動漫推薦2024 | 平時有追開動漫嘅大家，絕對唔可以錯過2024年超精彩嘅動漫同劇場版，當中《我推的孩子》更推出第二季，就連《鬼滅之刃》都有新一季，即刻睇睇有咩動漫值得睇！
圖片來源：X@BLUELOCK_PR、@heroaca_anime、@kimetsu_off、@kimitodo_pr、anime_oshinoko| 撰文：Hedy
動漫推薦2024 | 1. 《排球少年!! 垃圾場的決戰》
人氣動畫《排球少年》劇場版《排球少年!! 垃圾場的決戰》將會喺4月11號於香港上映，相信大家都超期待！故事延續動畫第四季之後嘅故事，烏野高中擊敗全國大賽第二輪勁敵稻荷崎高中後，又將會再次面對佢哋嘅宿敵音駒高中。雖然兩隊球隊成日都會喺練習賽入面對戰，但從來都未試過喺全國錦標賽中正式交鋒！兩隊將會拚盡全力，打出超精彩嘅對戰！未上映之前不妨先睇睇預告片～
【INFO】 《排球少年!! 垃圾場的決戰》 上映日期：4月11日
動漫推薦2024 | 2. 《名偵探柯南：100萬美元的五稜星》
《名偵探柯南》系列第 27 部劇場版《名偵探柯南：100 萬美元的五稜星》將會喺4月12號喺日本正式上映，暫時香港都未公布上映時間。故事描述北海道當地嘅斧江財閥收到嚟自怪盜基德嘅預告信，怪盜基德今次將目標鎖定為與「土方歲三」有關連嘅一把日本刀。而服部平次同柯南一班人都咁啱嚟到北海道函館睇劍道大會嘅比賽，喺途中竟然發現一具胸部被劃上十字傷口嘅屍體，仲有一名被稱為「死亡商人」嘅日裔美國人？
【INFO】 《名偵探柯南：100萬美元的五稜星》 上映日期：4月12日（日本）
動漫推薦2024 | 3.《藍色監獄-EPIOSODE 凪–》
日本足球漫畫《藍色監獄BLUE LOCK》推出全新劇場版《藍色監獄-EPIOSODE 凪-》，講述凪誠士郎同御影玲王喺學校相遇嘅故事，將以呢兩位超受歡迎嘅角色為主，呈現兩人喺藍色監獄前同後嘅足球冒險。劇場版主題曲《Stormy》由SKY-HI和Nissy聯手獻唱，預計會喺4月19日喺日本上映。
【INFO】
《藍色監獄-EPIOSODE 凪-》
上映日期：4月19日（日本）
動漫推薦2024 | 4.《黑執事 寄宿學校篇》
《黑執事》睽違將近 10 年嘅電視動畫新作《黑執事 寄宿學校篇》將會喺今年4月13日開播。故事由女王寄嚟嘅一封信開始，謝爾和賽巴斯欽為咗調查消失嘅學生，將分別以新生和舍監的身份潛入學校調查。
【INFO】 《黑執事 寄宿學校篇》 上映日期：4月13日
動漫推薦2024 | 5.《我的英雄學院》第7季
唔少動漫迷最期待嘅《我的英雄學院》，將會喺5月4日開播第7季！，新一季嘅故事將會圍繞主角綠谷出久與反派死柄木弔兩條故事線，職業英雄亦都會同敵人邁入最終對決。大家亦都會喺呢一季睇到有關「星條旗」角色嘅故事～
【INFO】 《我的英雄學院》第7季 上映日期：5月4日
動漫推薦2024 | 6.《鬼滅之刃柱訓練篇》
《鬼滅之刃》嘅第四季為《鬼滅之刃柱訓練篇》，將會喺今年5月開播，首集更會係一個鐘！新一句講述炭治郎等人為咗變強，接受鬼殺隊最強的「柱」們訓練嘅故事。片頭曲更由MY FIRST STORY 與 HYDE 合作演唱「夢幻」。
【INFO】
《鬼滅之刃柱訓練篇》
上映日期：5月12日
動漫推薦2024 | 7.《只想告訴你》第3季
時隔12年終於宣布！日本漫畫家椎名輕穗作品《只想告訴你》第3季將會喺2024年入面喺Netflix上映。故事講述女主角黑沼爽子，因為留住黑色長髮，再加上不善於同人交流，卻被同學戲稱「貞子」。而班上面只有「風早翔太」會搵佢傾計，慢慢喺佢同其他同學嘅幫助下改變自己，逐漸收穫愛情同友情！
【INFO】
《只想告訴你》第3季
上映日期：2024年
動漫推薦2024 | 8.《我推的孩子》第二季
日本超人氣動畫《我推的孩子》將會係2024年推出第二季動畫，喺全新嘅視覺圖入面睇到黑川茜、有馬佳奈和阿奎亞三人共同現身！相信今季將會有助解開母親星野愛死去嘅原因？
【INFO】
《我推的孩子》第二季
上映日期：2024年
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
