九龍城寨之圍城 |《九龍城寨之圍城》票房破億，亦代表香港出戰奧斯卡。如果想近距離感受九龍寨城昔日嘅風貌，就一定要去參觀電影展，1:1還原電影入面嘅士多、理髮店以及冰室等經典場景，即刻睇詳情！
圖片來源：香港旅遊發展局 | 撰文：Hedy
港產片《九龍城寨之圍城》憑住精緻嘅美術場景，還原當年擁有歷史情懷嘅九龍寨城，再加上引人入勝嘅動作設計，令觀眾都相當欣賞呢套電影。大家可以先後喺香港國際機場及九龍城啟德AIRSIDE商場入面睇到九龍城寨之圍城電影展，展覽將會以1:1還原閣樓、士多以及茶檔等八十年代九龍寨城嘅生活景象，當中更有必訪嘅六大主題區！
九龍城寨之圍城展覽 | 1. 閣樓
無論係旅客定係香港市民，只要一行到機場接機大堂，就會見到電影入面嘅閣樓，眼前約6.5米高嘅雙層舊建築以及「九龍城寨」霓虹燈牌絕對令人感到震撼！誤闖城寨嘅陳洛軍住入冰室閣樓，展覽重現吊扇、麻雀枱及啤酒箱等細節，超用心！
九龍城寨之圍城展覽 | 2. 茶檔
閣樓嘅下層就係茶檔「七記冰室」，就係電影入面街坊圍埋一齊傾計嘅地方，仲有當中必定要食嘅叉燒飯！而展覽入面亦重現叉燒飯，仲有懸掛嘅仿真燒味，真係令人忍唔住想試究竟有幾好味！
九龍城寨之圍城展覽 | 3. 理髮店
唔知大家又有冇睇過80年代嘅理髮店係點㗎呢？格仔地磚映襯紅色理髮椅，再加上一排懷舊理髮工具，實在令人懷念！展覽將電影入面龍捲風嘅理髮店重現，由於場景只供打卡，大家記得唔好坐落去～
九龍城寨之圍城展覽 | 4. 士多、膠花製作社
大家仲記唔記得電影入面經典嘅一幕，就係由林峯所飾演嘅陳洛軍到士多購買眼鏡朱古力，你哋又有冇食過呢？喺展覽入面將會有唔同嘅懷舊零食、玩具以及膠花製作場口等，令大家對八十年代嘅香港風情印象深刻。
九龍城寨之圍城展覽 | 5. 水井、電器小店
城寨居民依井攞水，喺路邊收買二手電器以及收音機等嘅小店都盡顯眼前，大家都可以回想返居民當年生活嘅模樣，體驗香港街巷特色。
九龍城寨之圍城展覽 | 6. 後巷
睇電影嘅時候，當大家見到錯綜複雜嘅電線、鐵皮屋以及昏暗小巷等，有冇讚嘆呢啲細節位都完美還完到昔日嘅寨城風貌呢，背後絕對係落足唔少功夫先做到！而大家都可以喺今次嘅展覽睇到縱橫交錯嘅小巷！
九龍城寨之圍城展覽 | 展覽分為2大階段
「走進香港，走進香港電影」九龍城寨之圍城電影展覽，將會分2個階段喺香港國際機場及九龍城啟德AIRSIDE商場舉行。由即日起去到2024年11月20日，大家都可以喺香港國際機場接機大堂A區，見到電影入面嘅傳奇地標。同場亦有大型展版會介紹九龍寨城歷史，並附有《九龍城寨之圍城》電影及展覽簡介等，記得要把握機會欣賞吓啦！
【INFO】 《九龍城寨之圍城電影展覽》 日期：即日起至2024年11月20日 地點：香港國際機場接機大堂A區
九龍城寨之圍城展覽 | 第二階段 帶嚟沉浸式室內體驗
電影《九龍城寨之圍城》嘅故事發生喺九龍城，所以而第二階段嘅展覽將會喺12月中於九龍城啟德AIRSIDE商場舉行，進一步深化同九龍城歷史嘅聯繫。展覽第二階段將會帶畀大家不一樣嘅沉浸式室內體驗，令大家一步步行入寨城，穿過標誌性走廊、走入茶檔等。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
