日本預言 | 暑假絕對係旅遊旺季，唔少人都會選擇去日本玩，而日本當局已經向日本部分地區發出巨大地震預警，大家都特別注意安全，小心地震以及海嘯！日本地震亦令唔少網民諗起日本漫畫家Tatsuki《我所看到的未來》嘅預言，當中更曾命中311日本大地震以及新冠疫情，據Tatsuki預測下一波災難將會喺呢個時候波及香港？
圖片來源：amazonjapan、網上圖片 | 撰文：Hedy
日本漫畫家竜樹諒（Tatsuki）曾聲稱夢到預知夢，更將自己所睇到嘅夢境畫成咗漫畫，並於1999年發表《我所看到的未來》，夢見包括皇后合唱團主唱Freddie Mercury病逝、英國黛安娜王妃逝世、日本311地震等。當時漫畫推出時嘅銷售並唔係咁好，但竟然係2011日本地震後爆紅，甚至喺二手市場被炒至高達18萬日圓？Tatsuki喺1999年隱退之後，有唔少人都冒認為本人，所以Tatsuki就喺2021年重新推出完全版《我所看見的未來》，當中入面有唔少預言成真？下一波大規模災難將會波及日本、台灣、香港同菲律賓？
為何紀錄預知夢？
Tatsuki本來並冇紀錄預知夢嘅習慣，反而係喺1989年8月27日，夢到了一個類似防空洞嘅場景，仲見到一名陌生嘅女子出現。其後某一日佢想去橫濱一個公園散步，行行下竟然發現當初與夢境相似嘅洞，有一日睇到新聞嘅時候，稱喺呢個公園附近嘅洞入面發現一名女子嘅屍體，該女子嘅衣服特徵同佢夢到嘅幾乎一樣！所以佢就開始紀錄低自己嘅預知夢，並會喺枕頭隔離擺放筆記簿，等自己醒嘅時候紀錄低，就連發夢嘅日期都會寫低。
預知夢有甚麼規律？
除咗會喺夢入面具體睇到未來所發生嘅景象之外，Tatsuki有時候都會喺夢入面睇到一啲象徵信息，就連佢本人都未必解讀到當中係咩意思。喺預知夢入面可能會預測到事件具體所發生嘅時間，如果冇確切嘅日期嘅話，就會以5年嘅倍數以及15年嘅倍數成真。就以英國黛安娜王妃逝世為例，Tatsuki喺1992年8月31日夢到，而黛安娜王妃就係5年後（1997年8月31日）逝世。而值得一提嘅係，Tatsuki喺2021年重新推出完全版《我所看見的未來》，確切咁見到2025年7月呢個時間會發生災難，大家都可以參考吓～
預知夢成真？
由於Tatsuki嘅預知夢除咗有預言唔同大事之外，亦都有一啲係貼近自己生活以及周邊所發生嘅事，所以呢方面就未能判斷係咪成真，不過就有以下幾個預知夢已經成真！
-
皇后樂隊主唱Freddie Mercury因傳染病而死（1976年發夢/1986年再發夢/1991年成真）
Tatsuki喺1976年喺夢入面睇電視新聞，見到皇后樂隊嘅主唱Freddie Mercury因為某種傳染病而死。而喺呢個夢嘅10年後，1986年11月28日佢又再次見到皇后樂隊，所有隊員除咗主唱都喺齊到，而主唱卻已經變成咗銅像。而喺呢個夢嘅5年後，Freddie Mercury於1991年11月24日，因為愛滋病引發肺癌離世。
-
黛安娜王妃逝世（1992年發夢/1997年成真）
1992年8月31日，Tatsuki夢到英國黛安娜王妃抱小朋友嘅相，而喺5年後黛安娜王妃喺1997年8月31日因車禍離世。
-
阪神大地震（1995年發夢/15日後成真）
1995年1月2日，佢夢到神戶嘅大地裂開，感覺就似係地震，而喺15日後就已經發生7.3級阪神淡路大地震，大家都認為佢係預言呢次大地震。不過Tatsuki喺2021年重新推出完全版《我所看見的未來》就講到，天災仍未發生，有機會喺2025先來臨。
-
Tatsuki封筆（1995年發夢/2000年成真）
同樣喺1995年1月2日，Tatsuki夢到自己將會封筆而且退出漫畫界。而Tatsuki喺漫畫《我所看到的未來》發行後嘅下一年，即2000年就已經封筆。
-
311日本地震（1996年發夢/2011年成真）
當時Tatsuki喺1996年3月11日發夢，並夢到將會喺2011年3月某個日期發生大災難，而呢件事大家都可以喺漫畫封面上見到寫下「大災難2011年3月」。而喺15年後，相信大家都記得日本喺2011年3月11日，日本東北部發生規模9.0嘅地震，共造成1.59萬人死亡。而發生今次災難後，Tatsuki《我所看到的未來》嘅漫畫都因為咁而大賣。
2026年將有大災難？
除咗以上已經成真嘅語言，Tatsuki其實喺1999年7月5日發過一個超恐怖嘅夢，佢夢見自己喺空中，睇到日本同菲律賓之間嘅海上發生咗一個巨大嘅爆炸，湧出大量嘅岩漿噴射到天空中，引發巨大海嘯，海峽巨浪高達上百米，由於當時見到日本人穿著短袖，所以推測發生日期為夏天。而喺2021年7月5日，Tatsuki再次夢到相同嘅內容，一片陸地從海底升起，將日本、台灣、香港和菲律賓等地區陸地連接埋一齊，夢入面更明確指出2025年7月呢個日期，日本約有1/4被吞沒，規模超越311大地震，有機會係下一場大型災難？
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
