筲箕灣美食推介 | 筲箕灣，一個承載住濃厚漁村歷史嘅舊區，如今已經進化成港島區著名嘅美食天堂！特別係長達幾百米嘅「東大街」，密密麻麻開滿咗由街頭食到街尾嘅人氣食店。由屹立半世紀嘅魚蛋粉老字號、每日限量供應嘅懷舊沙翁，到被米芝蓮推介嘅精緻滬菜，甚至係發哥都幫襯嘅雞蛋仔，筲箕灣嘅美食地圖絕對比你想像中豐富。
圖片來源：Openrice @吃貨四眼妹、@FoodPilgrimageGps 、@KellyShiuKaYu、@歡歡增肥之旅、@changing、@日本食玩、@Taniatt、@chingyisiuu | 撰文：Ginger
筲箕灣美食 | 1. 一家
榮獲米芝蓮必比登小食推介嘅「一家」位於形薈地下，環境舒適得體。「一家」主打多款經典上海料理，大廚憑藉對滬菜精髓嘅深刻理解，製作出蔥油白切雞、麻辣香炸鳳尾魚等招牌菜式。特別推介佢哋嘅蔥油白切雞，雞肉嫩滑，蔥油香氣撲鼻；甜品方面則有獨特嘅高力芒果奶黃，將傳統高力豆沙玩出新花樣，口感輕盈綿密。餐廳嘅平均消費約 $101-200，以平民價錢提供物有所值嘅高品質體驗。
【INFO】
《一家》
地址：筲箕灣筲箕灣道393號形薈地下G04號舖
營業時間：星期一至日 11:30 - 22:00
筲箕灣美食 | 2. 越南老街
「越南老街」係唔少街坊嘅私藏名單！呢間餐廳主打一系列親民價錢嘅經典越南料理，味道正宗且份量十足，係平日午晚餐嘅高質選擇。店內最吸睛嘅莫過於黃咖喱海鮮，鮮甜嘅蝦肉、青口、魷魚鬚吸滿咗濃郁嘅咖喱汁，配埋脆口嘅蒜蓉包一齊食，惹味到極！另外，佢哋嘅火車頭湯粉亦係熱門之選，湯底由大量牛骨長時間熬製，香甜而不油膩，加上牛丸、肥牛、牛筋等豐富配料，每一口都係精華。
【INFO】
《越南老街》
地址：筲箕灣南安街93號鯉景大廈地下A號舖
營業時間：星期一、星期三至日 09:00至23:00 （星期二全日休息）
筲箕灣美食 | 3. 八沢
喺筲箕灣東大街，有一間充滿日式居酒屋風格嘅餐廳「八沢」，呢度唔單止環境舒服，連菜式設計都非常大膽創新，係唔少後生仔嘅聚腳點。呢度嘅「靈魂之作」絕對係黑松露忌廉海鮮烏冬！湯底由黑松露同香濃忌廉混合而成，每一根彈牙嘅烏冬都掛滿咗濃郁嘅黑松露汁。海鮮配料豐富，再加上陣陣奶香，食落去非常濃厚飽腹。除咗烏冬，餐廳仲提供各式燒物同飯類，質素同樣有保證。
【INFO】
《八沢》
地址：筲箕灣東大街59-99號東威大廈地下7號舖
營業時間：星期一至五、公眾假期及前夕 11:00至15:30；17:30至22:00；星期六至日：11:00至22:30
筲箕灣美食 | 4. 姊妹美食
講到筲箕灣及西灣河一帶嘅「掃街」文化，就一定唔可以錯過位於太安樓嘅煎釀三寶專門店「姊妹美食」。呢間舖頭喺區內屹立多年，主打即叫即炸嘅多款炸物，係唔少街坊由細食到大嘅集體回憶。呢度最出名嘅係坊間罕見嘅泰式炸皮蛋，外層唔係普通脆漿，而係包咗一層厚厚嘅魚肉，令口感更有層次。炸過嘅皮蛋香氣誘人，淋上泰式辣醬，味道酸辣開胃。此外，呢度仲有炸大腸、炸大雞髀、炸魷魚等超過十幾款選擇，全部都係親民價。
【INFO】 《姊妹美食》 地址：西灣河筲箕灣道57-87號太安樓地下A35A號舖
筲箕灣美食 | 5. Dirty Skillet
位於形薈地下嘅 Dirty Skillet 走嘅係歐美復古風格，餐廳內仲設有仿旋轉木馬嘅設計，絕對係打卡必去嘅熱點！呢度主打 Shake Shake 海鮮袋、火焰芝士等極具儀式感嘅菜式。佢哋嘅招牌秘製 Dirty 屠夫牛扒，經過慢煮再烤製兩道工序，外焦內嫩，啖啖爆汁。而銷量第一嘅 Burrata Cheese Pizza 亦係驚喜滿分，一刀切開中心嘅流心芝士就會傾瀉而出，配埋鹹香火腿非常夾！甜品方面，芒果拿破崙酥皮脆香，配上大大粒芒果，係完美嘅結尾。
【INFO】 《Dirty Skillet》 地址：筲箕灣筲箕灣道393號形薈地下G12號舖 營業時間：星期一至五 11:30 - 22:00；星期六、日 10:00 - 22:00
筲箕灣美食 | 6. 紹華小廚
入冬後想食一碗暖笠笠嘅煲仔飯？位於筲箕灣熟食中心嘅「紹華小廚」絕對係首選。呢度前身係銅鑼灣名店，最難得係堅持每一煲都係用炭爐製作，保證食到最正宗嘅炭火香。紹華小廚除咗有傳統嘅豬潤黃鱔、排骨滑雞等口味，仲有好多新穎配搭，例如茘茸肉碎煲仔飯、蒜香牛頸脊煲仔飯，甚至係野菌鵝肝飯！食材份量十足，最重要係飯焦香脆到不得了。
【INFO】 《紹華小廚》 地址：筲箕灣愛秩序灣道15號愛秩序灣街市暨綜合服務大樓CF3號舖 營業時間：星期一至六 07:00 - 22:00；星期日 07:00 - 12:00
筲箕灣美食 | 7. The Starred
「The Starred」以懷舊皮質卡座、水晶吊燈同復古地磚為特色，營造出浪漫嘅懷舊情懷。近日餐廳推出咗非常親民嘅套餐，包齊前菜、餐湯、主菜、甜品同飲品！主菜可以選擇黑松露意粉或鐵板豬扒，只需加$5仲可以升級做紐西蘭肉眼牛扒，最後食埋焦香巴斯克芝士蛋糕，真係滿足到爆。平均每人只需$100樓下就可以享受酒店級環境嘅西餐。
【INFO】 《The Starred》 地址：筲箕灣筲箕灣道333號樂融軒地下4號舖 營業時間：星期一至日 11:45 - 22:00
筲箕灣美食 | 8. 安利魚蛋粉麵
始源於1966年嘅「安利魚蛋粉麵」可以話係東大街嘅靈魂名店！作為屹立半世紀嘅老牌麵家，佢哋一直堅持自己手打魚蛋，每日用兩種新鮮魚打起，係唔少魚蛋粉絲心目中嘅港島之最。除咗招牌魚蛋，佢哋嘅名物切腩魚片撈粗亦係每枱必點！牛腩切得厚薄適中，入味且唔韌，配合特製嘅撈麵汁，味道一流。
【INFO】 《安利魚蛋粉麵》 地址：筲箕灣筲箕灣東大街22號地鋪 營業時間：星期一至三、五至日 09:00 - 19:00 (星期四休息)
筲箕灣美食 | 9. 百利冰室
想尋回昔日香港嘅情懷，位於筲箕灣嘅「百利冰室」係少數保存得極好嘅懷舊冰室。呢度最出名嘅係由老師傅六十多年來堅持手工製嘅炸沙翁，每日清晨起步製作，限量供應100個！百利嘅炸沙翁金黃香脆，內裡鬆軟綿密，蛋香濃郁，絕對係冰室界嘅名物。另外，呢度嘅蝦多士亦係人氣推介，香脆可口。
【INFO】 《百利冰室》 地址：西灣河筲箕灣道216號地舖 營業時間：星期一至三、五至日 06:30 - 17:30 (星期四休息)
筲箕灣美食 | 10. I Love 戟
I Love 戟係港島區名氣響噹噹嘅班戟專門店，雖然鋪頭細細，但口味選擇非常豐富。當中最受歡迎嘅招牌作莫過於焦糖燉蛋雪糕班戟！班戟皮非常煙韌，包裹住自選雪糕、忌廉同主角焦糖燉蛋。燉蛋面層有一層香脆嘅燒焦糖，配合蛋香滑溜嘅燉蛋，口感層次分明。一口咬落去，凍冰冰嘅雪糕、香甜嘅焦糖同軟熟嘅班戟皮喺口中交織，難怪會被稱為班戟界嘅「頂流」。
【INFO】 《I Love 戟》 地址：筲箕灣東大街76號地下C號舖
筲箕灣美食 | 11. 王林記潮州魚蛋粉麵
同安利魚蛋粉麵一樣屹立於東大街嘅「王林記」，同樣係區內極具代表性嘅粉麵老字號。佢哋主打香蔥魚蛋，強調不添加味精，以食材最原始嘅鮮味嚟吸引老饕。王林記嘅魚蛋以彈牙口感聞名，香蔥味清新且能帶出魚肉嘅鮮甜。佢哋嘅切腩撈粗亦非常有水準，湯底清甜不口渴，與魚蛋、魚片完美相襯。
【INFO】 《王林記》 地址：筲箕灣東大街10號東寶大廈地下A號舖 營業時間：星期一至日 06:00 - 20:00
筲箕灣美食 | 12. 低調高手大街小食
嚟到筲箕灣東大街，如果見到港鐵站出口附近排長龍，咁一定係「低調高手」！呢間舖頭雖然叫「低調」，但連周潤發（發哥）都係常客，可以話係東大街嘅名物擔當。佢哋嘅雞蛋仔同格仔餅保證即叫即整，攞到手嗰陣熱辣辣。雞蛋仔邊緣香脆，入面口感紮實，有原味、蘋果、朱古力、辣肉腸同鹹蛋五款口味，當中鹹蛋味鹹甜交織非常驚喜。而格仔餅更貼心咁設有分件服務，方便同朋友分享。
【INFO】 《低調高手》 地址：筲箕灣東大街76A號地下B3號舖 營業時間：星期一至日 13:00 - 21:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
