大圍餐廳推介｜大圍向來都係出晒名多平靚正嘅食店，由街邊小食到高級料理都應有盡有，絕對係搵食天堂！無論你係想同朋友聚餐、情侶拍拖定係一家大細食飯，呢度都有適合嘅選擇。今次小編精選咗12間大圍必試餐廳，例如以熟成牛油咖喱打響名堂嘅Curry Boy、米芝蓮必比登推介嘅好湯好麵同大圍小館。呢12間大圍餐廳各有特色，下次約朋友食飯不如考慮嚟大圍探索美食啦！
圖片來源：Openrice@食好西理想與現實、@racheltungtung0409、@kwonglaihk、@or#tm66564178、@miayw_foodie、Facebook@大圍小館 | 撰文：Ginger
大圍餐廳｜1. Curry Boy
講到大圍，一定要提Curry Boy！呢間小店以熟成牛油咖喱打響名堂，咖喱汁經過12小時的熟成，味道濃郁且層次豐富。佢哋嘅招牌黑啤牛肋肉配咖喱飯，牛肉燉到軟腍腍，配埋香濃嘅咖喱汁，真係一流！
【INFO】
《Curry Boy》
地址：大圍積運街2-8號海福花園商場地下22號舖
營業時間：星期一 全日休息 星期二至日 11:00 - 21:00
大圍餐廳｜2. 好湯好麵
米芝蓮必比登推介嘅好湯好麵，絕對係大圍嘅招牌食店！17小時慢火燉燒，無味精，十分鮮香。招牌海龍皇湯用料豐富，有龍蝦、海蟹，湯底清甜鮮美，配埋爽滑嘅麵條，真係會飲到最後一滴！
【INFO】
《好湯好麵》
地址：大圍積存街20號地舖
營業時間：星期一至日 12:00 - 17:00，18:00 - 22:00
大圍餐廳｜3. 大圍小館
另一間米芝蓮必比登推介！大圍小館以創新粵菜聞名，招牌「第一叉」係必叫菜式，叉燒外皮微焦內嫩，非常惹味。另外仲有蜂巢炸芋角、薑米蒜香籠仔蒸蟹飯等招牌菜，每樣都好有驚喜！
【INFO】
《大圍小館》
地址：大圍積福街92號地舖
營業時間：星期一至日 10:30 - 15:30，17:45 - 22:30
大圍餐廳｜4. 肆年八月米線
講到米線，不得不提呢間人氣米線。肆年八月米線專做雲南過橋米線，湯底用豬骨、雞骨熬足8小時，清香不膩。米線爽滑有咬口，配菜新鮮豐富，有肉片、蛋絲、蔬菜等，性價比好高。
【INFO】
《肆年八月米線》
地址：大圍上徑口村148號地舖
營業時間：星期一至五 08:00 - 21:00，星期六至日 11:00 - 21:00 公眾假期
大圍餐廳｜5. 風車
風車係一間西班牙菜，招牌菜有西班牙乳豬、豬腩仔等等，皮脆肉嫩，仲有自家製甜品及蛋糕等。
【INFO】
《風車》
地址：大圍積存街50號葵偉樓地舖
營業時間：星期一至日 12:00 - 03:00
大圍餐廳｜6. 616客香邨
傳統中式餐廳，晚市提供港式炒菜，同時供應多款點心。呢度嘅客家菜做得好地道，鹽焗雞、釀豆腐、白切雞都係招牌菜。價錢合理，份量足夠，適合一家人或朋友聚餐。
【INFO】
《616客香邨》
地址：大圍積存街36號地舖
營業時間：星期一至日24小時營業
大圍餐廳｜7. 豬屋日本料理
專做日式便當嘅小店，以平價日本菜聞名。招牌有秋田便當、福岡便當、和歌山便當等，每款都有獨特風味。菜式有汁煮豬軟骨、鹽燒牛舌及脆香吉列雞扒等配埋日式米飯，滿足感十足！
【INFO】
《豬屋日本料理》
地址：大圍田心街10-18號雲疊花園地下4號舖
營業時間：星期一至日 11:30 - 16:00，17:30 - 21:30
大圍餐廳｜8. 山本屋
山本屋係圍方一間日本料理店，主打日式烏冬，款式多又夠地道，例如五目煮烏冬，配料有香菇、牛蒡、油揚同生蛋，吸晒湯汁超入味！
【INFO】
《山本屋》
地址：大圍車公廟路18號圍方5樓527號舖
營業時間：星期一至日 11:30 - 22:00
大圍餐廳｜9. 台北倆伴
位於圍方嘅一間台式料理，主打台灣夜市風味。例如花雕雞卷麻辣拌麵配紫菜貢丸湯及地瓜酥、逢甲肉鬆榨菜蛋餅及紅燒牛肉麵拼古早滷肉飯等。
【INFO】
《台北倆伴》
地址： 大圍車公廟路18號圍方5樓528號舖
營業時間：星期一至日 11:00 - 22:00
大圍餐廳｜10. 大圍168串宵
雖然「大圍168串宵」係一間隱世串燒店，但絕對係唔少大圍街坊同沙田友熟悉嘅宵夜聚腳地。呢度提供超過50款串燒選擇，由肉類、海鮮到蔬菜應有盡有，而且價錢非常親民，最平只需$12就有一串。餐廳最特別之處係首創嘅「三重芝士系列」，例如三重芝士燒生蠔伴薯蓉同埋三重芝士燒雞軟骨，芝士味極之濃郁。此外，店內招牌「冰火煙肉荔枝」亦係必試之選，用煙肉卷住雪到冰凍嘅荔枝，入口瞬間爆汁，鹹甜組合堪稱絕配。大圍168串宵憑藉其創意十足嘅口味配搭同埋極高性價比，成功喺大圍舊里中營造出一個充滿人情味嘅深夜食堂空間。
【INFO】 《大圍168串宵》 地址：大圍積存街32號地下B號舖 營業時間︰星期一至四及日 19:00 - 02:00，星期五至六 19:00 - 03:00
大圍餐廳｜11. By the O Studio 2.0
文青必去嘅cafe！裝潢簡約有格調，主打意粉、全日早餐、小食、甜品及飲品，招牌菜有蟹籽蟹肉明太子忌廉意粉及雙重芝士浴浴單邊雞翼等。
【INFO】
《By the O Studio 2.0》
地址：大圍積富街31號益富閣地下3號舖
營業時間：星期一至日 09:00 - 18:00
大圍餐廳｜12. 老去茶事
老去茶事係一間以「茶文化」為主題嘅茶館，主打弄堂茶燻雞配茶事荷葉餅、藜麥柚子醋沙律及凍重焙烏龍茶拿鐵等。
【INFO】
《老去茶事》
地址：大圍積信街77-81號積善樓地下B號舖
營業時間：星期一至日 11:00 - 21:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
