尖沙咀糖水 | 同朋友飯後唔夠喉，想搵返間糖水舖坐低傾吓偈，即睇以下7間尖沙咀甜品舖推介，有超人氣台式過江龍仙草芋圓甜品店、新派中式糖水舖及主打合桃露傳統糖水店舖等，種類琳瑯滿目，保留傳統糖水文化又加添一點新意。環境乾淨又舒適，最啱同三五知己繼續坐低談心！
圖片來源：研香 Grindie 官方圖片、Openrice @WendyyLamm、@xmelissalamx、@Little.foodoir、@eatwithdumbo、@littleball_is、@BeeTang、@vanessafoodiary、@RheaChim、@eatallyoucan、@Michellesttsui、@sa.foodie.lt、@lst.aa、@foodie illustrator｜撰文：Ginger
尖沙咀糖水舖 | 1. 研香
研香位於厚福街，長期見到人龍，主打合桃露、腰果露、杏仁茶、招牌開心果豆腐花及芝麻糊。店舖糖水主打低糖低油配方，合桃露使用頂級原粒合桃，每日新鮮製造，保留合桃露本身嘅營養成份。另外，招牌開心果豆腐花嚴選意大利開心果，再以特製石磨低溫研磨，有開心果果仁，質感幼滑，甜度輕微，減脂人士都可以放心食！如果每款都想試吓，可以選擇雙拼，例如合桃腰果、芝麻合桃或腰果芝麻。
【INFO】
研香
地址: 尖沙咀厚福街7號地舖
營業時間: 星期一至四 13:30 - 00:00，星期五至日 14:00 - 00:30
尖沙咀糖水舖 | 2. 甘の季節
甘の季節走文青簡約風，環境裝修舒服企理，適合同三五知己坐低傾吓偈食個糖水。提供多款特色甜品，例如紅豆沙、蛋白杏仁露、蜜餞白果腐竹糖水、糖不甩、水果系列綿綿冰，更有芋圓桂花糕涼粉，定價由$28起，性價比非常高！
【INFO】
甘の季節
地址: 尖沙咀堪富利士道6A號地舖
營業時間: 星期一至日 15:00 - 00:00
尖沙咀糖水舖 | 3. 星十五
星十五係一間新派創意中式甜品小店，除咗有糖水提供，更有港式小食格格套餐選擇，例如有「二人六格格套餐」等，即可以選擇兩款甜品或飲品及三款點心組合（每款兩件），定價為$114。中式糖水包括有新會陳皮紅豆沙及特製蓮子合桃露王等選擇，而小食較為特別，有酒釀雞翼、咖喱魚蛋及酒釀糖心蛋等選擇，一次過滿足晒想食鹹食同甜食嘅你！
【INFO】
星十五
地址: 尖沙咀加連威老道26A號地舖
營業時間: 星期一至四 13:30 - 00:00，星期五至六 13:30 - 23:45，00:00 - 00:30，星期日 13:30 - 00:00
尖沙咀糖水舖 | 4. 九龍香格里拉大堂酒廊
位於尖沙咀嘅九龍香格里拉大堂酒廊，最新推出「甜蜜月韻」系列，為大家供應24款中式糖水及多款鹹點！坐喺梳化上面一邊觀賞維港夜景，一邊嘆糖水，有機會仲可以聽到現場音樂表演真係超寫意啊～而且價錢都只係由$38到$78不等，可以食盡生磨芝麻糊、椰汁桃膠雪蓮子西米露、楊枝甘露等，同出面嘅糖水舖差唔多，不過就要另外收加一～無論係視覺定係味覺上都可以帶到驚喜畀大家！
【INFO】
《九龍香格里拉大堂酒廊》
時間：18:30至23:30
地點：九龍香格里拉大堂酒廊（香港九龍尖沙咀東麼地道64號大堂)
尖沙咀糖水舖 | 5. 嚐仙
嚐仙來自台中，大部分材料由台灣直送，每日新鮮製造。主打雙芋、剉冰、黃金地瓜泥、燒仙草、小丸子、紫米、芝麻湯圓等系列糖水，同時有手調鮮奶特飲，台灣茶系列選擇，定價由$29至$55不等。各款甜品冰冰涼涼，非常適合嚟緊夏天享用！
【INFO】 嚐仙 地址: 尖沙咀金馬倫道19號地下A號舖 營業時間: 星期一至四 14:00 - 23:00，星期五至六 14:00 - 00:00，星期日 14:00 - 23:00
尖沙咀糖水舖 | 6. 糖宮甜品專門店
糖宮甜品專門店分為兩層，樓底高，環境舒適闊落。店舖除咗提供各款特色糖水，亦有窩夫、雪花冰及椰皇燉蛋白等選擇。店舖取名大玩創意，例如「菠多野結冰」、「透明人間篇配水晶涼粉」、「一路向西篇配西米露」，玩味感重！
【INFO】 糖宮甜品專門店 地址: 尖沙咀金巴利道88號地舖及1樓 營業時間: 星期一至日 14:00 - 01:30
尖沙咀糖水舖 | 7. 八時神仙草
超人氣台中過江龍仙草甜品店，主要提供四款系列甜品，例如台式飲品系列、暖心系列、甜品系列及雪花系列等。比較受歡迎嘅甜品為芋芋奶蓋麻糬雪花盛盤、芒果嫩仙草雪花盛盤及芋泥嫩仙草盛盤。店舖堅持八小時熬煮仙草而唔加入鹼粉，用舌尖輕彈就會化開，非常嫩滑Q彈，值得一試！
【INFO】 八時神仙草 地址: 尖沙咀厚福街5-6號多富閣地下2號舖 營業時間: 星期一至五 15:00 - 23:30 星期六 14:00 - 00:00 星期日 14:00 - 23:30
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
