飯盒清潔 | 唔知大家有冇發現，當飯盒用得耐嘅時候，入面嘅膠圈容易出現變形，甚至會有發霉嘅情況，隨時食晒啲菌落肚！台灣更有實測稱只要3日冇洗膠圈，黴菌就會十萬倍數增加，簡直係爆晒錶！即刻睇下有啲咩方法可以洗走霉菌！
圖片來源：官方圖片 | 撰文：Hedy
相信唔少打工仔都會帶飯返Office食，當忙起上嚟嘅時候就連洗嘅時間都冇，唯有夜晚帶返屋企先再洗。正正喺呢種潮濕嘅環境下，再加上食物嘅污垢，容易令黴菌加速生長！所以大家喺飯盒膠圈上面見到嘅黑色點，就代表已經出現發霉嘅情況。咁點可以徹底清除乾淨？小編即教你4大方法！
飯盒清潔 | 1. 熱水+過碳酸鈉清洗
家事達人「我是佐藤SATO」不時都會喺YouTube上面分享家居整理、收納同清洗等技巧，令大家可以用最短時間學識，幫輕各位父母！當飯盒出現發霉嘅情況，佐藤SATO稱只要用面盆、3公升熱水以及50克過碳酸鈉，簡單四步就可以輕鬆清除污垢，簡直就好似全新嘅飯盒一樣～
- 將50克過碳酸鈉以及3公升熱水（水溫約45度）加入面盆並攪拌
- 將飯盒入面嘅膠圈拆除，再將飯盒蓋、膠圈以及食物盒放入水浸泡，等待60分鐘或以上時間
- 換一盤乾淨嘅水，再用牙刷刷乾淨上面嘅污垢
- 最後用抹布抹乾，等待風乾
飯盒清潔 | 2. 清水+梳打粉
如果屋企冇過碳酸鈉都唔使擔心，只要有梳打粉都可以做到類似嘅效果！每次清潔飯盒嘅時候，只要利用嘅筷子或萬字夾，將膠圈攞出嚟清洗。如果入面本身已經有好多黴菌，就可以將梳打粉加入清水入面浸泡，大概等15分鐘後再用牙刷刷走表面嘅污垢。
飯盒清潔 | 3. 更換膠圈
如果洗完之後都發現食物盒仲有黴菌都唔洗怕，大家都可以選擇定期更換膠圈，咁就唔洗每次都直接棄置飯盒，可以延長使用時間。不過買之前記得要留意飯盒嘅牌子同埋型號，咁就唔怕唔啱Size啦！
飯盒清潔 | 4. 以保鮮紙分隔飯盒
如果唔想咁容易出現黴菌，除咗定期清洗好重要之外，其實善用保鮮紙分隔飯盒同蓋，都可以減少飯餸汁滲入膠圈嘅情況！
