位於沙頭角嘅荔枝窩，除咗係大自然生物嘅重要棲息地，仲係新界東北地區歷史最悠久嘅客家圍村之一。可能好多人都唔熟悉呢個地方，所以今次編輯就誠意推介荔枝窩一日遊嘅行程，等大家趁假日盡情感受古村嘅清幽環境，即睇以下路線及交通方法啦！
圖片來源：香港旅遊發展局、Instagram @thecoffeeterrace_laichiwo、Facebook @Foo’s Cafe、@Lai Chi Wo Village、@明記茶座-荔枝窩、Openrice @ccwchan5、@simply_lizzy、香港聯合國教科文組織世界地質公園｜撰文：Icy
荔枝窩一日遊6大景點｜1. Foo’s Cafe
Foo’s Cafe賣點係利用荔枝窩本土農作物，製作出美味嘅輕食茶點，崇尚新鮮健康。村內自家種植嘅高山咖啡豆以天然肥料及雨水灌溉，收成後用作調製手沖咖啡，帶有天然果酸及果仁味道，入口香醇幼滑。
（圖片來源：Facebook @Foo’s Cafe）
呢度出品嘅花花料理亦好有心思，食用花朵會用以製作鮮奶油蛋糕、有機沙律同花茶，有多款口味同色彩，賣相吸睛，打卡效果都唔錯㗎！
色彩繽紛嘅花花料理好igable！（圖片來源：Facebook @Foo’s Cafe）
【INFO】
地址：沙頭角荔枝窩村6號
時間：不定，可於Instagram向店主查詢
荔枝窩一日遊6大景點｜2. 荔枝窩故事館
如果想了解400多年歷史嘅客家文化，大家可以參觀座落係村落中心嘅「荔枝窩故事館」。故事館由傳統客家房屋改建而成，收集80多個村民口耳相傳嘅故事，再透過圖文並茂嘅多媒體同傳統展品，以四大主題向遊客呈現村民過往嘅生活模式同習慣。
（圖片來源：Facebook @Lai Chi Wo Village）
四大主題分別為「慶春約」七村村民生活作息、傳統醫術、客家歌曲及婚嫁習俗。客家人鍾意即興創作山歌，所以展板更會播放客家山歌嘅錄音，令遊客好似時光倒流重返古代咁！
（圖片來源：Facebook @Lai Chi Wo Village）
【INFO】
地址：沙頭角荔枝窩村10號屋
時間：星期二、星期四、星期六、星期日及公眾假期 10:00-16:00
荔枝窩一日遊6大景點｜3. 明記茶座
去到客家古村，當然唔少得品嚐地道客家菜！老闆為荔枝窩原居民，曾遠赴英國工作謀生，幾年前回流鄉村，開設明記茶座，將客家文化介紹畀每一位客人。茶座大部份嘅出品都係採用荔枝窩種植嘅天然食材，例如傳統家鄉荔香芋頭扣、客家炆豬肉、黃酒雞等等。
（圖片來源： Openrice @ccwchan5）
茶座現時更推出打工換宿體驗，大家可申請於星期六、日及公眾假期到茶座幫手，負責樓面工作或者打理農務。體驗計劃將會包食宿，仲會有貓貓主子監督工作，等大家感受荔枝窩鄉村嘅簡樸生活及文化。
（圖片來源： Openrice @simply_lizzy、Facebook @明記茶座-荔枝窩）
【INFO】
地址：沙頭角荔枝窩村93號
時間：星期六、日及公眾假期 11:00-15:00
荔枝窩一日遊6大景點｜4. 荔林咖啡
荔林咖啡可謂係香港最隱世嘅cafe之一，大家需要沿住荔枝窩村走到最盡頭，再經過狹小嘅樓梯先會到達荔林咖啡。雖然冇設置特別嘅打卡位，但係呢度嘆咖啡可以被大自然包圍，欣賞村落嘅風貌。
（圖片來源： Instagram @thecoffeeterrace_laichiwo）
店主利用荔枝窩未復耕嘅梯田，以農林間作嘅方式種植咖啡豆，亦會自家種植薑黃，研磨成薑黃粉。除咗飲品， cafe亦會提供輕食，用上新鮮蔬菜同食用花等材料，令客人可以體驗「farm to table」。
（圖片來源： Openrice @simply_lizzy）
薑黃南瓜芝士巴斯克蛋糕賣相特別，清甜而不膩（圖片來源： Instagram @thecoffeeterrace_laichiwo）
不過呢度嘅營業時間比較「隨性」，店主會不定時放假，大家想光顧嘅話，記得事先於官方社交網站詢問店主喇！
（圖片來源： Instagram @thecoffeeterrace_laichiwo）
【INFO】
地址：沙頭角荔枝窩村182及185號
時間：不定，可於Instagram向店主查詢
荔枝窩一日遊6大景點｜5. 客家古村
荔枝窩村落最具特色嘅地方就係保留咗超過200間傳統客家樓房，雖然自80年代開始，大量居民都已經遷離荔枝窩，但隨住香港人保育意識越來越強，好多保育團體或者原居民都會重新修葺舊樓房，為荔枝窩注入生氣。
（圖片來源：香港聯合國教科文組織世界地質公園）
客家樓房以三縱九橫形式排列，屋內設計為左廁右廚，由於舊時海盜猖獗，因此房屋外圍會建立風水圍牆以作防禦。有啲樓房已被改造成商店同訪客中心，完善地向遊客呈現地道客家文化。
（圖片來源：香港聯合國教科文組織世界地質公園）
荔枝窩一日遊6大景點｜6. 紅樹林自然步道
荔枝窩村環繞住一條紅樹林自然步道，全長約1.2公里，平坦易行，好適合遠足新手。四周一片綠蔭，空氣清新怡人，沿途會經過多個生態景點，例如白花魚藤林、風水林、田野、溪流等等。
（圖片來源：香港聯合國教科文組織世界地質公園）
當中嘅銀葉樹林非常茂密，可以生長至約6米高，係全港最高大嘅紅樹品種，成為其他動植物絕佳嘅棲息地。而濕地泥灘則孕育住多樣化嘅海洋品種，為魚類同螃蟹提供庇護所和繁衍後代嘅地方，充滿生態價值！
（圖片來源：香港聯合國教科文組織世界地質公園）
前往交通方法
- 由大學站B出口開始步行15分鐘，或者搭乘272K號巴士，於馬料水三號梯台乘搭往荔枝窩嘅渡輪，船程約1.5小時，途中更會經過著名景點「鬼手岩」
（只限逢星期六、星期日及公眾假期提供服務）
開往荔枝窩：上午 09:00 / 開往馬料水：下午 03:30
票價：單程$45（大小同價，3歲以下小童免費） - 由大埔墟站乘搭20R小巴/275R巴士至烏蛟騰，步行入荔枝窩，路程約2.5小時
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
