作為最愛主子嘅狗爸媽，當然想為主子準備最好嘅嘢啦。而想狗狗健健康康，狗爸媽們一定要喺狗糧方面入手！市面上嘅狗糧五花八門，淨係乾糧已經有超過100款，好多狗爸媽都未必識揀。如果不慎揀咗劣質飼料，可能會令毛孩缺乏營養、對身體造成傷害！到底主人喺選擇狗糧嘅時候要注意啲咩？邊款先適合你嘅狗狗？等編輯話你知啦。
圖片來源：網絡圖片｜撰文：Tiffany
選擇狗糧 要訣 | 1. 留意製造日期及地點、最佳食用日期
選購狗糧嘅時候，最緊要留意包裝上嘅製造日期。時間越近，就代表飼料越新鮮，咁就當然越好啦！狗糧放得越耐，裡面嘅營養成份會隨時間流失，對狗狗健康唔好㗎。此外，狗爸媽都要留意最佳食用日期，盡量唔好過度囤積狗糧，否則狗糧變質更加得不償失。另外，狗糧如果係本地製造，通常都係一製作好就即刻包裝及銷售。咁就省卻咗運送嘅時間，令狗糧更快、更新鮮咁送到狗爸媽手上！
選擇狗糧 要訣 | 2. 符合營養標準
選購狗糧時，一定要特別留意嗰款狗糧有否符合營養標準。一般而言，只要狗糧包裝上有印有「Complete and Balanced」字樣，就代表佢有足夠嘅營養成份，適合大部份嘅毛孩食用。另外，亦可以睇吓包裝有冇印上符合AAFCO（美國飼料管理協會）、NRC（美國國家科學研究委員會）等標準嘅文字標示，如果有的話，基本上都非常安全。狗爸媽更可以參考美國 Whole Dog Journal 媒體雜誌每年推薦嘅評鑑名單，睇吓邊款寵物飼料能夠入選。Whole Dog Journal 係目前北美最有公信力嘅寵物雜誌之一，更絕不接受贊助及廣告，所以能入選嘅狗糧，品質都會有一定嘅保證。
- （圖片來源：網絡圖片）
選擇狗糧 要訣 | 3. 必選高蛋白質含量
狗糧嘅營養標籤一定會列明佢嘅蛋白質、脂肪、纖維、含水量，而排得越前就代表佔嘅比例越多。蛋白質及脂肪係狗狗嘅最重要營養來源，所以蛋白質越多，狗糧亦越優質。坊間普遍嘅狗糧都有大概20％蛋白質，如果遠低於20%，就最好唔好揀喇。
- （圖片來源：網絡圖片）
選擇狗糧 要訣 | 4. 肉類成份標示清晰
揀狗糧嘅時候，建議選擇有清楚寫明肉類來源嘅品牌，例如寫明係「鹿肉」、「新鮮牛肉」、「肉粉」等，避免揀選只標示「禽肉」、「動物脂肪」嘅飼料。因為當你唔清楚狗糧內所含嘅肉類係來自邊到，好容易會食到唔新鮮、甚至病死嘅動物肉！而含有越多動物性蛋白質嘅狗糧，例如「Chicken」、「Beef」、「Lamb」、「Pork」等無骨嘅新鮮肉類，就代表越好，可以安心俾毛孩食用。另外，狗爸媽亦要特別留意狗糧營養標籤，睇吓狗糧中會唔會有「Meal」（即代表剩肉粉）或「Chicken by-product」（泛指內臟、雞心、雞腳、雞頸等）嘅成份。雖然「Meal」和「by-product」都無損狗狗健康，不過最好都係揀返新鮮肉類啦。
- （圖片來源：網絡圖片）
選擇狗糧 要訣 | 5. 遠離防腐劑及色素
我哋人類揀食物都會盡量避開防腐劑、色素，同樣地，喺選擇飼料俾毛孩嘅時候，都應該要避開呢兩樣嘢。Butylated Hydroxyanisole（BHA）及 Butylated Hydroxytoluene（BHT）係兩種常見於狗糧中嘅防腐劑，而有研究指出，如狗狗長期食用可能會致癌。所以狗爸媽選擇狗糧時，一定要睇清楚狗糧中會唔會有呢兩種成份，減少無謂嘅風險。另外，坊間有唔少商家會喺狗飼料中添加色素、改善飼料嘅外觀，以吸引狗主人購買。但其實色素對狗狗嘅健康係百害而無一利，加上毛孩其實對唔係太分辨到顏色，添加色素實屬不必要之舉！
- （圖片來源：網絡圖片）
各位狗爸媽們，喺選擇狗糧前睇清楚呢五大要訣，慎選餵俾毛孩食嘅飼料，咁就安心得多啦！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
