我在這裡等你 | 近期大熱電影《九龍城寨之圍城》，相信令唔少人更認識飾演「信一」嘅劉俊謙，大讚除咗有演技之餘又相當靚仔！鍾意劉俊謙嘅大家亦都可以留意佢最近即將上映嘅另一套電影《我在這裡等你》，更同台灣演員范少勳主演，當中兩人更會上演壁咚情節？即刻睇睇有邊8大看點，究竟係咪BL劇？
圖片來源：Facebook@我在這裡等你 | 撰文：Hedy
劉俊謙參與過唔同嘅電視劇同電影拍攝，當中包括《教束》、《幻愛》、《940920》、《二月廿九》以及近期大熱電影《九龍城寨之圍城》。而今次佢就同台灣演員范少勳一起主演電影《我在這裡等你》，一段跨越時嘅浪漫緣分即將上演！
我在這裡等你看點 | 1. 兩人首次合作
港台男神劉俊謙以及范少勳喺舊年金馬獎頒獎典禮上，一齊拖手上台頒獎。兩人經常都被指撞樣，所以當自我介紹時，劉俊謙自稱為「港版范少勳」，而范少勳則稱自己為「台版劉俊謙」，當時已經有唔少觀眾都期待兩人嘅合作，而今次《我在這裡等你》電影就促成咗兩位型男嘅首次合作，各位粉絲們終於等到啦，兩人更因電影成為好朋友！
我在這裡等你看點 | 2. 電影簡介
劉俊謙將會喺電影入面飾演失意嘅香港作家天宇，偶遇由范少勳所飾演嘅台北街頭混混阿翔，兩人將會展開尋找通往天堂嘅鯨逝灣旅程，沿途更會發現意外嘅轉折與緊密嘅緣份，帶出呢個世界上總有一個同你相似並等待你嘅人。
我在這裡等你看點 | 3. 眾多養眼畫面
相信大家都會相當期待呢兩位型男嘅演出，兩人超有愛嘅互動包括壁咚、沙灘咚、擋門咚等，都絕對會令大家大叫！電影更出現兩人「鴛鴦戲水」嘅夢幻畫面，兩人淨係著底褲喺瀑布邊戲水，大曬肌肉。畫面不禁令人聯想到喺BL劇，更有觀眾喺官方社交媒體上發問，官方竟然回答：「是也不是」，究竟係唔係就要等觀眾入場觀賞啦～
我在這裡等你看點 | 4. 兩人均為戲受傷
喺拍攝期間，兩位型男都發生意外，范少勳喺拍攝一幕拍門嘅畫面入面，唔小心打爛成塊玻璃，最後更要去醫院縫咗足足37針。劉俊謙就喺海邊拍攝嘅時候踩空撞到下巴，縫咗10針，兩人都為戲受傷並留下疤痕，不過好彩都冇乜大礙！
我在這裡等你看點 | 5. 超前導海報
超前導海報由知名設計師方序中操刀，以多層次嘅筆觸描繪綻開夜空嘅朵朵煙花，燦爛卻短暫嘅特質，但同時亦都係暗示兩位主角喺電影入面嘅相遇以及所獲得嘅情感。喺夜空下方嘅海灣，兩位主角一前一後嘅身影，看似平行交錯，卻為彼此留下身邊嘅空位，既浪漫又感人。
我在這裡等你看點 | 6. HUSH首度獻唱電影主題曲
金曲歌王HUSH以溫暖嘅歌聲，為電影獻唱主題曲<我在原地等你>。今次亦都係HUSH首度為電影主題曲獻聲，帶有磁性嘅聲音，能將迷幻憂鬱嘅感覺呈現，同時亦能以歌聲療癒大家。
我在這裡等你看點 | 7. 電影預告
我在這裡等你看點 | 8. 香港上映日期
《我在這裡等你》電影早已經係5月10喺台灣上映，而香港將會喺5月15日正式上映，唔知到時劉俊謙同范少勳又會唔會親自嚟香港戲院謝票呢？大家一定要留意官方Instagram啦～
【INFO】 《我在這裡等你》 上映日期：2024年5月15日 電影場次：https://bit.ly/3WrU5HY
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
