錦田鄉酬恩建醮｜十年一屆嘅「錦田鄉酬恩建醮」雖然已經喺舊年12月落幕，而主辦方延續感恩傳統，亦將喺1月17日開始至23日，舉辦為期7日嘅美食嘉年華，有齊茶果、芝麻卷等地道美食，仲有神功戲以及獅王爭霸賽等，即刻睇吓有咩玩喇～
圖片來源：Facebook@錦田鄉事委員會 Kam Tin Rural Committee | 撰文：Hedy
「錦田鄉十年一屆酬恩建醮委員會」將會喺1月17日至23日期間，舉行慶典活動。以「酬恩演戲、美食嘉年華、獅王爭霸」為核心，延續對周王二公復界之恩嘅感念，更以多元文化體驗拉近傳統與大眾嘅距離。大家都可以透過粵劇、龍獅與美食，感受錦田340年嘅文化底蘊。
錦田鄉酬恩建醮｜ 1. 神功戲演出
作為酬恩傳統嘅核心環節，委員會特邀鴻運粵劇團打造一連7天嘅神功戲演出。梁兆明、龍貫天、康華、王潔清等粵劇名伶將輪番登場，帶來《紫釵記》《啼笑姻緣》《再世紅梅記》等經典劇目，每日日場（13:00）、夜場（19:30）於戲棚內準時開鑼，以悠揚粵韻傳承感恩情懷。
錦田鄉酬恩建醮｜ 2. 美食嘉年華
美食市集將會喺每日11:00至22:00開放，當中包括本土招牌如茶果、老婆餅、芝麻卷等。仲有香氣四溢嘅炭烤牛扒、蜜汁燒雞翼以及香烤魷魚現烤現食。食到口渴仲有超多飲品選擇，包括凍檸茶、港式奶茶等經典飲品，搭配楊枝甘露、芒果西米露等甜湯。仲有以本地食材入酒特製雞尾酒、精釀啤酒，豐富味蕾層次。
錦田鄉酬恩建醮｜3. 獅王爭霸賽
活動期間將同時上演精彩萬分嘅獅王爭霸賽，嚟自粵港澳三地嘅頂尖龍獅隊齊聚現場，以高樁采青、靈活套路競逐「錦田獅王」殊榮，共有28隊參加，絕對係一場精彩嘅賽事！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
