乾鞋方法 | 落大雨最麻煩嘅係會整濕對鞋，天文台更預測呢一個禮拜都會有大驟雨同狂風雷暴！唔想喺Office長時間罨住對腳，就要學學以下呢7個方法，教你快速整乾對鞋！
圖片來源： Freepik、網上圖片 | 撰文：Hedy
落雨乾鞋方法 | 1. 垂直豎起
如果手頭上冇任何嘅工具，最簡單可以令鞋速乾嘅方法，就係將鞋帶解開，再將鞋墊攞出嚟並將鞋舌反出嚟。完成之後就可以將鞋靠牆邊垂直豎起，並放喺靠近抽濕機或冷氣機附近，等佢快速自然風乾。
落雨乾鞋方法 | 2. 善用報紙
喺Office入面最有機會出現唔用嘅報紙，呢個時候就可以派上用場！由於報紙有極強嘅吸濕能力，只要將報紙捲成球狀再塞入去鞋入面，就可以有助吸收水分，記得及時換報紙！呢個方法唔太建議用喺淺色或純白鞋身上，因為報紙帶有油墨，容易整污糟，所以小編會推薦以下呢個方法！
落雨乾鞋方法 | 3. 巧妙利用廚房紙
廚房紙同報紙嘅原理都係一樣，不過就會相對嚟講較為乾淨，咁就唔怕會整污糟對鞋啦～就算濕咗都唔會容易變得溶溶爛爛，而且擁有強勁嘅吸濕力！
落雨乾鞋方法 | 4. 乾手機
如果Office或者學校入面嘅廁所有乾手機，大家都可以借用風力嚟幫助風乾鞋嘅水分，效果就好似風筒一樣，不過記得吹嘅時候唔好太近乾手機，大概10分鐘就吹乾～
落雨乾鞋方法 | 5. 用膠袋+風筒
相信好多人只會單單用風筒吹濕咗嘅鞋，但其實只要加以利用一個膠袋，並預留一個小洞，用風筒對住袋口吹，就可以做到烘乾嘅效果。比起用風筒直接吹嘅效果較好，而且吹乾速度都會快好多！不過要記得最好用冷風吹乾，因為用熱風隨時會令鞋變形！
落雨乾鞋方法 | 6. 烘鞋機
如果想徹底解決對鞋濕立立又有臭味嘅問題，就可以買定烘鞋器放喺Office，無論鞋面定喺鞋底都可以同時烘乾，咁就唔怕落去會噏到有味啦～就連濕咗嘅襪都可以烘一烘，真正令你嘅雙腳保持乾爽。
落雨乾鞋方法 | 7. 竹炭防潮包
竹炭防潮包具有消臭除濕嘅效果，可以幫你輕鬆除去異味。不過如果鞋太過濕嘅時候，就建議大家先用咗以上嘅方法，吸乾咗少量水分後先再用竹炭防潮包～
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
