AI戀愛麵包 | 如果用一種食物去形容戀愛，大家又會揀咩食物呢？不過如果你未拍過拖又點識形容戀愛嘅滋味？最近日本知名麵包舖結合AI技術，推出戀愛口味嘅麵包，究竟會係咩口感呢？好令人好奇！
圖片來源：官方網站 | 撰文：Hedy
無論係扭蛋定係食物，日本成日都會推出一啲超有創意嘅產品，令你意想不到。近日位於東京銀座嘅日本麵包店「木村屋總本店」推出一系列戀AI麵包（恋AIパン），每個都只係¥200，只需要港幣$10就可以食到戀愛口味嘅麵包，仲有5個唔同嘅階段：「命中注定嘅邂逅」、「初次約會」、「呷醋」、「悲傷嘅失戀」以及「兩情相悅」。究竟背後係點研發嘅？
木村屋總本店與日本電氣合作，以AI技術分析中學生戀愛節目以及情歌中所描述嘅水果同甜品等。當中更會對告白及約會等場景，分析出特定嘅情感分數，其後數據化所得嘅資料，便會對應出特定嘅食材。最終設計出5款唔同戀愛階段味道嘅麵包，開賣前更率先畀中學生試吃，甚至有9成人食完之後，都有想戀愛嘅感覺，好神奇！
AI戀愛麵包1. 命中注定嘅邂逅
蘋果嘅香甜就好似命中註定嘅邂逅，你深深咁被對方吸引。配搭餅乾碎，就好似喺心入面一直都會在意對方，感受到被命運捉弄又驚又喜嘅過程。想體驗呢種香甜嘅味道，就要留意喺由4月1至5月31日期間供應！
AI戀愛麵包2. 初次約會
青檸同柿子嘅混合就好似初次拍拖嘅兩人，會對第一次約會感到又興奮同緊張，但隨住慢慢了解大家，彼此都會產生一種淡淡嘅甜味，一種戀愛嘅感覺，就好似橘子皮嘅香味一樣，令你放鬆之餘，又將兩人嘅關係昇華。想感受約會嘅滋味，記得要喺4月1日至5月31日過嚟試試。
AI戀愛麵包3. 呷醋
喺戀愛嘅過程中難免會呷醋，而呢種令人可恨嘅心情，就好似紫薯再加毛豆泥混合嘅感覺。再加上後續松露以及提子乾嘅香味交織埋嘅香氣，帶畀人一種忐忑不安嘅心情，由3月1日至4月30日開賣。
AI戀愛麵包4. 悲傷嘅失戀
當一段感情要結束，就猶如碳酸飲品逐漸失去氣泡嘅時候，不經不覺間就已消失。戀愛中曾品賞到嘅苦與樂，就如蘋果乾以及提子帶畀大家酸甜可口嘅味道，一種令人回想起美好回憶嘅感覺。人生如果想體驗一次悲傷嘅失戀，就可以去試下，只係做到3月31日！
AI戀愛麵包5. 兩情相悅
兩情相悅最浪漫嘅戀情，熱情得猶如火龍果，一對情侶怕醜面紅嘅樣就好似水蜜桃般，互相愈靠愈近。甜蜜嘅愛情包含住香甜可溶嘅蜂蜜，幸福嘅感覺洋溢四周。被滿滿幸福感包圍係咩感覺呢？如果想試就可以由即日起到3月31日去買喇！
【INFO】 《木村屋總本店》恋AIパン 價錢：¥200（約港幣$10） 店鋪地址：https://bit.ly/48aBl1G
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
