座落於香港中心地帶嘅啟德郵輪碼頭早在2014年落成，啟用多年但仍然未成為市民週末好去處。開關後郵輪碼頭陸續恢復航線，附近一帶人流又開始興旺，但卻被遊客及市民形容為「冷清」。到底啟德郵輪碼頭係咪真係咁冷清、無趣呢？編輯就為大家介紹一下啟德郵輪碼頭，同埋啟德港鐵站附近嘅去處，等大家了解多啲呢個地方。
圖片來源：啟德空中花園、旅遊事務署、啟德郵輪碼頭公園、Wikipedia-user-Wpcpey、康樂及文化事務署、Facebook @紙飛機親子餐廳、Openrice@vista0225、@weisikmuimui、@GermanyTse｜撰文：Icy
前往交通方法
- 綠色專線小巴86號
路線：往返郵輪碼頭至九龍灣港鐵站
服務時間：06:40-23:00（由德福花園二期地下巴士總站開出)
收費：每程$6.4
車程：約8至25分鐘 - 城巴22
路線：往返郵輪碼頭至又一城
服務時間：05:40-23:40
收費：每程$5.9
車程：約30分鐘 - 城巴22M
路線：穿梭行走郵輪碼頭、馬頭圍、土瓜灣、九龍城
服務時間：05:55-23:25
收費：每程$5.9
車程：約30分鐘
1. 啟德空中花園
2021年正式開幕嘅啟德空中花園，建於波浪形隔音屏障上，設計加入昔日啟德機場元素。而花園佔地面積有2公頃咁大，全長約1.5公里，坐擁無敵海景，非常廣闊。
（圖片來源：啟德空中花園）
花園總共設有三個架空廣場，分別為花園廣場、噴泉廣場以及草地廣場，提供完善嘅娛樂休憩空間，遊人仲可以係草地上野餐。周圍遍植花木，單單係樹木同灌木就已經超過80種，四季都可以欣賞多種當季花朵。
（圖片來源：前任發展局局長黃偉綸先生隨筆）
相信花園當中最吸引小朋友嘅一定係噴泉廣場，空間好充足，大家可以係夏天盡情嬉水，特別透心涼。（圖片來源：前任發展局局長黃偉綸先生隨筆）
【INFO】
地址：九龍啟德承豐道啟德空中花園
2. 啟德郵輪碼頭公園
位於碼頭頂層平台嘅啟德郵輪碼頭公園，佔地面積約23,000平方米，含多項休憩設施，包括觀景草坪、水景花園、噴泉廣場等等。
（圖片來源：旅遊事務署）
公園以「山、城、水」作為設計概念，所以綠化面積非常大，周圍都種植咗唔同花草樹木，就好似城市裏嘅一片綠洲咁。周圍環境同空氣好清新，最適合一家大小散散步！
（圖片來源：啟德郵輪碼頭公園）
比起啟德空中花園，由於啟德郵輪碼頭公園正正位於碼頭上蓋，所以景觀更加遼闊，較少建築物遮擋。所以站立係觀景平台，可以無障礙咁飽覽維港兩岸嘅景緻，以及迷人嘅日落時分景色！
【INFO】
地址：九龍啟德承豐道33號啟德郵輪碼頭頂層平台
時間：星期一至日 07:00-23:00
3. 紙飛機親子餐廳
紙飛機親子餐廳同樣位於碼頭上，室內面積達4,000呎，設計有別於一般親子餐廳色彩繽紛嘅嘅裝潢，改以簡約木系為主調，感覺和諧舒適。
（圖片來源：Facebook @紙飛機親子餐廳）
場內特設多項兒童益智玩樂設施，以培養小朋友專注力為目標，提供高質安全木製玩具。另外亦有沙池、波波池、滑梯同攀爬架等動態設施，場地安全又整潔，各位家長可以放心帶小朋友去盡情放電！
（圖片來源：Facebook @紙飛機親子餐廳）
而餐飲方面由香港米芝蓮一星酒家林師傅主理，主打摩登江浙菜，亦會提供精美兒童餐。兒童餐營養均衡，有本地製造無糖新鮮橙汁、新鮮蔬果、炒麵同得意造型饅頭，包小朋友食得開心！
兒童餐賣相可愛精緻，小朋友一定食到lam lam嘴！（圖片來源：Openrice @vista0225）
【INFO】
地址：九龍灣承豐道33號啟德郵輪碼頭B區北面平台
時間：星期一至五 11:15-20:00/星期六、日及公眾假期 10:00-21:00
4. 啟德大道公園
另一個要介紹嘅小朋友放電好去處，就係2021年落成嘅啟德大道公園，連同啟德車站廣場1期佔地面積共6.7公頃，空間非常廣闊，並設置多項兒童遊樂設施，例如鞦韆、繩索橋、山洞、滑梯等等，可以訓練小朋友體能同身體協調，刺激又安全。
場內亦設有主題花園、露天廣場同休憩大草坪，種植多項品種嘅花木，四處綠意盎然，而且仲係寵物友善空間，絕對係區內嘅合家歡好去處！
（圖片來源：康樂及文化事務署）
【INFO】
地址：九龍城沐安街16號
時間：24小時
5. Good Day Cafe
如果想靜靜地同三五知己坐低食嘢打卡，就可以去位於啟德站D出口附近嘅Good Day Cafe。店內設計以純白同水泥風為主，充滿文青格調，大玻璃窗可以透入自然光線，採光度十足，加上樓底高而且空間廣闊，提供多個位置，予人悠閒舒適嘅感覺。
Cafe主要供應賣相精緻嘅輕食同多國菜式，例如搭配唔同餡料嘅貝果、扒類同香烤意粉，色香味俱全，好味之餘又可以打卡，實在係約會同享受me time嘅好去處。
（圖片來源：Openrice @GermanyTse）
【INFO】
地址：啟德嘉峯匯商舖1樓11號鋪
時間：星期一至日 08:30-21:00
官方Facebook：https://bit.ly/45sGFgl
