香港動漫電玩節在7月28日開鑼，重點活動之一的「動漫Cosplay大賽」在昨日（30日）舉行。大會事前已經宣布邀請了演藝界大前輩謝雪心做頒獎嘉賓，仲會以Cosplay形式出場。想不到在活動當日，71歲的心姐竟然反串遊戲《原神》入面的男角色「達達利亞」，引起台下哄動！
圖片來源：香港動漫電玩節、Facebook@原神｜撰文：Angela
心姐戴上橙色假髮，拎起「武器」，以一身「達達利亞」造型登場，台下即刻響起一片掌聲及尖叫聲。身為粵劇紅人的心姐，就算在這個動漫舞台上都不忘表現粵劇功架。她專門為今次上台設計了一套「英雄救美」的戲碼，一邊口咬玫瑰花，一邊揮舞手上的長槍，架勢十足又不失玩味。之後她頒獎給Cosplay大賽參賽者時仍然表現鬼馬，不少參賽者上前熱情抱抱，她都無任歡迎，仲拎起「田中脊髓劍」大玩互動，認真搞笑。
+1
因為尊重場合所以自薦Cosplay
玩開粵劇的心姐，今次突然轉換舞台玩Cosplay，強烈反差令人驚喜，好多網民都讚她「玩得好放」、「心境好年輕」、「咁嘅年紀都願意接受新事物，好正」。心姐之後接受訪問時就話，當初獲邀出席活動時只是做頒獎嘉賓，但她認為既然來到Cosplay舞台就要想花點心思，所以先向大會自薦Cosplay，仲話「既然有得玩當然要試吓」。為了準備今次上台，她在1個月前已經度身訂造服裝，仲要戒食雪糕保持身型，又特地去了解「達達利亞」的角色故事同性格。雖然是初體驗，不過心姐已經有點上癮，希望明年再有機會可以再玩。
