抗癌食物 | 想維持健康嘅生活，除咗要保持運動習慣之外，都要注重日常飲食。再加上近年癌症更有年輕化趨勢，想減低患癌風險絕對要喺飲食方面落手，日本名醫就分享10大有抗癌功效嘅食物，更係研究實證，即刻睇睇！
圖片來源：網上圖片 | 撰文：Hedy
日本北九州市產業醫科大學醫院、癌症名醫佐藤典宏分享想預防癌症，就要每日食用呢10種有抗癌功效嘅食物。當中如果有自己唔鍾意嘅食物都唔需要勉強，亦都冇話要食幾多份量，只要將以上自己鍾意嘅食物，盡可能咁加入每日三餐入面，養成習慣，自然就可以提升身體抗癌能力。除咗以下呢10種食物，佐藤典宏亦都提醒大家要進食肉類，因為蛋白質係人體不可或缺嘅營養素，只要揀選肉類嘅時候避開脂肪較多嘅部分例如雞皮以及五花腩等就可以。
抗癌食物推介 | 1. 十字花科蔬菜
相信提起十字花科蔬菜，大家都絕對唔會陌生！十字花科蔬菜例如西蘭花、椰菜、芥菜以及白菜等具抗炎以及抗癌功效，日本國立癌症研究中心以9萬日本人為對象，並進行研究，發現與攝取最少十字花科食物嘅男性相比，攝取較多嘅男性可以降低癌症死亡風險16％！十字花科蔬菜富含抗癌成分蘿蔔硫素，有強力抗氧化作用，可以抑制癌細胞增生。
抗癌食物推介 | 2. 含豐富油脂魚類
由於飲食容易影響身體慢性發炎，而含豐富油脂嘅魚類例如三文魚、黃花魚、鯖魚以及沙甸魚等，都有omega-3脂肪酸，可以抑制發炎症狀，有降低癌症嘅風險！同時亦有優質蛋白質，日常飲食必備。
抗癌食物推介 | 3. 豆類製品
豆類製品例如豆腐及豆漿等含有金雀異黃酮（Genistein），係一種大豆異黃酮，可以引發內皮素蛋白嘅合成，咁就可以防止癌細胞增生，同時亦會抑制癌細胞生長同擴散嘅能力，可降低胃癌、大腸癌以及卵巢癌死亡風險50%。
抗癌食物推介 | 4. 菇類
蘑菇以及金針菇等菇類食物含有β-葡聚醣，能有助提升身體嘅免疫力，可以預防疾病！同時亦有多項研究證實，進食較多磨菇嘅人士，患癌症風險亦降低34%，對預防乳癌尤其有效。
抗癌食物推介 | 5. 海藻類
海帶及海帶芽等海藻類含有褐藻糖膠，能有助預防癌細胞增生同擴散，同時亦係優質嘅抗氧化劑，可以增加抗癌性免疫細胞活性，從而減低患癌風險。
抗癌食物推介 | 6. 蔥屬蔬菜
蔥屬蔬菜富含有抗氧化效果嘅槲皮素，唔單只可以做到抗癌效果，仲可以預防動脈硬化。同時蔥屬蔬菜具有抗炎、增強免疫系統等特性，可以有助減低患癌風險。大家可以喺日常生活入面多進食洋蔥、蔥以及大蒜等食物。
抗癌食物推介 | 7. 番茄
家常便飯常見嘅番茄炒蛋絕對係健康飲食嘅好選擇！番茄入面嘅茄紅素有抗氧化功效，同時亦可以誘發癌細胞良性分化同凋謝，咁就可以有效抑制癌細胞。
抗癌食物推介 | 8. 紅蘿蔔
紅蘿蔔嘅抗癌能力係嚟自類胡蘿蔔素例如β-胡蘿蔔素等，β-胡蘿蔔素喺體內就會代謝轉換成維他命A，有助於控制癌細胞。根據《英國營養學雜誌》嘅研究指，食紅蘿蔔可以有助減少肺癌風險達42%
抗癌食物推介 | 9. 堅果類
進食堅果例如花生、核桃以及杏仁等，含富含膳食纖維、維他命E以及礦物質，具有抗氧化同抗發炎嘅作用。同時亦有研究證實適量攝取堅果可以減少癌症，同時亦可以減低癌症嘅死亡率。
抗癌食物推介 | 10. 水果
喺日常飲食入面，唔知大家又會唔會食水果呢？研究調查發現，同幾乎唔食水果嘅日本人比較，每個禮拜食一次以上水果嘅日本人，可以降低患胃癌風險約30%。水果入面嘅唔同維他命都可以抑制癌細胞形成同埋生長。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
