吹頭髮技巧 | 長頭髮嘅女士們如果每日洗頭，都會覺得吹頭髮係一件相當痛苦嘅事，每次都要吹成10分鐘以上！如果想頭髮快乾1.5倍之餘，又可以保留順滑髮質，就一定要試試呢個方法！
圖片來源：節目影片截圖 | 撰文：Hedy
相信大家洗完頭之後為咗可以快啲吹乾頭髮，都會用乾毛巾大力擦拭頭髮，不過咁做就好容易令頭髮因過度摩擦，而損害髮質，甚至會造成脫髮等情況出現。坊間就有人話只需要將毛巾放喺頭髮上面，吹頭嘅時候就會更加容易乾，甚至可以慳一半時間，係咪真係咁神奇？
吹頭髮技巧 | 頭髮快乾1.5倍
日本節目曾實測過呢個「速乾頭髮術」，並分成兩組進行測試，一組就直接用風筒吹乾頭髮，另外一組就喺頭髮上面加上毛巾之後再吹乾。結果發現加上毛巾之後吹頭髮，只需要4分鐘就完全吹乾，對比另一邊用6分鐘，足足快咗1.5倍。唔單止速度上取勝，吹完頭嘅髮質亦同樣係順滑不毛躁，如果下次大家都想慳返啲時間，都可以試試呢個方法！
吹頭髮技巧 | 背後原理
「速乾頭髮術」嘅原理相當簡單，專家解釋透過毛巾可以將頭髮嘅水分全部吸收，擴大水分蒸發嘅面積。然後再用風筒嘅熱能直接傳到頭髮同毛巾上，就可以令水分蒸發嘅速度變得更加快，用更短嘅時間吹乾頭。用毛巾同樣可以保持髮絲順滑，原因係毛巾阻隔咗吹出嚟嘅熱風，咁就唔會令頭髮變毛躁～
吹頭髮技巧 | 頭髮分層亦有幫助
除咗用毛巾可以加快吹乾頭髮之外，將頭髮分層亦有幫助，先從髮根開始吹到髮尾，同時亦可用夾將頭髮層層分開，逐層吹乾。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
