港人愛大排檔，熱鬧嘅氣氛、多樣化嘅美食選擇及價錢經濟實惠成為港人近年最愛嘅聚餐地點。今次為大家推介八間充滿港式風味大排檔，提供過百款地道菜式、新派港式小炒及創意港式甜品等，$288起更有任飲任食小炒放題，仲有得嘆住冷氣舒舒服服食大排檔，一於save定同親朋戚友飲酒啤一啤，盡興一晚！
圖片來源： Openrice @eunicehau0802、@editor-cathy、@sleepbeauty、@eatwithcherii、@trygoodfood_hk、@MW Foodie、@eatwithoutguilt、@kkist、@misstaobao、@lamlamlikk、@heaheafooddiary、@Janice345、@甜忌廉、@followme_hk、@jvbb2005、@ki918、@o.yukiyanyan.o、@nutty_eater、@saruka、@vanessafoodiary｜撰文：Ginger
香港大排檔推介 | 1. 楚撚記大排檔
講起大排檔，又點少得近年非常有名嘅楚撚記大排檔。裝修極具港式風味，有70至80年代嘅感覺，有懷舊感得嚟而且玩味十足。店舖提供數十款非常有特色小炒菜式，例如香煎黑松露手打蓮藕墨魚餅、楚撚豬油撈飯、燕麥金沙蝦球及麻辣韭菜鴨血煲等，平均定價由$80至$130不等。溫馨提示，建議大家要提早兩至三個星期預約座位！
【INFO】
楚撚記大排檔
《土瓜灣總店》
地址： 九龍土瓜灣馬坑涌道 2C 號寶光大廈地下 C 及 D 舖
營業時間： 星期一至日 17:30 - 02:00 (營業時間會按營業限制而更改，歡迎致電查詢)
《荃灣旗艦店》
地址：荃灣川龍街118號百悅坊地下及1樓
營業時間：星期一至日 17:30-03:00 (營業時間會按營業限制而更改，歡迎致電查詢)
香港大排檔推介 | 2. 女人街食飯公司
女人街食飯公司位於旺角中心點，地理位置十分方便。以唔同嘅香港舊式招牌、霓虹燈及鐵閘等裝飾店舖，大玩懷舊風，充滿港式風味，打卡一流！店舖提供多款特色鑊氣小炒，例如香辣肉碎炒大肉蟹、香辣肉碎蟶子生菜包、金沙脆鮮魷及每枱必點黑松露蝦多士，非常適合多人聚餐。
【INFO】
女人街食飯公司
地址：旺角通菜街1A-1L威達商業大廈1樓B室
營業時間：星期一至日18:00 - 00:00
香港大排檔推介 | 3. 紅伶飯店
想有啲新意？不妨試吓呢間充滿懷舊大排檔風味嘅潮州打冷！特別推介冰鎮Wasabi墨魚作為前菜，爽口彈牙又新鮮，辣辣地十分開胃。另外特別推薦煎蠔餅、蠔仔肉碎粥以及滷水雜錦，滷水雜錦配料豐富選擇多，例如有鵝腸、豬大腸、墨魚及紅腸，樣樣有齊非常滿足。相信喺呢度都可以食到地道嘅潮州菜式！
【INFO】
紅伶飯店
地址：油麻地砵蘭街10-16號宜發大廈地下D及E號舖
營業時間：星期一至日 17:00 - 01:00
香港大排檔推介 | 4. 妹記大排檔
大熱天時唔想坐室外，想嘆住冷氣食大排檔，不妨選擇妹記大排檔啦！旺角及尖沙咀皆有分店，地理位置十分方便。其中最受歡迎係鬼馬油炸鬼、妹記小炒王、黑椒薯仔牛柳粒及炸豬手等。飲酒嘅時候仲可以用佢地雪凍咗嘅戰鬥碗，最適合同朋友拎住一齊打卡呃Like！
【INFO】
妹記大排檔
《旺角店》
地址： 旺角通菜街1A-1L威達商業大廈Deli2 2樓B號舖
營業時間：星期一至日 11:30 - 15:00；17:30 - 23:00
《尖沙咀店》
地址： 尖沙咀金馬倫道5號太興廣場3樓
營業時間：星期一至日 11:30 - 16:00；17:30 - 23:30
香港大排檔推介 | 5. 新肥泉海鮮大排檔
新肥泉海鮮大排檔位於佐敦熟食街市內，平均一碟小炒大概百零蚊，但呢到竟然有任飲任食放題選擇，90分鐘$288起，包括多款小炒、砂鍋煲類及各款飲品。額外加$100更可享用火鍋、酸菜魚、麻辣水煮類等，非常抵食！
【INFO】
新肥泉海鮮大排檔
地址： 佐敦寶靈街17號官涌市政大廈2樓熟食中心
營業時間：星期一至日 12:00 - 23:45
香港大排檔推介 | 6. 萬發海鮮菜館
講起萬發，一定會諗起佢哋馳名嘅黑椒薯仔牛柳粒，薯仔外面炸到脆卜卜，入面非常軟綿，掛滿黑椒汁，鹹鹹甜甜，非常惹味，撈飯食一流！除咗黑椒薯仔牛柳粒，亦有其他名菜，例如椒鹽白飯魚、風沙雞及蒸白鱔等，每道菜亦可以將份量升級，非常適合大型聚餐！
【INFO】
萬發海鮮菜館
地址： 深水埗九江街150-152號地舖
營業時間：星期一至日 17:00 - 02:00
香港大排檔推介 | 7. 陳根記
沙田陳根記以芒果一口脆打響名堂，入面凍冰冰嘅芒果配搭炸到熱辣辣嘅忌廉班戟外皮，冰火交融，外脆內軟。除咗芒果一口脆，Wasabi手撕雞亦大受歡迎，非常適合夏天享用。另外亦推介孜然一條骨、乾炒牛河及金湯酸菜魚等各款特色小炒，定價大概$100左右，非常抵食。
【INFO】
陳根記
地址： 沙田石門安群街1號京瑞廣場2期地下5號舖
營業時間：星期一至五 12:00 - 23:00；星期六至日 17:00 - 23:00
香港大排檔推介 | 8. 大排檔小炒
為大家推介最後一間適合大型聚會嘅大排檔，可以包房，最低消費為$2500。環境舒適寬敞，企理乾淨，適合與三五知己盡情飲酒作樂。想食有鑊氣嘅小炒，一樣可以選擇呢度嘅特色美食，例如乾燒蝦油粉絲煲、拔絲咕嚕肉、大排檔小炒王及蒜子火腩大鱔煲等，應有盡有！想去大排檔舒服食飯，一樣可以有高質嘅選擇。
【INFO】
大排檔小炒
《銅鑼灣店》
地址：銅鑼灣駱克道405-419號華發大廈地下A號舖
營業時間：星期一至日 12:00 - 14:30；18:00 - 23:00
《灣仔店》
地址：灣仔天樂里2-4號金豐商業大廈地舖
營業時間：星期一至日 11:30 - 14:30；17:30 - 22:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
