你係唔係飲牛奶會肚痛嘅人？如果你有乳糖不耐症，可能會轉飲植物奶。近年越來越多人飲植物奶，以代替奶類製品，例如杏仁奶、燕麥奶、豆奶等等。但到底植物奶嘅營養價值有幾高？係咪真係取代到傳統奶類？如果你有以上嘅疑問，可以參考消委會最近嘅植物奶評測，報告發現有6款植物奶係屬於高蛋白質類食物。小編更會附上19款獲得4星或以上評分嘅推薦產品，即刻睇內文啦！
圖片來源：消費者委員會、網上圖片
消委會最近檢測市面上39款植物奶，評估產品含有嘅營養價值同食用安全，當中包括7款杏仁奶、5款椰子奶、5款米奶、10款燕麥奶、12款豆奶。報告發現39個樣本中，有6款豆奶達到高蛋白質食物嘅定義，而豆奶嘅平均蛋白質含量更加冠絕植物奶，與低脂奶相近！而39款當中有19款獲消委會評為4分或以上，推薦植物奶愛好者飲用。
消委會植物奶評測｜豆奶蛋白質含量第一 更勝低脂奶！
關注蛋白質攝取量嘅各位，要留意啦！如果想透過飲用植物奶，吸收到同傳統奶類相若、甚至更高嘅營養，豆奶可能會係你嘅選擇。根據消委會評測報告顯示，豆奶平均蛋白質含量係五類植物奶當中最高，每100毫升就有3.26克蛋白質，唔會比低脂奶差！
12款豆奶樣本入面，有6款達到「高蛋白質食物」嘅定義，包括「Kikkoman」、「Maeil」、「維他奶」、「統洋」、「豆腐主義」及「壹品」，產品每100毫升蛋白質含量為2.21克至4.92克不等。
而有6款豆奶蛋白質含量則比低脂奶高，包括「Kikkoman」、「日昇」、「百福」、「維記」、「Maeil」及「維他奶」，每100毫升蛋白質含量由3.40克至4.92克。
消委會植物奶評測｜4款植物奶鈣質低！飲3.6杯先等於1杯低脂奶
好多人飲奶、特別係傳統奶製品都係為咗補鈣，但原來市面上嘅植物奶，鈣質含量頗為參差，想透過飲奶攝取鈣質嘅消費者就要留意。39款植物奶樣本當中，雖然有16款達「高鈣」定義，包括4款杏仁奶、5款椰子奶、1款米奶、4款燕麥奶、2款豆奶，但同時有4款嘅鈣質含量少過低脂奶一半！包括「固力果」、「藍鑽石」、「UFC」及「Mighty」，每100毫升嘅鈣含量只有23.92毫克至51.17毫克。以「固力果」為例，要飲約3.6杯，先會攝取到與飲1杯低脂奶相若嘅鈣質。而有23款植物奶係無標示加鈣，其每100毫升嘅鈣含量更低至2.55毫克，遠低於低脂奶水平！
消委會植物奶評測｜維他命含量又如何？
除咗蛋白質、鈣質之外，植物奶中嘅維他命B2及維他命D含量又夠唔夠呢？喺維他命B2方面，2款燕麥奶（「Havredals」及「Dirty Clean Food」）嘅維他命B2含量係與低脂奶相若。而有2款杏仁奶（「Topvalu」及「固力果」）雖然達「高維他命B2」定義，但其每100毫升嘅含量分別只有0.032毫克及0.028毫克，遠低於低脂奶維他命B2含量（約0.185毫克）！至於維他命D，「Woolworths」、「Topvalu」、「Alpro」、「Havredals」及「Mighty」都達到「高維他命D」定義，每100毫升嘅維他命D含量由0.248微克至0.865微克，表現不錯。
消委會植物奶評測｜39款植物奶 評分逐個睇！
4.5分：
- 杏仁奶｜Woolworths Unsweetened Almond Milk｜產地：澳洲
- 杏仁奶｜Califia Farms Almond Milk – Barista Blend｜產地：美國
- 杏仁奶｜Topvalu Almond Milk Sugar-Free｜產地：日本
- 燕麥奶｜Havredals Oat Milk – Barista Edition｜產地：瑞典
- 豆奶｜Kikkoman Soymilk Unsweetened｜產地：日本
- 豆奶｜日昇 Sunrise 原味豆漿皇｜產地：加拿大
4分：
- 杏仁奶｜固力果 Glico Almond Drink Sugar Free｜產地：日本
- 米奶｜Pure Harvest 有機米漿｜產地：澳洲
- 燕麥奶｜Mighty M.lkology Barista Ultimate Oat M.lk｜產地：英國
- 燕麥奶｜Oatsome Organic Oat Drink – Barista (No Added Sugar)｜產地：意大利
- 燕麥奶｜Oatside 職人燕麥植物奶｜產地：印尼
- 燕麥奶｜Amandin 有機無添加糖全素低脂低鹽高鈣燕麥奶｜產地：西班牙
- 燕麥奶｜OATLY Organic Oat Milk｜產地：瑞典
- 燕麥奶｜Kagome Oat Milk｜產地：日本
- 豆奶｜百福 Pak Fook 高鈣香滑鮮豆漿｜產地：香港
- 豆奶｜維記 Kowloon Dairy 特濃鮮豆漿｜產地：中國
- 豆奶｜Maeil Soy Milk Black Soybean｜產地：韓國
- 豆奶｜美心西餅 Maxim’s 低糖豆漿｜產地：香港
- 豆奶｜維他奶 Vitasoy 山水低糖鮮黑鮮豆漿｜產地：香港
3.5分：
- 杏仁奶｜丸山 Marusan Roasted Almond Drink Original｜產地：日本
- 杏仁奶｜藍鑽石 BLUE DIAMOND Almond Breeze (Original)｜產地：美國
- 椰子奶｜Alpro Coconut Drink With Rice And Added Calcium And Vitamins
- 椰子奶｜UFC Velvet Coconut Milk Drink – Unsweetened｜產地：泰國
- 椰子奶｜Dream Coconut Drink Unsweetened｜產地：美國
- 椰子奶｜Coles 有機純素無糖椰子奶｜產地：澳洲
- 椰子奶｜馬莎 M&S UHT Coconut Drink with Added Calcium, Iodine, Vitamin B12 and Vitamin D｜產地：英國
- 米奶｜熊津 Woongjin 米漿 Morning Sunshine Rice Drink｜產地：韓國
- 米奶｜Happy 米奶 Rice Drink｜產地：奧地利
- 米奶｜RICEPATHY Black Rice Milk &｜產地：意大利
- 米奶｜Rude Health Brown Rice Drink Organic｜產地：英國
- 燕麥奶｜Dirty Clean Food Organic Oat Milk｜產地：意大利
- 燕麥奶｜Minor Figures Barista Oat Drink – Organic｜產地：澳洲
- 燕麥奶｜Isola BIO Organic Oat Drink – Organic Flavour｜產地：意大利
- 豆奶｜統洋 TOPMOST 有機黑豆漿｜產地：台灣
- 豆奶｜大和 Tai Wo 低糖豆漿｜產地：台灣
- 豆奶｜蛋撻王 King Bakery 鮮豆漿｜產地：香港
- 豆奶｜豆腐主義 Tofulism 有機黃豆無糖豆漿｜產地：香港
3分：
- 豆奶｜壹品 topsoya 無添加糖豆漿｜產地：香港
2.5分：
- 杏仁奶｜137°C degrees Almond Milk Unsweetened｜產地：泰國
消委會植物奶評測｜植物奶知多啲！
植物奶小知識 – 1. 植物奶可以代替牛奶 / 傳統奶製品？
一般奶製品含豐富嘅蛋白質、鈣質、維他命A、B2、D等等，無論係發育中嘅兒童或青少年，還是成人及長者，都應該要每日攝取。而多種植物奶當中，豆奶嘅蛋白質平均含量係最高，並與低脂奶接近，加上大豆嘅蛋白質係「完全蛋白質」，含有9種必需胺基酸。但其餘4款植物奶嘅蛋白質係「不完全蛋白質」，當中椰子奶、米奶嘅蛋白質平均含量係最低，未必滿足到日常嘅蛋白質攝取量需要。加上普遍無添加鈣質、維他命B2、維他命D作營養增強嘅植物奶，營養含量比低脂奶低好多！就算係添加咗鈣質嘅植物奶，鈣含量亦非常參差，所以消費者喺選購之前，記得要睇清楚營養標籤！
植物奶小知識 – 2. 植物奶有冇致敏風險？
絕對有！大豆、杏仁、麩質等堅果類係好常見嘅致敏原，亦係植物奶嘅主要成份。消費者如果對呢啲食物過敏，記得喺選購前睇清楚營養標籤上嘅成份列表、致敏原提示。
植物奶小知識 – 3. 嬰幼兒可唔可以飲植物奶代替奶類？
嬰幼兒必須透過母乳或配方奶，吸收成長中嘅必要營養。就算係患有乳糖不耐症嘅嬰幼兒，爸爸媽媽都應該要先諮詢醫生嘅建議，千祈唔好自行以植物奶取代奶類！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
