話咁快又就快2024年啦！想新一年有個新開始，為咗迎接新一年嘅來臨，好多人會喺呢個時候執屋大掃除，但又發現屋企非常雜亂，無從入手。如果你都係其中一人，就係時候要斷捨離，清理吓屋企多餘嘅雜物。咩係斷捨離？要點樣清理？編輯教你以下7個斷捨離小法則，等你可以乾淨、整齊地迎接新生活！
圖片來源：網上圖片｜撰文：Tiffany
近年好流行嘅斷捨離，創始人係日本作家山下英子。「斷捨離」嘅概念原本係講求放下內心嘅執著、捨棄不必要嘅連繫，之後先被運用到居家空間整理之上。「斷」絕不必要嘅東西；「捨」去多餘廢物；脫「離」對物品嘅執著，就係斷捨離所提倡嘅精神。斷捨離除咗講求將物件整理、分類，甚至棄掉，去騰空屋企嘅空間之外，更希望大家可以透過整理空間，斷絕不需及多餘嘅物品、捨去對物品甚至某些人事嘅執著。所以斷捨離講求嘅其實係藉着減少物品，放下執念的決斷力，才能迎接更好嘅新事物。
斷捨離法則 | 1. 從最容易捨棄嘅物件開始
如果唔知道應該點開始，建議大家先從「點睇都係垃圾」嘅物件著手，例如已經壞咗嘅物件、污糟到無法清理嘅物件。呢類型嘅物件通常都比較容易捨棄，亦好明顯地已經無用，所以可以最先處理。
斷捨離法則 | 2. 丟棄重複嘅物品
屋企總會有啲物件係重複，例如化妝品、日用品、小朋友玩具等等。成日買完唔知放咗喺邊，搞到買完又買，屋企就越放越多嘢。將款式或者功能重複、甚至一模一樣嘅物件進行篩選，喺同類型嘅物件中，只留低比較好用、實用、鍾意嘅幾樣，然後將其他多餘嘅丟棄，減少家中雜物。
斷捨離法則 | 3. 丟棄已經兩年無用嘅物品
如果該物件已經超過兩年完全無用過，相信你已經唔需要嗰樣嘢。例如已經放咗喺衣櫃深處、多年無著過嘅舊衫，幾年無著過嘅舊鞋，無再睇過、而且唔會再睇嘅書本… 放咗咁耐都無用，其實係時候考慮捨棄佢哋喇。
斷捨離法則｜4. 唔捨得嘅就唔好掉
斷捨離嘅重點其實在於「選擇」及「必要的」，而唔係叫你將全部嘢掉晒。所以如果你喺篩選物件嘅時候，發現有啲雖然無用、但唔捨得丟棄嘅物件，例如定情信物、家傳之寶，其實絕對可以將佢哋留低！唔需要勉強自己一定要將有意義、有紀念價值嘅物件都一同處理。
斷捨離法則 | 5. 以「自己」及「現在」為考慮嘅出發點
斷捨離有兩大原則：自己、現在，所以喺決定某樣物件應唔應該丟棄嘅時候，可以從呢兩個原則為出發點。只留低「現在」嘅「自己」所需要嘅嘢，問吓自己「如果你依家要再用錢買返呢件物品，你會唔會買？」，如果答案係唔會的話，呢件物品就可以選擇棄掉喇。
斷捨離法則｜6. 為物品找個家
將家中物件整理好之後，就要開始將佢哋整齊地收納好，而「為每樣物品找個家」係非常重要。為每件已經挑選咗出嚟、決定留低嘅物件，搵一個合適嘅位置安放，呢個位置必須係順手、容易拎、容易擺放，咁先可以做到每次用完之後都物歸原位。習慣將物件歸位，唔好貪方便亂咁放，屋企就唔會越嚟越亂，亦可以減少因為唔知啲嘢放咗喺邊、而越買越多嘅情況。
斷捨離法則｜7. 盡快及適當善後
決定咗邊啲物件係唔要之後，就要盡快善後，避免將「垃圾」堆放喺屋企。處理唔要嘅物件有好多方法，例如放上二手網賣、轉贈俾親戚朋友、捐贈俾社區中心或慈善團體，或者拎去廢物回收，甚至直接丟棄。總之，千祈唔好一直放喺屋企，因為唔要嘅物品出咗家門，先係真正嘅斷捨離！
斷捨離法則｜物品清單
如果你睇完以上法則，仍然覺得無從入手，或者可以先考慮丟棄呢20樣物品，大多都係一般家居常見嘅多餘或不必要物件，比較容易丟棄！畀你做個參考，等你輕鬆開始斷捨離！
- 已經破損/有汙垢但洗唔甩嘅衣物：其實汙漬已經洗唔甩，不如接受現實放棄佢
- 旅行時買嘅服飾：去日本旅行買件浴衣體驗一下當地風情的確有趣，但返香港之後其實唔會再穿著
- 學生時代著嘅校服：回憶總是美好，但校服都已經發黃，回不去了
- 已發黑嘅首飾：其實你唔會拎出嚟抹，已發黑亦唔會再用
- 鞋跟/鞋底已磨蝕、甚至破爛嘅鞋：佢嘅使命已經完成，陪你走過一段路喇
- 過期化妝品、護膚品：每次見到新色號又會再買，不如先清咗過期化妝品先
- 唔適合自己膚質/會敏感嘅護膚品：唔適合就係唔適合，無謂勉強，不如轉贈有需要嘅朋友
- 唔會再用到嘅電話截圖：作用完成就唔好浪費Memory
- 半年冇用過嘅電話App：其實唔需要㗎啦
- 贈品電話殼/手機支架：經常收到咁多贈品，其實款式又唔靚又唔好用
- 即棄餐具：儲埋咁多幾時有用過？
- 過期食物/醬料：儲埋太多醬料，漏到成個雪櫃污糟晒
- 有刮痕嘅平底鍋：塗料甩咗，個鍋已經失去主要功用
- 產品說明書：你唔需要說明書都可以好好使用呢件產品
- 單據：單據只係買個心安，過咗保養期已過唔需要了
- 墨水已用完嘅筆：有咩用？
- 拉鍊壞掉嘅手袋：曾經好想拎出去整好條拉鍊，但一直都冇去做，其實唔用呢個袋都冇問題
- 過期會員優惠卡、積分卡、印花：唔儲再換到優惠了喔
- 唔會再聯絡嘅實體卡片：其實人哋都未必記得你
- 買完之後覺得後悔嘅書本：又厚又重，放喺屋企好晒位
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
