日本花期2025 | 日本每年嘅櫻花花季都會吸引旅客前往賞櫻，但日本除咗櫻花之外，一年四季都可以欣賞到唔同嘅花卉例如向日葵、繡球花等，小編為大家整理日本全年嘅花期，等大家隨時都可以飛去欣賞花海！
圖片來源：Facebook@能古島、国営ひたち海浜公園、北野天満宮網站、Instagram@sunflower_hokuryu、Amazing Aomori、enjoytokyo.jp、farm-tomita、niigata-kankou、公益財團法人東京都公園協會 | 撰文：Hedy
日本花期 | 2月下旬至3月上旬：梅花
一踏入春天，大家都會率先睇到梅花而唔係櫻花，日本各地更會舉辦唔同嘅梅花祭典，當中更包括熱門嘅文京梅花祭，喺江戶時代起數百年來就作為著名賞梅景點而備受喜愛嘅湯島天滿宮（湯島天神）舉辦。喺寺廟入面，以白梅「白加賀」為中心，約300株梅花競相綻放，畫面相當壯觀！
日本花期 | 3月中旬至4月上旬：油菜花
3至4月除咗係櫻花盛開嘅季節之外，亦都係金黃色油菜花盛開嘅時候，有緣嘅話更可以一齊見到呢兩種花海！目前青森縣橫濱町嘅油菜花田喺日本國內首屈一指，其農作面積更廣達128公頃，為欣賞油菜花嘅最佳好去處！
日本花期 | 3月中旬至4月上旬：櫻花
日本每年嘅3至4月都會吸引唔少旅客賞櫻，預計東京將會喺今年3月23日開花，而京都及北海道札幌將會喺3月24日以及4月30日開花，出發賞櫻之前，不妨先留意定時間！
日本花期 | 4月中旬到5月上旬：粉蝶花
粉蝶花為來自北美嘅一年生草本花卉，日本名為瑠璃唐草。株高約20cm，花朵大小約2至3cm。每當開花嘅時候，都會將整個山丘染成粉藍色，景色簡直就係同天空融為一體咁，相當之靚！
日本花期 | 6月至7月：繡球花
每當每年6月梅雨季來臨嘅時候，大家都會喺日本各地見到盛開色彩繽紛嘅繡球花。而位於東京嘅白山神社每年都會舉行「文京繡球花祭」，3000逐繡球花將會盛開，地點方便觀賞之餘又可以一齊體驗熱鬧嘅祭典。
日本花期 | 7月：薰衣草
暑假遊日本賞花，必定要去薰衣草花海打卡，當中富田農場更以大片優美嘅薰衣草花田聞名，更有多個彩色花田任你欣賞，色澤鮮豔嘅花田喺斜坡上畫出美麗嘅彩虹。
日本花期 | 7月至8月：向日葵
每到夏天，當向日葵開滿咗成個花田，就會令人感到充滿活力，喺陽光下綻放出黃色花海，超級壯觀。位於北海道北龍町嘅向日葵之里，有一大片開滿向日葵嘅田野，令你體驗被約150萬株燦爛向日葵包圍嘅感覺。
日本花期 | 8月下旬至11月上旬：大波斯菊
波斯菊作為日本秋季嘅代表性花朵之一，喺佔地15萬平方公尺嘅能古島Island Park一到秋季10月，就會成為粉紅波斯菊嘅花海，一年四季都可以觀賞唔同嘅花，絕對係賞花嘅好地點！
日本花期 | 10月上旬至12月上旬：紅葉
去到秋季又點少得睇紅葉？隨著秋季嘅到來，日本各地都會染上紅色或黃色嘅楓葉，賞楓嘅最佳時期會因地區而異，一般都會在10月下旬至12月上旬左右，當睇住楓葉與寺廟及神社等形成優美嘅畫面，絕對係日本賞楓嘅一大魅力！
日本花期 | 12月上旬至1月：日本水仙
每逢1月嘅時候，大家都可以聞到清新嘅水仙香氣，香味撲鼻而嚟！當中亦有唔少人都會特意到葛西臨海公園欣賞近20萬枝水仙花盛開嘅畫面，更可以觀賞到富士山同摩天輪。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
