芒果甜品可以話係香港人嘅集體回憶，無論係經典嘅楊枝甘露，定係充滿新意嘅芒果冰，都一樣咁受歡迎！芒果嘅香甜多汁，配上唔同嘅甜品，可以變化出千百種口感同風味。今次為大家搜羅咗全港多間人氣芒果甜品店，有芒果專門店、老字號街坊舖，仲有將芒果玩出新花樣嘅創意甜品，令你一試難忘！
圖片來源：Openrice @mochicouple_hk、@麻甩大叔周遊遊、@foodiehkboy、@Mroolong、@wongy1122 | 撰文：Ginger
芒果甜品推介 | 1. 芒B甜品
喺長沙灣嘅芒B甜品，選擇非常多，係典型港式甜品店嘅大包圍，足足有六、七版menu，過百款甜品任你揀！由傳統甜品、紫米系列、芒果撈系列，到榴槤、沙冰、芋圓、椰皇等等，真係總有一款啱你心水。芒B嘅甜品用料高質，特別推薦佢哋嘅香芒忌廉小丸子，小丸子非常煙韌，配上上面香濃嘅忌廉，帶點雲呢拿嘅味道，同香甜嘅芒果非常夾。如果想試吓特別啲嘅，可以揀芒果蛋白椰皇凍，椰子味好香，配埋甜到爆嘅芒果，清甜又透心涼。
【INFO】
《芒B甜品》
地址: 長沙灣青山道195號恆輝樓地舖
營業時間: 星期一至日 14:00 - 01:00
芒果甜品推介 | 2. 皇冠(呂宋芒)專門店
皇冠(呂宋芒)專門店專賣芒果主題嘅甜品，佢哋嘅皇牌甜品皇牌（$88），有齊芒果綿綿冰、奶蓋、雲呢拿雪糕、脆片同埋芒果肉。芒果肉比想像中更香甜，綿綿冰口感有啲似思樂冰，芒果味好天然。上面嘅奶蓋可以中和返甜度，整體味道唔錯。另外，芒果爆珠布甸（$38）都值得一試，布甸份量足夠，芒果味香滑，但口感比較實淨，帶點大菜糕嘅感覺。
【INFO】 《皇冠(呂宋芒)專門店》 地址:荃灣眾安街68號荃灣千色匯I 地下G024號舖 營業時間: 星期一至日 11:00 - 21:00
芒果甜品推介 | 3. 好好甜品
位於太和嘅好好甜品，雖然鋪頭名好簡單，但佢哋嘅出品絕對係高水準！呢度最出名嘅就係用鮮芒果即叫即整甜品，保證你食到最新鮮、最香甜嘅芒果滋味。佢哋嘅芒果小丸子（$42）非常受歡迎，芒果肉甜到爆，芒果汁底香甜又冰凍，配合煙韌彈牙嘅小丸子，口感豐富，令人非常滿足。
【INFO】
《好好甜品》
地址: 太和美新里5號美菱居地下B號舖
營業時間: 星期一至日 15:30 - 00:00
芒果甜品推介 | 4. 甜甜屋
喺西灣河嘅甜甜屋，係一間主打多款創意甜品嘅小店。佢哋除咗有經典嘅芒果綿綿冰同芒果窩夫，最特別嘅係佢哋將芒果同椰皇果凍做crossover，創造出驚喜滿分嘅甜品！呢度嘅芒少爺，配料非常豐富，有芒果粒、西米、芒果汁同小丸子，最特別係有椰皇果凍！芒果粒份量超多，下面嘅椰皇果凍係透明嘅，望落已經好透心涼。果凍味道清甜，只有椰皇嘅清香，完全唔會太甜，同芒果嘅香甜完美融合，係一個非常新穎嘅配搭。
【INFO】
《甜甜屋》
地址: 西灣河西灣河街110號地下B號舖
營業時間: 星期一至日 15:00 - 00:30
芒果甜品推介 | 5. 甜心鮮果園
元朗嘅老街坊，對呢間喺天橋底下嘅「甜心鮮果園」一定唔陌生！呢間小店喺元朗已經有廿幾三十年歷史，憑住真材實料同手工製作，成為唔少街坊心目中嘅「隱世糖水舖」。佢哋嘅自家製芒果卷，用椰汁做嘅煙韌外皮包住厚切芒果，果肉鮮甜多汁，每一啖都充滿濃濃嘅果香，口感層次豐富。而鮮雜果西米露，西米煙韌爽滑，配搭多款新鮮水果，酸甜清新，潤喉又解暑。最值得一提嘅係，佢哋號稱全香港第一間首創嘅芒果炒冰（$50），係用成個芒果榨汁，再整成冰，所以每一啖都勁香芒果味，冰嘅口感又綿又唔易溶，非常特別！
【INFO】
《甜心鮮果園》
地址: 元朗元朗安寧路138號紫荊樓2期地舖
營業時間: 星期一至二、四至日 14:00 - 00:00；星期三 全日休息
芒果甜品推介 | 6. 龍糖坊
喺銅鑼灣逛街行到攰，想搵個地方嘆番碗冰涼甜品？位於波斯富街嘅龍糖坊就係個好選擇！呢間甜品店主打傳統糖水同新派甜品，店面裝潢簡約精緻，坐得非常舒服，係一個令人放鬆嘅好地方。夏天必食嘅，係佢哋兩款招牌芒果甜品：芒多多楊枝甘露雪花冰（$78）同埋芒果河粉（$58）。「芒多多楊枝甘露雪花冰」口感細膩順滑，香甜綿密，入口即化。刨冰面層鋪滿鮮甜多汁嘅新鮮芒果肉、滑溜嘅椰汁蒟蒻凍同埋新鮮奇異果，再淋上芒果汁同椰奶，椰奶可以平衡芒果嘅酸甜，口感層次超豐富，係炎炎夏日嘅完美解暑之選！而「芒果河粉」，用蒟蒻同椰汁製成嘅河粉，口感軟滑冰涼，椰香濃郁，配搭新鮮芒果肉同芒果汁，清爽開胃又消暑，非常特別！
【INFO】
《龍糖坊》
地址: 銅鑼灣波斯富街24-30號寶漢大廈地下A號舖
營業時間: 星期一至日 14:00 - 00:30
芒果甜品推介 | 7. 無嚐
位於筲箕灣東大街嘅無嚐，係一間街坊式甜品店，出品足料又好味，絕對值得一試！無嚐嘅楊枝甘露（$46）非常足料，每一啖都充滿芒果、西米同柚子嘅味道，令人非常滿足。如果你係芒果控，可以試吓佢哋嘅芒果盛，有齊芒果雪糕、鮮芒果、西米、水晶條同芒果果汁，配搭清新，有濃郁嘅芒果味，而且甜度適中，完全唔會太甜。喺炎熱嘅天氣，食一碗咁足料又清甜嘅芒果甜品，真係一大享受！
【INFO】 《無嚐》 地址: 筲箕灣筲箕灣東大街42-52號金來大廈地下E號舖 營業時間: 星期一至日 15:00 - 00:00
芒果甜品推介 | 8. 天后甜品
喺天后呢間天后甜品，營業時間去到凌晨三點，係夜貓子食甜品嘅好去處！呢度主打港式甜品，芒果涼粉撈（$40）將清新可口嘅芒果切成粒狀，搭配滑嫩爽口嘅涼粉，口感層次豐富，食落好有嚼勁，令人喺炎熱嘅天氣中瞬間消暑。佢哋嘅雪糕芒果雪山都係人氣之選，香甜嘅芒果配上滑溜嘅雪糕，簡直係完美配搭！
【INFO】 《天后甜品》 地址: 天后電氣道91號地舖 營業時間: 星期一至日 15:00 - 03:00
芒果甜品推介 | 9. 你好椰
你好椰嘅芒椰脆脆椰子凍，就係將芒果同椰子呢兩種水果嘅美味完美融合。呢款芒椰脆脆椰子凍（$48），直接用原個椰子呈上，賣相非常吸引！頂層鋪滿十幾粒鮮甜芒果，灑上椰子脆脆，增加口感。而下面就係滑溜溜嘅椰子凍，味道清甜，輕盈低糖，食完都唔會覺得膩。
【INFO】 《你好椰》 地址: 石硤尾偉智里2號金玉大廈地下223號舖 營業時間: 星期一至日 11:00 - 22:30
芒果甜品推介 | 10. 甜姨姨私房甜品
甜姨姨私房甜品嘅芒果甜品都一樣咁受歡迎！呢間由電視製作人戚其義同藝人陳豪開設嘅人氣甜品店，以其足料同高水準嘅出品，吸引咗唔少人專程去排隊。喺眾多芒果甜品當中，佢哋嘅芒果大合奏小丸子絕對係芒果控必試！呢款甜品嘅底層係芒果布甸，上面鋪滿大量芒果肉，再配上芒果雪糕同埋芒果汁，可以話係一次過滿足你所有對芒果嘅幻想！小丸子嘅份量都唔少，口感夠煙韌，為成個甜品增添豐富嘅層次感。喺一碗入面，你可以食到芒果肉、芒果乾、芒果汁、芒果雪糕同芒果布甸，真係一次過滿足晒你對唔同芒果類甜品嘅慾望！
【INFO】 《甜姨姨私房甜品》 地址: 天后清風街13號地舖 營業時間: 星期一至日 15:00 - 00:15
芒果甜品推介 | 11. 晶晶甜品
位於灣仔嘅晶晶甜品，係一間主打多款港式甜品嘅小店。佢哋嘅出品都非常有水準，特別係佢哋嘅刨冰，口感綿密到幾乎冇碎冰粒，非常出色！芒果涼粉奶冰嘅芒果非常甜，涼粉口感亦都好滑，最正嘅係佢哋嘅牛奶冰，質感好細滑，口感好輕盈，食落帶有淡淡奶味，同芒果涼粉搭配得非常好，清甜又透心涼。另外，芒果黑糯米豆腐花同芒果黑糯米奶冰都係佢哋嘅人氣甜品，牛奶冰有驚喜，奶味濃郁，口感輕盈，值得一試！
【INFO】 《晶晶甜品》 地址: 灣仔灣仔道8號尚翹峰地下A1號舖 營業時間: 星期一至日 13:00 - 23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
