手寫揮春 | 唔知大家又開始準備入手新年唔同嘅用品未呢～除咗辦年貨之外，小編就推薦大家如果平時有買開揮春嘅，就可以體驗吓街邊手寫揮春，呢間店鋪更係新年先會見到～圖案全部都係由一位叔叔親自設計、畫圖再加喺香港印刷，充滿香港情懷之餘，原來背後都相當有意思～即刻入內文睇詳情啦！
圖片授權：Facebook@HONG KONG D | 撰文：Hedy
講到新年又點少得揮春呢～而喺上環嘅一間老店入面，竟然有一檔喺新年前夕先會見到嘅手寫揮春攤檔？除咗一般嘅新年快樂、身體健康之外，香港D創辦人阿金更會撰寫一啲已經逐漸消失嘅揮春字句，例如係千䘵俱臻、百福駢臻、船頭旺相以及滿堂吉慶等，等大家都可以了解更多有關揮春文化，相當有新年氣氛！
手寫揮春 | 由阿金包辦繪畫插圖+設計！
無論係由揮春嘅繪畫插圖、設計同提字等，都係由阿金包辦！揮春以桔紅色為主色，同大家喺街邊買到嘅紅色其實係截然不同，桔紅色有寓意之餘更能增加黑色毛筆字嘅對比度。揮春上面除咗有中文嘅祝福之外，亦寫滿英文字，阿金亦希望藉此拉近外國人了解揮春嘅文化，同時呈現出香港中西融合嘅特質！揮春上面亦有唔同嘅圖案，全部都係阿金喺研究香港新界鄉村和漁村時，所見到嘅一啲寺廟、祠堂和私塾歷史建築嘅圖案。圖案背後同樣都有好多嘅寓意同祝福！
手寫揮春 | 即場寫揮春！
而今次阿金亦都繼續喺上環擁有60幾年歷史嘅雜貨鋪朱榮記擺檔寫揮春！除咗即場寫揮春之外，亦會同大家介紹香港揮春嘅設計歷史同演變，新年記得要嚟體驗吓啦～
【INFO】 《上環手寫揮春攤檔》 日期：2025年1月14至1月28 (農曆十五至年廿九) (1月16休息) 時間：星期六早上11:30至16:00；午膳時間14:00-14:45（星期日休息） *時間或會略有變更，拜訪前記得留意story當天營業時間 價錢：待公布 地點：香港島上環水坑口街24號 朱榮記
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
