唔會太甜～
【INFO】 澤賢記 地址：路氹城蓮花海濱大馬路澳門百老匯美食大街地舖 營業時間：星期一至日 16:00-23:00
澳門美食2024推薦 | 5. 洪馨椰子
洪馨椰子店主要做批發生意，但老闆嘅手造鮮椰子雪糕，每日都吸引大量遊客慕名而來。椰子雪糕售價為澳門幣$25，採用馬來西亞進口嘅椰子製作，口感比較似雪葩，入口冰凍，夏天食特別消暑！純椰子汁味道清新，無添加糖份，所以可以食到天然椰子嘅原汁原味，唔會過份甜膩。
【INFO】 洪馨椰子 地址：新馬路果欄街14號地下 營業時間：星期一至日 09:00-13:00 / 14:30-19:00
澳門美食2024推薦 | 6. 倫記軟滑腸粉
倫記軟滑腸粉主打即叫即製滑腸粉，雖然店面睇落只係一間平凡小店，但手工製腸粉好受街坊歡迎。大家點餐後可親眼目睹布拉腸粉嘅製作過程，招牌蔥花蛋腸粉售價為澳門幣$33，質感滑溜，咬落軟糯，可以自己另外加混醬，令腸粉更加惹味。由於米漿調較得好，所以唔會有糊口嘅感覺，值得一試～
【INFO】 倫記軟滑腸粉 地址：沙梨頭沙欄仔街26號泉彩樓地下B號舖 營業時間：星期一至日 07:00-01:00（星期三休息）
澳門美食2024推薦 | 7. 馬慶康南天咖啡室
講起地道冰室，香港有澳牛，而澳門就有馬慶康南天咖啡室。呢間老字號咖啡室係澳門人心目中嘅必食飯堂之一，除咗各款份量十足嘅飯餐之外，特別推介阿華田脆脆西多士，售價為澳門幣$36，面頭淋滿阿華田脆脆同煉奶，再放上半融化嘅牛油，賣相十分邪惡。金黃西多士外脆內軟，切開裏面仲有流心芝士～
【INFO】 馬慶康南天咖啡室 地址：新橋（三盞燈/白鴿巢）俾利喇街65號A 營業時間：星期一至日 07:30-18:30
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
