仲記唔記得廣志穿女裝迷倒卡車大叔嗰幕？日本官方最近居然將呢個爆笑「神場面」變身做立體馬克杯！大叔深情死盯住怕醜嘅女裝廣志，還原度極高，小新迷點可以錯過！
圖片來源：X@shinchan_cinema、網絡圖片｜撰文：Sharon
《蠟筆小新》2003年劇場版《風起雲湧！光榮燒肉之路》入面最迷之震撼嘅一幕，野原廣志為咗避難迫住換上女裝，點知喺搭便車期間，竟然憑住「魔性魅力」迷倒咗開卡車嘅大叔司機！即使廣志最後坦白自己係男人兼摘落假髮，司機大叔依然深情款款咁回咗一句經典名言：「我知道，喔～更愛你了！」呢個震撼童年嘅神級名場面，最近居然被日本官方實體化，推出咗全新嘅「女裝廣志 x 卡車司機」陶瓷對杯套裝！
呢套對杯嘅設計簡直完美捕捉咗劇場版入面嘅精髓！「女裝廣志杯」杯身正面印上廣志金髮紅唇、著住粉紅裙嘅「絕美」造型。最搞笑嘅係佢頭頂仲還原咗劇中因為太尷尬而狂冒汗嘅經典表情！而「卡車司機杯」以藍色為主調，大叔嗰副「眼神死得嚟又帶點深情」嘅側臉簡直係神還原。當你將兩隻杯擺埋一齊嗰陣，司機大叔就會用極度深情嘅眼神死死盯住身邊害羞又尷尬嘅廣志，直接重現電影副駕座位嘅名場面！買嚟自己收藏定係送畀朋友做禮物，都絕對係爆笑首選！
【INFO】 《「女裝廣志 x 深情卡車司機」情侶杯》 銷售點：日本Crayon Shinchan Cinema Parade各分店
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
