朱古力甜品 | 朱古力，永遠係甜品界嘅「治癒系」王者！由絲滑濃郁嘅純朱古力、甜而不膩嘅朱古力蛋糕，到充滿驚喜嘅朱古力主題特飲，每一啖都係令人心跳加速嘅多巴胺盛宴。香港近年湧現咗唔少精品朱古力店同人氣 Cafe，將朱古力嘅層次玩到極致。今次我哋精選咗全港 12 間必試嘅朱古力甜品熱點，有自家養殖可可豆嘅精品店、主打流心效果嘅新派烘焙，仲有歷史悠久嘅貴族級選擇，立即去文！

圖片來源：Openrice@gigiwan18 、@阿丸 、@Eliz Hung、@sherryyu01、@RheaChim、@smacznysmakosz、Facebook @Goose’ Chocolate、@La Maison du Chocolat Hong Kong| 撰文：Ginger

朱古力甜品推介 | 1. Goose’ Chocolate

如果你追求最純粹、最極致嘅可可風味，咁位於上環太平山街嘅精品朱古力店 Goose’ Chocolate 絕對係你嘅首選。呢間小店充滿懷舊復古氣息，以墨綠色為主調，門口仲擺放咗標誌性嘅鵝仔佈置，未入去已經感受到一份寧靜嘅氛圍。呢度將朱古力鑽研到好似精品咖啡咁精細，店主會細心講解唔同產區嘅口味。店內提供由 73% 到 100% 唔同濃度 嘅 Single Origin 朱古力飲品，例如 Belize 85% 味道偏向 Earthy 而唔係 Fruity，入口極之濃郁且層次分明，完全唔會被過多嘅糖分掩蓋可可本味。最貼心係可以揀分開奶上，或者轉用燕麥奶，等你可以先品嚐最原始嘅可可香。

（圖片來源：Facebook @Goose’ Chocolate）
【INFO】
《Goose’ Chocolate》
地址：上環太平山街 16 號地舖
營業時間：星期三至日 12:00 - 18:00 (星期一、二全日休息)

朱古力甜品推介 | 2. Cacaolab

作為喺香港誕生嘅精品朱古力品牌，CACAOLAB 親自遠赴南美洲農場挑選最頂尖嘅可可豆，並堅持喺香港利用先進機器研磨處理，務求保留可可最細緻嘅原味。最唔可以錯過嘅就係佢哋近期爆紅嘅「70%黑朱古力千層撻」！外層酥皮極致鬆脆，咬落去會發出清脆嘅「咔嚓」聲，而內裡嘅蛋漿餡料幼滑如絲，配上濃度適中嘅 70% Dark Chocolate，微苦嘅可可香平衡咗蛋撻嘅甜膩。此外，品牌主打嘅無添加糖果味黑朱古力系列，亦係將水果天然甜味與可可融合。

（圖片來源：Facebook @Cacaolab）
【INFO】
《CACAOLAB》
地址：銅鑼灣白沙道 20 號地下 
營業時間：星期一至五 08:00 - 21:00；星期六日及公眾假期 11:00 - 21:00

朱古力甜品推介 | 3. 甜入心

位於灣仔皇后大道東、鄰近利東街嘅甜入心係一間主打天然低糖嘅隱世手工糕點店。呢度嘅裝潢以粉紅色為主調，環境充滿少女心，雖然以手工糕點聞名，但佢哋對朱古力嘅運用亦非常有堅持。店內所有食品均堅持每日自家手工新鮮製作。最矚目嘅莫過於近期大熱嘅「杜拜朱古力」($130)。有別於坊間一般傳統配方，呢度特別採用自家低糖配方，以 85% 瑞士黑朱古力製作外層。內餡包裹住酥脆嘅土耳其麵團絲，再加上頂級開心果醬，入口層次極之豐富，完美融合咗黑朱古力嘅回甘同開心果嘅香濃。值得一提嘅係，呢款產品可存放兩至三個月。 

杜拜朱古力 – $130（圖片來源：Openrice@cyrus1818）
【INFO】
《甜入心》
地址：灣仔皇后大道東162號地舖
營業時間：星期一至六 12:00 - 20:00，星期日全日休息

朱古力甜品推介 | 4. Nun Desserts Cafe

旺角通菜街嘅 Nun Desserts Cafe 係一間主打韓式雪花冰嘅人氣店，而佢哋嘅朱古力口味更係長居榜首。呢度嘅甜品份量大，非常適合兩三位好友一齊開心 Share。必點嘅「奧利奧朱古力雪花冰」，韓式牛奶冰底細膩，表面鋪滿厚厚嘅朱古力粉同埋大量 Oreo 碎粒，中間仲藏住朱古力雪糕球，濃郁奶香與微苦可可味完美中和。如果你想食得再邪惡啲，朱古力窩夫（Chocolate Waffle）亦係絕佳選擇，窩夫配大量朱古力醬，酥脆之餘香氣四溢。

新系列：「杜拜飄浮珍珠」（奶蓋爆漿雪奶）（圖片來源：Openrice@gigiwan18）
【INFO】
《Nun Desserts Cafe》
地址：旺角通菜街 119 號地舖
營業時間：星期一至日 14:00 - 02:00

朱古力甜品推介 | 5. Casabake

位於觀塘駱駝漆大廈嘅Casabake，全綠色店面設計同門口巨大嘅牛角包雕塑聞名，一出電梯輕鬆辨認。店內堅持每日新鮮製作多款手工烘焙產品，即使到傍晚時段仍會持續補貨。除咗人氣極高嘅開心果系列外，呢度嘅朱古力產品同樣展現出極致嘅層次感。店內提供雙重朱古力流心麻糬葡撻（$28），結合咗濃郁可可與 Q 彈麻糬，帶嚟獨特嘅咬口驚喜。此外，甜品愛好者仲可以嘗試多款創意口味，如 薄荷朱古力雪糕撻（$32）及 曲奇餅乾碎雪糕撻（$32），甚至仲有比利時黑朱古力意大利榛子（$35）。

（圖片來源：Openrice@kingchris5408）
【INFO】 
《Casabake》 
地址：觀塘開源道 60 號駱駝漆大廈第三座 4 樓 A1 室 
營業時間：星期一至日 12:00 - 20:00

朱古力甜品推介 | 6. Choconext

如果你支持本地原創，咁 ChocoNext 呢個香港手工朱古力品牌就絕對值得你留意。呢度主打 100% 香港製造嘅高品質朱古力同埋各式手信，由精緻嘅手工朱古力、曲奇到蝴蝶酥都一應俱全，而且包裝非常大方得體，係唔少人送禮嘅首選。朱古力控除咗要試佢哋嘅招牌朱古力之外，一定唔可以錯過佢哋嘅「濃郁朱古力曲奇」。呢款曲奇採用低糖配方全手工製造，無添加人工成分，味道偏向 Dark Chocolate 嘅深邃甘香，入口鬆化且唔會太甜膩。另外，如果你想搵啲清爽啲嘅選擇，佢哋喺尖沙咀分店仲有發售「香蕉朱古力雪糕」($38)，雪糕質地幼滑，果香同可可味比例啱啱好。

（圖片來源：Openrice@阿丸）
（圖片來源：Openrice@Eliz Hung）
【INFO】
《ChocoNext》
地址：尖沙咀廣東道 3-27 號海港城港威商場 3 樓 3001 號舖 city'super 內
營業時間：星期一至四 10:00 - 22:00，星期五至六 10:00 - 23:00，星期日 10:00 - 22:00 

朱古力甜品推介 | 7. Dalloyau

擁有超過 300 年歷史嘅法國皇室御用品牌 Dalloyau，佢哋嘅朱古力甜品絕對係優雅與品質嘅代名詞。由傳承百年嘅食譜製作而成，每一道甜點都展現出法式精緻美學。必食之選定係佢哋嘅招牌「Opera 歌劇院蛋糕」，呢款甜品最早由 Dalloyau 創製，層層疊疊嘅朱古力甘那許、咖啡奶油同海綿蛋糕，入口即融，朱古力味濃郁而有深度。另外，店內嘅松露朱古力同朱古力馬卡龍亦值得一試，外殼輕薄香脆，內餡濕潤香濃。

（圖片來源：Openrice@sherryyu01)
（圖片來源：Openrice@RheaChim)
【INFO】
《Dalloyau》
地址：尖沙咀海港城港威商場 3 樓 GW3220 號舖
營業時間：星期一至日 11:00 - 20:30

朱古力甜品推介 | 8. Ohlalagout

Ohlalagout 係一間主打新派法式糕點嘅精緻小店，店舖位於上環皇后大道中，距離港鐵站只需 3 分鐘步程，無論係返工定行街去買件甜品都非常方便。佢哋嘅朱古力系列非常多元化，特別係將經典口味玩出新花樣。必試推介包括：朱古力榛子葡撻 ($20)酥脆嘅撻皮包住香濃嘅朱古力榛子內餡，口感豐富。雙重朱古力流心麻糬葡撻 ($28)：結合咗極致濃郁嘅可可同埋煙韌 Q 彈嘅麻糬，一咬開就有流心驚喜。

朱古力榛子葡撻（圖片來源：Openrice@smacznysmakosz）
【INFO】
《Ohlalagout》
地址：上環皇后大道中 251 號太興中心 2 座地下 B&C 號舖
營業時間：星期一至五 08:00 - 19:30，星期六至日 09:00 - 19:30

朱古力甜品推介 | 9. Ramie

位於銅鑼灣海都大廈嘅 Ramie 裝修環境非常舒服，係銅鑼灣鬧市中一個可以靜靜享受高品質朱古力嘅好地方。店舖主打精品朱古力同咖啡，最特別嘅係佢哋嘅飲用朱古力係直接用牛奶煮溶朱古力塊而成。必試推介包括售價 $45 嘅 Tartufo Tart，表層朱古力可可香甜濃郁，底層係帶有烘焙香氣嘅朱古力餅乾，中間夾住鮮嫩輕盈嘅開心果意式生乳，層次感十足。而售價 $65 嘅 Ramie Cioco 係精品朱古力嘅入門首選，混合咗非洲、加勒比同南美嘅可可豆，質地比一般朱古力更綿密結身，甚至可以用匙羹食，入口充滿濃郁可可香同果香甘甜。另外仲有 72% Vietnam 朱古力飲品，帶有微酸嘅紅莓（Raspberry）風味，平衡返朱古力本身嘅甜度，口感濃厚順滑，飲完完全唔會覺得膩。至於想同時兼具高品質朱古力同咖啡香氣嘅朋友，售價 $60 嘅 Mochaccino 亦係一個好選擇。

Mochaccino（圖片來源：Openrice@mermerdiary）
【INFO】
《Ramie》
地址：銅鑼灣告士打道 275 號海都大廈地下 11 號舖（港鐵銅鑼灣站 D4 出口）
營業時間：星期一至四 10:00 - 17:30，星期五至六 10:00 - 18:00，星期日 10:00 - 17:30

朱古力甜品推介 | 10. Gram Cafe & Pancakes

Gram cafe & pancake位於尖沙咀 The ONE 4 樓，最啱行完街過嚟食件甜品放鬆下。除咗招牌嘅厚班戟外，佢哋嘅朱古力系列甜品亦非常出色，例如石母街班戟（$118），三層厚實嘅朱古力味班戟夾住滑順嘅忌廉同埋棉花糖，面頭鋪滿新鮮士多啤梨，再淋上濃郁朱古力醬，每一口都充滿多重層次感。另外仲有經典嘅意大利芝士蛋糕班戟 (Tiramisu)（$118），將可可粉嘅微苦同芝士嘅奶香完美結合。飲品方面，佢哋嘅 特濃朱古力沙冰雖然入口係濃郁嘅朱古力味，但甜度調校得啱啱好，飲落完全唔會覺得膩。

（圖片來源：Openrice@charlie0228)
【INFO】
《gram cafe & pancake》
地址：尖沙咀彌敦道 100 號 The ONE 4 樓 L408 號舖
營業時間：星期一至日 11:30 - 23:00

朱古力甜品推介 | 11. La Maison du Chocolat

被譽為「朱古力界愛馬仕」嘅 La Maison du Chocolat，係一家享譽全球嘅法國高級朱古力品牌。店內最受歡迎嘅莫過於果仁朱古力，內含果仁同焦糖杏仁，口感層次非常豐富。而另一款招牌產品係全朱古力餡料嘅馬卡龍，外皮酥軟，雖然味道偏甜，但配上一杯美式咖啡就最能平衡味覺。店員親切友善，會詳細介紹各種朱古力嘅特點，幫助你挑選最適合嘅自選口味禮盒，係送禮好選擇。

（圖片來源：Facebook@La Maison du Chocolat Hong Kong)
【INFO】
《La Maison du Chocolat》
地址：中環金融街8號國際金融中心商場2樓2006號舖
營業時間：星期一至日 11:00 - 20:00

朱古力甜品推介 | 12. Mr Simms Olde Sweet Shoppe

位於中環擺花街嘅 Mr Simms Olde Sweet Shoppe 似一間英式傳統糖果店，無論店外店內嘅裝潢都非常有電影感，入面整齊排列住各式各樣顏色繽紛嘅糖果同朱古力，睇見都覺得開心。店內嘅手工朱古力磚係本地新鮮製造，每塊都特別加入咗堅果或水果乾，唔單止豐富咗咬口，仲增加咗一份清新感。

（圖片來源：Openrice@IvywingyanNG)
【INFO】 
《Mr Simms Olde Sweet Shoppe》 
地址：中環擺花街 37 號地舖 
營業時間： 星期一至四 10:30 - 20:30，星期五至六 10:30 - 21:00，星期日 10:30 - 20:30

——————————————————

Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk