觀音借庫2024 | 借庫要借最少3年？吉時/借庫祭品/還庫日子

觀音借庫2024 | 每年農曆正月廿六日都係觀音借庫嘅日子，唔少善信同市民都會嚟觀音廟借庫，最主要都係為咗取得好意頭！想知道到觀音廟借庫有咩地方要注意，以及包括各大廟宇地點開放時間、還神注意事項，就記得留意小編為大家準備嘅觀音借庫2024攻略喇！

圖片來源：網絡圖片｜撰文：Sharon 

觀音借庫2024：觀音借庫最少3年

觀音借庫又名觀音開庫，相傳觀音未成為大士之前喺修道期間，五百羅漢化身成和尚，下凡為考驗觀音之修行。觀音最後於農曆正月廿六日大開庫門派發齋菜，漸漸地變成傳統習俗，每年正月廿六，都有唔少善信前往觀音廟借庫。不過如果要進行觀音借庫儀式，必須要連續「有借有還」最少3年！

觀音借庫2024：金額

觀音開庫後，會有一封利是，入面有一張寫上借庫金額嘅紅紙。金額各有不同，由三千萬至十億不等，但唔一定係指財運，仲包括健康、事業、人緣等。

觀音借庫2024：吉時

觀音借庫日於西曆2024年3月6日凌晨開始（農曆正月二十六日），而吉時則於西曆2024年3月6日下午1時至3時（未時） 。

觀音借庫2024：祭品

1.  觀音衣冠與紙寶一套
2. 大蠟燭一對、香九支（即三炷）、生果三個或五個、鮮花一束
3. 壽金一條或若干
4. 大神花一對

觀音借庫2024：借庫過程 

1. 喺觀音衣寶上填上當天日子、名字、生日同住宅地址。 
2. 先燃點蠟燭，再上香九支，每次三支，並奉上大神花。
3. 心中向觀音祈求：「現向觀音菩薩借財庫，明年一定還願。」
4. 添過香油後，將觀音衣冠紙寶火化，或交給廟祝處理。
5. 接過由廟祝送出嘅利是，將利是或紅咭紙放入錢包內。
6. 記得翌年還庫時，要將利是或紅咭紙一同與紙寶還給觀音，以示有借有還。

觀音借庫2024：提供觀音借庫嘅廟宇

廟宇	地址
紅磡觀音廟	九龍紅磡差館里
慈雲山觀音廟	九龍慈雲山沙田㘭道400號
筲箕灣天后廟	筲箕灣東大街53號
蓮花宮	大坑蓮花西街一號

觀音還庫2024：還庫過程 

有借有還非常重要！觀音借庫最重要一定係要「還」，到觀音廟借庫嘅朋友，記得要喺西曆2024年12月22日前到觀音廟還庫啦！還庫物品包括觀音衣冠及紙寶一套、蠟燭一對、壽金一條、金、銀各一條、大香三支。

1. 叩拜三次，然後點燃嘅蠟燭插喺香爐上。
2. 默念祈福：「觀世音菩薩，弟子現在還庫，有借不難，本利歸還，多謝觀世音菩薩音一年內嘅保佑。」
3. 最後，將衣寶以及「庫錢」字條交畀廟祝化掉。