大掃除 | 農曆新年又就快到啦，喺時候又要準備大掃除！不過屋企咁凌亂，大掃除又應該由邊度開始入手清理？又有咩必備清潔工具？日本清潔達人教你用輕鬆洗走水龍頭上萬年水漬/抽油煙機污漬！
圖片來源：《所JAPAN》節目截圖、YouTube@我是佐藤SATO、KSB瀬戸内海放送 | 撰文：Hedy
「年廿八洗邋遢」象徵著送舊迎新，同時「廿八」嘅諧音與「易發」相似，喺當日進行大掃除就會象徵好運！新年前所進行嘅大掃除可以將過去一年不順嘅運氣一掃而空，同時亦有消災去病嘅意思，為新一年帶嚟新氣象！
1. 3大工具清洗水龍頭水漬
日本綜藝節目《所JAPAN》請嚟頂級家政婦川津尚美，為大家分享清潔小技巧！當中水龍頭上嘅水漬可以簡單靠3個工具就可以清除，只需要使用醋及保鮮紙，輕鬆清除！先將醋倒喺百潔布上，再將洗刷一遍水龍頭上嘅污漬。趁醋仲未完全乾透嘅時候，就要用保鮮紙包好，等候15分鐘後再用絲襪清潔一次。只要將具彈性嘅絲襪對半後再喺頂部打結，再將佢綁成三手辮，就可以輕鬆咁洗走水龍頭上面嘅隱藏污漬，令大家更容易清洗狹窄嘅地方！除咗水龍頭之外，浴室入面嘅鏡以及廚房嘅砧板，都可以用醋加保鮮紙清潔。
2. 輕鬆清洗抽油煙機污漬
如果平時冇清洗開廚房，就會堆滿油垢，最令媽媽們頭痛嘅抽油煙機污漬，究竟要點樣清洗？台灣一名YouTuber「我是佐藤SATO」在頻道上分享去除抽油煙機千年油漬嘅方法，洗完之後立立令！
只需要準備一個唔會漏水嘅垃圾袋或膠袋，放入鍋子或者盆入面。之後再注入5公升嘅溫熱水並搭配160克倍半碳酸鈉，均勻溶解後再浸40分鐘。咁就可以將油網放入去浸40分鐘，記得要計時唔好浸超過嘅時間。因為當水溫冷卻落嚟嘅時候，就會造成反效果，容易變得難以清洗。時間結束後就要將油網攞出嚟，再用刷布輕輕地刷走油漬，咁就可以變得乾淨！
3. 浴室瓷磚佈滿黑色霉菌
當天氣潮濕，浴室內嘅地板同瓷磚等地方最容易滋生黑色霉菌，日本KSB電視台請來家務達人佐藤亮分享如何解決！只需要使用膠手套、廚房紙、保鮮紙以及1比99稀釋漂白水就可以解決。先戴上膠手套，並將稀釋嘅漂白水倒入盆內，將廚房紙浸入清潔劑中，敷在浴室入面發霉嘅地方。之後就可以再上一層保鮮紙，等候30分鐘後，便可以輕易咁用牙刷同花灑刷走霉菌！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
