近年香港人對烘焙嘅追求越嚟越高，除咗法式牛角包同日式吐司，充滿煙韌嚼勁嘅Bagel都慢慢成為大家嘅新寵兒！呢種源自歐美嘅麵包，無論配鹹餡定甜餡都一樣咁夾，早餐食個Bagel配咖啡，又或者下晝茶點食個搞鬼口味，都一樣咁滿足。今次，我哋為大家搜羅咗香港多間各有特色嘅Bagel店，有紐約經典風、日式湯種Bagel、創新口味以至健康之選，齊齊投入呢股Bagel熱潮啦！
圖片來源：Facebook@Mendel’s Delicatesse、@Dear Coffee & BakeryOpenrice、@Schragels、@apb7d2h9cmqb、@Crystalwingn 、@JanlyJudy | 撰文：Ginger
Bagel店推介 | 1. Mendel‘s delicatessen
如果你係美式Bagel嘅忠實擁躉，Mendel’s Delicatessen 絕對會啱你心水！呢間位於堅尼地城嘅小店，走嘅係型格紐約風路線，坐喺戶外位一邊嘆咖啡一邊睇街景，真係Chill到爆，打卡都一流！佢哋嘅Bagel質感非常實在，但又能夠保持煙韌嘅口感，咬落去有嚼勁得嚟又唔會硬邦邦。招牌House smoked salmon bagel 有厚厚嘅煙三文魚，最特別係煙三文魚竟然係自家製嘅，食得出佢哋對食材嘅用心。
【INFO】
《Mendel‘s delicatessen》
地址: 西環堅尼地城吉席街66號地舖
營業時間: 星期一至日 08:00 - 16:00
Bagel店推介 | 2. MONO Lab
講到Bagel，點少得中環SOHO區呢間充滿創意嘅西式咖啡店 MONO Lab 呢！佢哋最出名就係將意大利經典甜點同紐約風格嘅Bagelcrossover，特別係佢哋嘅提拉米蘇貝果系列，招牌金莎Tiramisu Bagel，面層鋪滿咗Mascarpone cheese同可可粉，一切開，中間仲有微微流心嘅朱古力醬同金莎，口感豐富。如果你係抹茶控，都唔可以錯過佢哋嘅Matcha Tiramisu Bagel，抹茶嘅清香同提拉米蘇嘅甜味平衡得恰到好處。除咗Bagel，佢哋嘅咖啡都好出色，好似Hojicha Latte咁，烘焙茶香同奶泡嘅順滑簡直係絕配。
【INFO】
《MONO Lab》
地址: 中環蘇豪荷李活道31-33號7樓
營業時間: 星期一至五 10:00 - 02:00；星期六至日 10:00 - 04:00
Bagel店推介 | 3. Bagel Gogo
如果你係Bagel控，又鍾意多選擇嘅話，紅磡呢間 Bagel Gogo 絕對係你嘅天堂！無論鹹味定甜味嘅Bagel，佢哋都做得好出色，店內最受歡迎嘅一定係佢哋嘅芋泥肉鬆麻糬Bagel，口感同味道都好有驚喜。如果你偏愛鹹味，Bagel Gogo 都有好多選擇，例如泡菜肥牛芝士、煙鴨胸配焦糖洋蔥同埋厚切雞扒菠蘿等，每一款都充滿創意，而且份量十足，食落超滿足。
【INFO】
《Bagel Gogo》
地址: 紅磡崇志街35號地舖
營業時間: 星期一至五 09:30 - 19:00；星期六至日 10:00 - 19:00
Bagel店推介 | 4. Bagels Alley
想食得健康啲，中環Bagels Alley係個唔錯嘅選擇！佢哋主打紐約風貝果麵包，特別標榜無油、少糖同無防腐劑，所以口感會相對更煙韌同硬身，食落更健康輕盈。店內嘅 Bagel 包款同餡料選擇都好豐富，可以揀唔同嘅烘烤程度，想食暖暖地又帶點脆口嘅效果。招牌嘅煙燻牛肉原味貝果，入面有幾塊大大嘅煙燻牛肉，煙燻味濃郁得嚟又唔會太鹹，配埋黃芥辣、酸瓜、番茄、瑞士芝士、火箭菜同忌廉芝士，餡料超豐富。
【INFO】
《Bagels Alley》
地址: 中環租庇利街1號喜訊大廈地下A1號舖
營業時間: 星期一至六 08:00 - 17:00；星期日 08:00 - 14:00
Bagel店推介 | 5. Dear Coffee & Bakery
DEAR Coffee & Bakery 從一間麵包咖啡店起家，專注於研發創新配搭嘅手工麵包同製作精品咖啡。近年佢哋更開設自家工場主力生產日式貝果，除咗批發供應俾合作夥伴，仲開放網上訂購急凍貝果，希望從多個途徑，將佢哋嘅品牌同有溫度嘅手工麵包帶俾更多人認識。佢哋嘅「啲牙貝果」係經過反覆研發同改良配方嘅成果，有別於傳統紐約貝果紮實嘅口感，Dear Coffee & Bakery 嘅Bagel風格偏向日式湯種貝果。呢種貝果外皮韌性高，拉扯感強，包體質地柔韌有彈性得嚟又唔會失水份，口感綿密有嚼勁，非常獨特。佢哋製作嘅手工貝果都係天然無添加，採用純天然食材取代速成添加物，經過較長嘅發酵工序，令貝果比一般麵包更易消化，負擔較低，食落更健康有營養。
【INFO】
《Dear Coffee & Bakery》
Baking Studio (荔枝角)
地址: 荔枝角永康街29-33號兆威工業大廈401室 (不對外開放，落單頁面預約取貨)
時間: 11:00 - 19:00（星期一至六，需預約取貨）
Coffee Shop (大圍)
地址: 大圍田心街20號雲疊花園商場地下7號舖 (不設取貨)
時間: 10:00 - 18:00（星期一至日）
Bagel店推介 | 6. Schragels
講起紐約風格嘅Bagel，上環呢間有十年歷史嘅小店 Schragels 絕對係不得不提！佢哋嘅家族食譜源自1950年代紐約猶太熟食店，可以話係將最地道嘅紐約Bagel風味帶到香港。對於食過大量美式Bagel嘅人嚟講，Schragels嘅味道同口感都會令你感到相當熟悉。Schragels嘅Bagel每日都係新鮮製作，採用傳統手工方法，經過手搓、燙煮同石爐烘焙，所以口感特別煙韌耐嚼。
【INFO】
《Schragels》
地址: 上環蘇杭街104號地舖
營業時間: 星期一至日 08:00 - 18:00
Bagel店推介 | 7. Miam Bakery
位於西營盤嘅烘焙小店 Miam Bakery，主打嘅手工歐式麵包就口耳相傳，口碑載道。呢度嘅各款麵包都堅持每日喺鋪頭新鮮出爐，充滿香氣。雖然最多人推薦佢哋嘅肉桂卷同酸種麵包，但其實佢哋嘅Bagel都非常值得一試！Miam Bakery 每日都會供應鹹甜口味各一款嘅Bagel，例如藍莓忌廉芝士同烤蔥蒜鹽芝麻，選擇雖然唔多但款款都係精選。佢哋嘅Bagel口感扎實有咬口，唔會太軟身。
【INFO】
《Miam Bakery》
地址: 西環西營盤第三街73號興華樓地舖
營業時間: 星期一至二 全日休息；星期三至日 08:00 - 18:00
Bagel店推介 | 8. R&R Bagels
喺中環嘅R&R Bagels每日新鮮烘焙，外皮香酥，內裡潤澤有嚼勁，配上豐富嘅餡料，食落口感層次豐富，真係令人一試難忘！R&R Bagels 嘅Bagel包款選擇多樣，有芝麻、全麥、罌粟籽、蒜香、肉桂提子、洋葱等多種口味任你揀。至於餡料方面，除咗經典嘅牛油果炒蛋、芝士烤牛肉）、煙雞胸芝士同煙三文魚忌廉芝士外，仲有好多其他特色Bagel配搭，款款都足料，而且勁有嚼勁！
【INFO】
《R&R Bagels》
地址: 中環利源西街28號地舖
營業時間: 星期一至五 07:30 - 17:00；星期六至日 09:00 - 18:00
Bagel店推介 | 9. Bagels
如果你係中環街市常客，咁你一定識得呢間喺中環街市2樓嘅Bagels啦！佢哋由IG shop起家，憑住營養師設計嘅多款Bagel，成功俘虜咗一班健康又注重均衡飲食嘅朋友。店內嘅Bagel sandwich款款都有驚喜，好似佢哋嘅雞肉紅莓沙律貝果，雞肉一絲絲，溝埋Greek Yogurt變成雞肉醬，仲有一片芝士增添鹹味，Bagel塗上一層cream cheese，再配合沙律菜，口感豐富。另外，煙燻蜜糖火腿貝都好受歡迎，煙燻火腿好好食，似煙鴨胸冇咗層肥膏，配埋熟蛋、番茄、生菜同片裝芝士，成個組合更加似田園風三文治，清新又美味。唔同口味嘅Bagel包體都有獨特之處，例如香蒜洋蔥貝果就比芝士貝果更煙韌，聞落仲有淡淡蒜香，真係值得一試！
【INFO】
《Bagels》
地址: 中環皇后大道中93號中環街市2樓219號舖
營業時間: 星期一至五 08:00 - 20:00；星期六至日 10:00 - 19:00
Bagel店推介 | 10. The Brew Corner
上環嘅The Brew Corner，係一間集合美食同毛孩友善嘅特色咖啡店！佢哋提供多款餡料豐富嘅Bagel，款款都份量十足。基本設有8款Bagel配搭組合，包括健康嘅牛油果雞胸肉、經典嘅煙火腿芝士、煙三文魚忌廉芝士、芝士煙燻牛肉、自家製蕃茄醬肉丸、炒蛋煙肉牛油果，仲有邪惡嘅三重芝士，同埋超豐富嘅燻牛肉、煙火腿芝士層層疊Bagel，選擇多到你諗唔到！
【INFO】 《The Brew Corner》 地址: 上環四方街24號地舖 營業時間: 星期一 全日休息；星期二至日 11:00 - 16:00
Bagel店推介 | 11. lungo
位於長沙灣嘅lungo，係一間以Bagel為主打嘅木系風格Cafe，佢哋主打不同口味嘅貝果同貝果三文治，每一款都做得好有心機。特別推薦佢哋嘅Chicken & Wasabi Mayonnaise同埋Parma Ham & Dill Bagel Sandwiches。lungo嘅Bagel屬於經典美式貝果，咬落去非常有嚼勁但又唔會過硬，微溫嘅口感加上外脆內軟，令人食到停唔到口。
【INFO】 《lungo》 地址: 長沙灣福華街571號曉悅地下2號舖 營業時間: 星期一至日 09:00 - 18:00
Bagel店推介 | 12. SP_CE cafe & lounge
喺上環舊式唐樓入面嘅SP_CE cafe & lounge，係一間充滿設計感嘅寵物友善Cafe，設有室內外座位，店內水泥牆設計簡約，打卡一流！呢度主要供應意粉、包點類等西式料理，而佢哋份量十足嘅黑松露炒蛋Bagel更係人氣招牌菜，絕對值得一試！意大利黑松露醬炒滑蛋貝果，一上枱就見到瀑布式嘅滑蛋，非常壯觀，蛋香濃郁之餘，黑松露份量都勁多！一切開，入面仲有生菜同番茄，令口感更豐富同清新。Bagel本身外脆內軟，就算食到最底層都依然保持香脆。
【INFO】 《SP_CE cafe & lounge》 地址: 上環普慶坊20號地舖 營業時間: 星期一至日 10:00 - 22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
