巴黎奧運會 | 巴黎奧運會絕對係史上最時尚嘅一屆，除咗賽事跑道變成浪漫薰衣草紫色之外，就連唔同嘅用具都加入咗唯美顏色，獎牌托盤以及獎牌都分別由Louis Vuitton以及Chaumet製作，即刻睇睇有幾高貴！
圖片來源：Instagram@paris2024、LVMH | 撰文：Hedy
巴黎奧運會 | 1. 浪漫薰衣草跑道
大家可能喺過往嘅跑道上都會見到以紅色為主，但今次巴黎奧運嘅主場館法蘭西體育場，將會變成淺紫色以及深紫色，充分展現咗法國優雅嘅一面～淺紫賽道主要用於競賽、跳躍及投擲等項目，深紫就會用於跑道外嘅技術賽事。相比起以前嘅紅色，大家喺電視收睇嘅時候，更能凸顯運動員嘅存在，對大家嘅眼睛亦都會相對舒服～除咗夠美觀之餘，由於跑道係由橡膠製成，對環境影響比較少，同時又可以重複使用。材質亦都有良好嘅抓地力同阻力，有效提升運動員嘅表現，對運動員嚟講都係一件好事！
巴黎奧運會 | 2. 薰衣草色羽毛球
除咗大家可以喺跑道上面睇到薰衣草色之外，就連平時用開嘅運動用品都會出現薰衣草色，原本我哋常見嘅羽毛球都係會以黑色圍邊，而今次就會變成超夢幻嘅紫色，就連羽毛球筒都係紫色！到時大家如果有收睇直播嘅，絕對會發現～
巴黎奧運會 | 3. 彩色接力棒
除咗薰衣草色羽毛球之外，亦有七彩顏色嘅接力棒，當中包括紅色、黃色、綠色、藍色、紫色以及灰色等，每支接力棒都加入咗漸變色嘅元素，鮮豔得嚟又令觀眾睇得賞心悅目。接力棒上亦有數字，咁就唔怕會撈亂～
巴黎奧運會 | 4. 欖球
大家通常都會見到啡色嘅欖球，而今次巴黎奧運嘅欖球將會以夢幻嘅薰衣草色為主調，再加上粉藍色嘅設計，簡直就係大家夢寐以求嘅配色！再加上粉色嘅圓圈及線條點綴，令成個設計昇華咗一樣，就算平時冇玩開欖球都好想收藏！
巴黎奧運會 | 5. 攀石運動場
2020東京奧運首次舉辦攀石運動項目，而今年嘅攀石項目都絕對係備受矚目嘅焦點之一！勒布爾歇攀岩館將會以湖水綠色為主調，並加以藍色、綠色以及粉紅色作點綴，顏色相當夢幻～攀岩牆亦設有頂棚，咁就可以防止落雨或者太陽曬住嘅情況出現，對運動員嚟講都可以較能發揮自己嘅實力！
巴黎奧運會 | 6. 足球以及籃球
足球同樣都採用咗湖水綠色以及粉色為主調，再加上漸變嘅設計，絕對可以帶畀大家夏天嘅感覺！而喺籃球設計上就採用具有光澤感嘅啡色以及白色，印製本屆奧運標誌外，亦都加入咗特別設計嘅運動圖案，好有意義！
巴黎奧運會 | 7. 絕美獎牌
今年巴黎奧運嘅獎牌由法國珠寶品牌Chaumet製作，華麗感十足！為咗可以令獲獎嘅選手留低更多關於法國嘅回憶，獎牌正面以中央六邊形金屬搭配光芒四射嘅刻面，而每塊獎牌都鑲嵌咗一細塊嚟自艾菲爾鐵塔嘅金屬，呢啲金屬喺當時維修嘅時候所保留嘅，相當珍貴！將法國同巴黎標誌性嘅建築艾菲爾鐵塔結，同獎牌合埋一齊，意義非凡。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
