萬聖節鬼片2024 | 萬聖節又到喇！大家有冇計劃如何渡過呢個充滿歡樂氣氛嘅節日呢？中意熱鬧嘅你，萬聖節可能會約埋朋友去鬼屋考驗膽量，又或者出街扮鬼扮馬打卡。低調嘅你怕多人，唔想出去同人逼，都可以留喺屋企同屋企人一齊睇恐怖片！今個萬聖節，小編為你網羅10套Netflix和Disney+上映嘅驚嚇懸疑電影及劇集，每套都籠罩恐怖氛圍，挑戰你嘅心臟強度。
圖片來源：官方網站｜撰文：Cynthia
萬聖節鬼片推薦｜1. 開箱靈魂 (It’s What’s Inside)
一班朋友約好聚一聚，希望為婚前派對熱烈慶祝一番。當中有一位不太為人熟悉嘅賓客，帶嚟一個神秘嘅行李箱，令呢群大學好友嘅婚前聚會急轉直下，變成一場考驗心理嘅夢魘，喚起內心深處隱藏已久嘅秘密、欲望同怨氣。 究竟呢個行李箱點樣令人背脊發涼？
【INFO】
《開箱靈魂It's What's Inside》
串流平台：Netflix
萬聖節鬼片推薦｜2. 要命愛上你 (Woman of the hour)
好多人參加感情配對活動都會經常中伏，可能係對方唔靚仔，同自我介紹時交換嘅照片有好大出入。可惜相比起呢套電影，呢啲伏唔算得係咩，因為電影中女主角配對嘅人係一位連環殺手，真係大伏！電影女主角由Anna Kendrick 擔正，演技超班。故事根據70年代一位真實連環殺手而改編，講述佢上電視參加配對節目，成功獲得女主角青睞，期後女方漸漸發覺男方有啲奇怪，慢慢揭開佢兇殘嘅一面。既然內容講到兩性關係，當然要叫埋另一半萬聖節一齊睇啦！
【INFO】
《要命愛上你 Woman of the hour》
串流平台：Netflix
萬聖節鬼片推薦｜3. 迷離闇夜(The Last Night at Tremore Beach)
即使安坐家中，都可以渡過一個暗黑詭譎嘅夜晚。故事主角彼特原本係一位非常出名嘅電影配樂家，離婚失去摯愛後，決定走到愛爾蘭一個靜謐嘅海邊重拾靈感。一切看起來都很美妙，直至一場暴風雨……
【INFO】
《迷離闇夜 The Last Night at Tremore Beach》
串流平台：Netflix
萬聖節鬼片推薦｜4. 地獄公使2 (Hellbound 2)
世上究竟有冇神聖嘅正義呢？萬聖節經常同鬼怪有關，《Hellbound》呢套驚駭片除咗令大家心跳加速，更加用故事形式引導大家思考「好」同「壞」。《地獄公使》由《屍速列車》嘅延尚昊執導，驚嚇度有保證，保證你毛骨悚然！《地獄公使》由劉亞仁、金賢珠、朴正民主演，超自然力量嚟到世界，展開一系列血腥審判，令好多人跌落地獄。另一邊廂，一個鼓吹「神聖審判」概念嘅宗教組織同時借勢崛起。第二季中，新真理教嘅創辦人被判入地獄後復活返回人間，發現新真理教已經強勢支配統治社會。故事中，佢開始思考復活對自己嘅意義，究竟係一種咀咒，定前往真理嘅道路……中意神秘元素嘅觀眾，千祈唔好錯過。
【INFO】
《地獄公使 2 Hellbound 2》
串流平台：Netflix
萬聖節鬼片推薦｜5. 幽靈公館 (Haunted Mansion)
就算冇約朋友去鬼屋玩，都可以睇戲感受鬼影幢幢嘅建築。故事講述開發暗物質相機嘅天體物理學學家班·馬提亞斯（Ben Matthias），喪失妻子後，轉任靈異導遊嘅奇遇。一所鬧鬼聞嘅莊園，經常騷擾附近嘅人，令大家都覺得好不安，更令主角班靈魂出竅。雖然故事設定喺恐怖背景，但當中有不少笑料可以陪大家渡過一個歡樂嘅萬聖節。
【INFO】
《幽靈公館 Haunted Mansion》
串流平台：Disney+
萬聖節鬼片推薦｜6. 雞皮疙瘩(Goosebumps)
想挑戰自己嘅恐怖耐受度？觀賞《雞皮疙瘩》就岩喇。《雞皮疙瘩》係九十年代推出嘅一系列青少年恐怖小說，劇集版就改篇最經典嘅篇章。故事講述主角男孩喺一次偶然下，將奇怪生物帶至現實世界，這些恐怖怪物即將要吞噬寧靜嘅小鎮，男孩同佢嘅鄰居合力將佢哋擊敗，抵抗被毁滅嘅命運。畫面精緻仔細，恐怖氛圍感極重，一定會令你尖叫！
【INFO】
《雞皮疙瘩 Goosebumps》
串流平台：Disney+
萬聖節鬼片推薦｜7. 噬亡村(Gannibal)
鬼片忠粉睇咁多驚悚電影，對恐怖片當然有一定要求，《噬亡村》就一定滿足到你哋口味。故事設定喺虛構嘅日本供花村，警官阿川大悟一開始認為呢度係一個平靜美好嘅村落，但漸漸發生一連串奇怪失蹤事件，令佢大惑不解，逐漸掘出呢個地方黑暗可怕嘅另一面。劇情唔會拖泥帶水，節奏明快，等你留喺屋企都感受到萬聖節嘅神秘氣氛。
【INFO】
《噬亡村 Gannibal》
串流平台：Disney+
萬聖節鬼片推薦｜8. 七夕之國(Tanabata Country)
呢套驚嚇日劇改編自與岩明均同名漫畫嘅《七夕之國》，因此劇集充滿日劇怪誕色彩，相信可以不斷打開觀眾腦洞。細田佳央太飾演主角南丸洋二，每日平平無奇嘅生活間，意外發現自己有可以在任何物件上「穿洞」嘅超能力。面對世界災難，佢嘅超能力可唔可以發揮「無用之用」，拯救眾人跨過嘅個危機呢？
【INFO】
《七夕之國 Tanabata Country》
串流平台：Disney+
萬聖節鬼片推薦｜9. 威尼斯魅影謀殺案(A Haunting in Venice)
沉浸在萬聖夜嘅恐怖氛圍中！當懸疑片加入推理解謎元素，恐怖又撲朔迷離嘅感覺真係令人好興奮。《威尼斯魅影謀殺案》 講述第二次世界大戰過後，名偵探白羅到訪意大利水鄉威尼斯，機緣巧合之下去咗一所古舊皇宮參加一場神秘通靈會，當中更有參加者被殺害。經過佢嘅調查，發現兇手好可能唔係人而係鬼！究竟佢邏輯緊密嘅頭腦，會唔會解釋到呢次神秘案件呢？
【INFO】
《威尼斯魅影謀殺案 A Haunting in Venice》
串流平台：Disney+
萬聖節鬼片推薦｜10. 波士頓絞殺手(Boston Strangler)
由真實罪案改編而成嘅驚慄電影，故事講述有開拓精神嘅記者，點樣抽絲剝繭、深入研究以及報道波士頓絞殺手連環凶殺案。受害者不停增加，佢地都希望真相能盡快水落石出。開場頭幾分鐘，已經令觀眾汗毛直豎。電影詭異地平實，拍攝帶有淒厲感，細膽嘅你又敢唔敢睇呢？
【INFO】
《波士頓絞殺手 Boston Strangler》
串流平台：Disney+
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
