動漫節2024 | 動漫節2024懶人包！即睇價錢+5大購票方法、必買mofusand福袋+chiikawa！

動漫節2024 | 動漫迷期待已久嘅動漫節將會喺今年7月26日至7月30日舉行，今年有超過650個展位數量，大家更可以喺度帶走mofusand、chiikawa、葬送的芙莉蓮以及怪獸8號等產品，即刻睇睇點入場同有咩值得買！

圖片來源：Facebook@香港動漫電玩節 | 撰文：Hedy

第二十五屆香港動漫電玩節2024將會由7月26日至7月30日，一連5日喺香港會議展覽中心一號展覽廳舉行。平時如果有去開動漫節嘅大家要留意，今年不設現場售票，所以有興趣入場嘅大家都可以預先透過ACGHK app、01空間以及bilibili購票。想保留實體門票嘅話，就可以到指定7-11便利店及OK便利店購買，呢度只可以畀大家購買一般門票。

動漫節2024 | 門票價錢：

• 小童門票（3歲至11歲） $20

3歲以下嘅小童可以免費入場，而3歲至11歲嘅小童就需要購買小童門票，售價為$20。每位持小童票人士最多可由2位持票成年人陪同經1B通道入場。

• 一般門票（12歲或以上） $42

12歲或以上嘅人士都需要購買一般門票，持票之親子/長者（60歲以上）/旅客/傷健人士出示有效之證明文件，可經1B通道入場。

• 潮巨匠「玩具放暑假」閃咭珍藏門票 $150

大家只要購買後，就會隨門票贈送潮巨匠「玩具放暑假」閃咭乙包及$30潮巨匠現金券乙張，可以經1B特快通道入場。

• 3回特快入場券 $300

3回特快入場券適合有興趣多次入場嘅人士使用，每人限購2套。每套包含3張門票，每票只限1人使用，可經1B特快通道入場。

動漫節2024 | 免費進入Hall 3BC CosParadise

今年CosParadise設於Hall 3B及3C兩個場館，主辦方希望能夠透過加大場地去改善上年過度擠擁以致阻塞通道嘅情況，更設有Cosplay登記證$20以及攝影師通行證$80，而有關登記證或通行證已經售完，不過如果大家都想感受同欣賞Cosplay文化，大會都會實施人流分配入場，每個鐘將會釋出2,000個名額畀持有Hall 1嘅持票人士登記，即刻睇睇點登記！

• 經7-11/OK便利店/01空間/bilibili購票、實體贈票、實體VIP門票：

1. 先登記ACGHK App，成為會員
2. 進入ACGHK (Hall 1)會場，於場內指定位置掃瞄QR Code (每小時更新)
3. 進入登記頁面後，填寫實體門票號碼 / 現場優惠券號碼 (優惠券只適用於01空間/bilibili)
4. 成功登記CosParadise (Hall 3BC) 電子門票的觀眾，可按電子門票上指定時間進入Hall 3BC CosParadise，逾時無效
5. 進入CosParadise (Hall 3BC) 時須出示已登記之實體門票 / 現場優惠券 (優惠券只適用於01空間/bilibili) 作入場檢查

• 經ACGHK App購票：

1. 進入香港動漫電玩節Hall 1會場後，可於ACGHK App內登記CosParadise (Hall 3BC)免費門票
2. 成功登記CosParadise (Hall 3BC) 電子門票的觀眾，可按電子門票上指定時間進入Hall 3BC CosParadise，逾時無效

動漫節2024 | Cosplayer免費出入Hall 1門票

只要喺7月30日下午3點起，Cosplayer(不限持有嘅門票種類)自行完成成個Cosplay造型後，到CosParadise嘅Cosplayer更衣室登記處出示角色圖片(手機或紙本均可)，經工作人員簡單審核後，即可取得Cosplay Together入場手帶，免費岀入Hall 1動漫節主場館！名額3000個，先到先得，毋需事先登記。

動漫節2024 | 搶先睇有咩買！

相信各位動漫迷都已經好心急想入手限量版figure以及模型等等，即刻睇睇今年有咩參展商參加，仲有啲咩值得買？

• 木棉花（B36）

木棉花今年將會展出過百款人氣動畫周邊，當中包括人氣爆紅嘅芙莉蓮，首次登陸香港動漫節！必買8套人氣動畫福袋，包括《葬送的芙莉蓮》﹑《莉可麗絲》﹑《間諜家家酒》《關於我轉生變成史萊姆這檔事Ⅱ》﹑《進擊的巨人》﹑《無職轉生～到了異世界就拿出真本事～》﹑《刀劍神域ProgressiveⅡ》以及《86–不存在的戰區–》等，價錢由$340至$390不等～

+5

• BANDAIHOBBY（C02）

BANDAIHOBBY 首度喺港展出多款最新高達及其他動漫角色組裝模型，「CHOGOKIN」迎來誕生50周年，會場更會展出多款超合金商品和試作品，亦會發售3款紀念商品，當中包括超合金魂 GX105G 鐵甲萬能俠超合金50週年版、METAL BUILD EVA-01 初號機超合金50週年版以及METAL ROBOT魂 零式飛翼高達超合金50週年版。

+0

• SUNRISEPOP（A03&A15）

本地玩具品牌「SUNRISEPOP」將攜5大人氣動畫 《怪獸8號》、《咒術迴戰》、《藍色監獄》、《鏈鋸人》同《間諜家家酒》自家商品 。當中人氣大熱《怪獸8號》動畫商品將首都亮相，全新 《咒術迴戰》系列周邊都會喺現場販售！

+1

• Soap Studio（C33）

Soap Studio今年繼續為大家帶嚟多款迪士尼﹑華納和燦子新品，當中更有會場限定商品，兩款燦子紫色寶寶同野豬造型人偶，仲有金色三眼仔求籤筒！

+1

• NIKO-NIKO（C19）

NIKO-NIKO首次登陸2024香港動漫節，帶埋日本兩大人氣角色mofusand及chiikawa一齊亮相，只需要$380就買到mofusand福袋，入面仲要有8件貨品，大家打開嘅時候都會充滿驚喜！會場亦有人氣小可愛「chiikawa麻薯公仔系列」會場限定優惠！

• GC（C25）

香港動漫周邊品牌GC 將攜「 機動戰士高達 0079」以及「幪面超人」新品亮相本屆動漫節！除咗有會場首發T-shirt「 機動戰士高達 0079系列」，仲有埋紅彗星自動長遮。平時有玩開麻雀就絕對要入手埋由日本授權本土設計嘅廣東麻雀！同場亦有幪面超人T-shirt，有1號同亞馬遜之外，仲有會場首發V3同Black！

+2

【INFO】
第25屆香港動漫電玩節
日期︰2024年7月26日至7月30日(星期五至星期二)
時間︰每日10:00至21:00 (7月30日20:00閉館)
地點︰香港會議展覽中心一號展覽廳
門票售價：$20 (小童門票) / $42 (一般門票) / $150 (潮巨匠「玩具放暑假」閃咭珍藏門票) / $300 (3回特快入場券)

——————————————————

Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk