傳統茶樓推介 | 唔知有冇人同小編一樣，細個嘅時候同屋企人去茶樓飲茶，每次見到有點心車經過，都會好期待有咩新鮮出爐嘅蒸籠點心。雖然而家點心車已經買少見少，但其實香港仲有茶樓保留住呢啲傳統特色，所以小編就為大家推介六大香港傳統茶樓，一齊去搵返童年回憶啦！
圖片來源：Facebook @大帽山端記茶樓、Openrice @yankowky、Openrice @FlorenceWing2012、Openrice @麵包超人、Openrice @bluefa、Openrice @i_am_foodhunter、Openrice @Liesel、Openrice @Mr.Ma.531、Openrice @egg_chun、Openrice @ONEMORE TWOMORE、Openrice @taicalvin、Openrice @weisikmuimui、Openrice @tungit、Openrice @ap2sk6dydg65 | 撰文：Icy
香港傳統茶樓 | 1. 端記茶樓
位於荃灣大帽山嘅端記茶樓已經開業50多年，景觀開揚，好多人行完山或者都會喺度嘆番個早茶，欣賞大帽山景。茶樓以自助形式經營，由茶客自己揀選茶葉、沖茶、拎碗筷、拎點心等，並且多年來堅持以山水沏茶同親手製作點心。
雖然點心選擇唔多，無豪華裝潢同超貼心服務，但充滿鄉村風味。例如員工會喺附近採摘新鮮本地菜，灼煮後味道特別鮮甜嫩口，另外仲有人手包製嘅茶粿同雞屎藤。
【INFO】 端記茶樓 地址：荃灣荃錦公路川龍村57-58號 營業時間：星期二至日 06:00-14:00
香港傳統茶樓 | 2. 蓮香樓
位於中環嘅蓮香樓開業已達97年，歷史悠久，雖然曾於2022年開始停業，但今年4月1日回歸原址，繼續聘請前總廚及舊夥計營運，吸引大量舊客及遊客光顧。蓮香樓保留傳統茶樓元素，例如點心車仔、茶盅等，提供豬潤燒賣、蠔油鴛鴦扎等精緻粵式點心。
另外蓮香樓亦特別喺地下開設手搖飲品店「蓮香茶」，以香醇茶葉製作新品，打入年輕人市場。茶品名稱亦充滿詩意，例如「浮生如夢」同「三千紅塵」，清新嘅花茶加上綿密嘅雲泡，口感輕盈，賣相仲十分igable，非常有新意。
【INFO】 蓮香樓 地址：中環威靈頓街160-164號 營業時間：星期一至日 06:00-22:30
香港傳統茶樓 | 3. 新龍城茶樓
位於牛池灣嘅新龍城茶樓係碩果僅存嘅寮屋茶樓，每日朝早都掛滿雀籠，一眾茶客以雀會友，充滿人情味，令人有時光倒流到70年代嘅感覺。熱辣辣嘅蒸籠點心以人手製作，由熱情嘅員工捧住餐盤叫賣，四處都飄住一陣陣點心香氣。
點心價錢合理而且非常足料，例如有結實嘅燒賣同厚肉瀑汁嘅雞球大包，大件夾抵食～但有傳新龍城茶樓將於2025年結業，想感受傳統飲茶氣氛嘅朋友就要把握機會喇！
【INFO】 新龍城茶樓 地址：彩虹牛池灣龍池徑67號地下B號舖 營業時間：星期一至日 03:45-14:30/16:45-22:15
香港傳統茶樓 | 4. 中央飯店
位於深水埗嘅中央飯店係一間開業逾60年客家飯店，裝潢簡樸，地方唔算闊落，但每日都有唔少忠實老顧客打躉。點心姨姨會不斷推住點心車叫賣，車來車往，充滿懷舊氣氛。
點心大大粒好足料，款式多元化，例如有叉燒酥、鮮蝦粉粿、雞扎、芋角、鵪鶉蛋燒賣等等，而且價錢合理抵食～
【INFO】 中央飯店 地址：深水埗大埔道140號東廬大廈地舖 營業時間：星期一至日 06:00-22:00
香港傳統茶樓 | 5. 勝興茶室
位於坪洲嘅勝興茶室，仍保留傳統手推點心車，充滿老香港情懷。點心師傅會每天人手製作新鮮出爐嘅點心，除咗有經典點心款式，仲有比較少見嘅豬肚燒賣、豬潤腸粉。
店內非常特別嘅招牌菜桂花腐皮釀魚肉卷，即叫即煎，灑上蔥花，有陣陣蔥油香味，再配上泰式酸甜醬，味道開胃。
【INFO】 勝興茶室 地址：坪洲永安街26號地舖 營業時間：星期一至日 05:00-14:00
香港傳統茶樓 | 6. 海連茶樓
位於荃灣嘅海連茶樓店面簡樸，無過多嘅裝修，但環境整潔，充滿懷舊氣氛。員工會推住點心車叫賣，大家可以時刻留意有咩點心新鮮出爐，好似細細個爭住出去拎點心咁，啲童年回憶返晒嚟。
海連茶樓嘅每款點心都用料十足，蝦餃同燒賣包得非常紮實，腸粉同臘味糯米包亦非常軟糯香口。
【INFO】 海連茶樓 地址：荃灣福來邨永嘉樓地下15-16號舖 營業時間：星期一至日 04:00-00:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
