炎炎夏日，有咩比嘆一碗冰凍又透心涼嘅刨冰更爽呢？香港嘅甜品店臥虎藏龍，近年刨冰界更係百花齊放，由傳統日式雪花冰、台式綿綿冰，到加入港式Fusion元素，甚至係韓式鮮果雪奶，各式各樣嘅刨冰甜品多到你數唔晒！今次為大家搜羅咗全港多間人氣刨冰店，一齊喺冰涼世界入面尋找夏日小確幸啦！
圖片來源：Facebook@SHARI SHARI Kakigori House 氷屋、@LAB ZERÕ – Dessert Cafe、Instagram@iceyakiz、Openrice@imbean2 、@LizzyC | 撰文：Ginger
刨冰店推介 | 1. Shari Shari Kakigori House 氷屋
講到日式雪花冰，銅鑼灣、中環、旺角同尖沙咀都有分店嘅 SHARI SHARI Kakigori House 氷屋絕對係刨冰界嘅代表！呢間由北海道老闆Shingo主理嘅小店，憑住款款賣相精緻又份量十足嘅日式雪花冰，吸引咗區內外無數人專程嚟朝聖，日日都大排長龍！SHARI SHARI 嘅雪花冰質感幼細綿密，食落入口即溶，好似食緊雪一樣！而且佢哋嘅刨冰非常足料，內外都有滿滿嘅餡料，真係好豐富。最受歡迎嘅口味包括香濃嘅焙茶黃豆粉忌廉味、經典日式風味嘅宇治金時味，仲有清甜嘅芒果椰子味等。佢哋仲會不定時推出期間限定口味，好似暖胃嘅粟子焙茶味、香濃開心果士多啤梨味等，每次去都有新驚喜！
【INFO】
《SHARI SHARI Kakigori House 氷屋》
銅鑼灣店
地址：銅鑼灣加路連山道13號地舖
中環店
地址：中環奧卑利街11號地舖
旺角店
地址：旺角窩打老道45號賀賢居地下A1號舖
尖沙咀店
地址：尖沙咀漆咸道南83-85A號金德大廈地舖
營業時間：星期一至日 12:30 -22:30
刨冰店推介 | 2. 氷燒ICEYAKI
位於北角新開嘅日式甜品專門店氷燒ICEYAKI唔單止主打日式刨冰，仲有每日新鮮製作嘅銅鑼燒，甚至可以預訂小巧精緻嘅和菓子「練切」禮盒，將正宗嘅日本甜品風味帶到香港。氷燒ICEYAKI嘅店主曾遠赴日本留學10年，畢業於日本菓子專門學校嘅和菓子學系，仲喺東京米芝蓮級別嘅刨冰店學習過刨冰技術，將呢份細膩嘅日本職人精神融入自己嘅甜點當中。所以呢度嘅刨冰，無論係口感定味道都非常正宗，配上充滿日式風情嘅店內環境，令人彷彿置身日本街頭甜品店。
【INFO】
《氷燒ICEYAKI》
地址: 北角錦屏街31A號地舖
營業時間: 星期一至日 13:00–22:00
刨冰店推介 | 3. 甜姨姨
甜姨姨主打港式口味日式雪花冰嘅甜品店，標榜所有冰品都採用日本直送冰製作，所以口感特別順滑輕盈，食落真係有入口即溶嘅感覺。而佢哋嘅雪花冰口味更大膽加入港式元素，充滿驚喜！甜姨姨嘅創意口味包括楊枝甘露味、焦糖椰子味，仲有香濃嘅伊朗開心果味等。而最受歡迎嘅「400次髒髒味」更加係邪惡到不得了！呢款刨冰由焦糖脆餅、美祿粉、比利時朱古力雪糖同埋Weiss 85%朱古力醬組成，淋上濃郁嘅朱古力醬一齊食，每一啖都充滿罪惡感但又令人欲罷不能！
【INFO】
《甜姨姨》
銅鑼灣店
地址：銅鑼灣耀華街11號地舖
天后店
地址：天后清風街13號地下
旺角店
地址：旺角煙廠街31號地下C號舖
鑽石山店
地址：鑽石山龍蟠街3號荷里活廣場1樓177號舖
營業時間：星期一至日 12:30-22:30
刨冰店推介 | 4. 八時神仙草
想食正宗台式嫩仙草，又唔想飛去台灣？來自台中人氣仙草甜品店嘅首間海外分店八時神仙草，就將呢份美味帶到香港中環！佢哋主打台式飲品同甜品，特別係嫩仙草，絕對係仙草控嘅福音。八時神仙草最招牌嘅係佢哋嘅仙草冰，採用經過長時間熬煮嘅仙草冰磚打成，所以口感特別軟綿，每一口都品嘗到濃郁嘅仙草味之外，仲可以做到牽絲效果，口感非常特別！
【INFO】
《八時神仙草》
地址: 中環歌賦街19號地舖
營業時間: 星期一至四 12:30 - 22:30，星期五至六 12:30 - 23:00，星期日 12:30 - 22:30
刨冰店推介 | 5. LAB ZERØ
位於尖沙咀嘅 LAB ZERØ唔單止選用日本直送冰磚，仲用埋日本製造嘅製冰機，確保每一杯刨冰嘅口感都幼細綿密到極致。LAB ZERØ 主打嘅有多芒小丸子味同埋杜拜朱古力味，兩款刨冰都內有超多餡料，真係啖啖滿足！刨冰本身細滑，配上豐富嘅配料，口感層次超豐富。除咗美食，呢間Cafe嘅設計都好有特色，店內嘅雲朵裝飾更係唔少食客嘅必打卡位置，成個環境感覺超休閒，如果想搵個靚位打卡，LAB ZERØ 都係個唔錯嘅選擇！
【INFO】
《LAB ZERØ》
地址: 尖沙咀金巴利道68號地下B舖
營業時間: 星期一至日 12:00—23:00
刨冰店推介 | 6. 氷舍
銅鑼灣呢間氷舍將刨冰同麻糬呢兩種人氣甜品完美融合，佢哋提供刨冰、炒冰同刨冰杯三個系列，無論你鍾意傳統刨冰嘅細滑，定係舊式剉冰嘅粗糙口感，呢度都可以滿足到你。氷舍嘅刨冰以日本淨水製成冰磚，口感細膩。而炒冰就係口感比較粗糙嘅舊式人手剉冰，充滿懷舊風味。最特別嘅係，呢三款冰品都會搭配佢哋招牌嘅拉絲牛乳麻糬，口感煙韌無粉，同冰品簡直係絕配！必食推介包括港式味道嘅楊枝甘露麻糬、經典日式嘅抹茶金時、法式風味嘅焦糖，仲有充滿驚喜嘅D24榴槤飄香刨冰同埋泰式榴槤糯米飯。
【INFO】
《氷舍》
地址: 銅鑼灣謝斐道520號地舖
營業時間: 星期日至四 12:00 - 23:30；星期五至六 12:00 - 00:00
刨冰店推介 | 7. 甜圓坊
深水埗基隆街呢間街坊小店甜圓坊價錢親民，大大碗嘅剉冰只需約$35，CP值高！甜圓坊唔單止有豐富嘅甜品選擇，仲提供一系列台式料理，好似蛋餅、鹽酥雞、滷肉飯等，係個可以一次過滿足你鹹甜胃嘅好地方。甜品方面，佢哋有一系列傳統糖水同埋豐富嘅剉冰選擇。招牌刨冰包括招牌綜合芋香剉冰、綿密嘅蜜芋頭剉冰同埋色彩繽紛嘅紅豆牛奶三色冰等。你仲可以按照自己喜好，加購芋圓、西米、珍珠等配料。
【INFO】
《甜圓坊》
地址: 深水埗基隆街205號地下
營業時間: 星期一至日12:00 - 22:00 (逢星期二休息)
刨冰店推介 | 8. 嚐仙
嚟自台中嘅過江龍甜品店嚐仙主打手工芋泥、芋圓同黃金地瓜泥，所以好多冰品都會加入呢啲招牌配料，口感豐富又充滿古早味。如果你係芋泥愛好者，必試佢哋嘅芋泥牛奶冰！喺清甜綿密嘅冰上面，鋪滿紅豆、煙韌珍珠同埋超足料嘅芋泥，每一啖都充滿芋頭嘅香甜。最貼心嘅係，芋泥牛奶冰仲會附送煉奶，你可以按個人喜好調整甜度，啱晒唔同口味嘅朋友。
【INFO】
《嚐仙》
地址: 元朗元龍街9號形點1期1樓1091號舖
營業時間: 星期一至四 14:00 - 23:00 ，星期五至六 14:00 - 00:00，星期日 14:00 - 23:00
刨冰店推介 | 9. 鮮芋仙
來自台灣嘅人氣過江龍甜品店鮮芋仙，憑住佢哋Q彈嫩滑嘅芋圓，喺香港都一樣咁受歡迎！除咗各式各樣嘅芋圓甜品同飲品之外，鮮芋仙都提供兩款份量十足嘅牛奶冰，包括布丁Q麻糬牛奶冰，配料非常豐富，有雞蛋布丁、杏仁布丁、小芋圓、Q麻糬同埋冬瓜凍，中間就係綿滑嘅牛奶冰，口感層次超多；另一款係芋薯圓Q麻糬牛奶冰，主要配搭係芋薯圓、小芋圓、Q麻糬同埋冬瓜凍。
【INFO】 《鮮芋仙》 地址: 銅鑼灣登龍街18號V Point 地下1號舖 營業時間: 星期一至四 12:30 - 23:30，星期五至六 12:30 - 02:00，星期日 12:30 - 23:30
刨冰店推介 | 10. 蘇三甜蜜
想試吓懷舊港式Fusion甜品？咁你一定要去銅鑼灣加路連山道嘅「蘇三甜蜜」！呢間糖水舖將香港傳統嘅中式糖水融入西式元素，而且店舖裝潢以70年代懷舊港風做主題，好有花樣年華嘅感覺，係打卡嘅絕佳地點！「蘇三甜蜜」嘅刨冰份量非常巨大，好似佢哋嘅招牌黑芝麻芒果冰蘇（$128），黑芝麻配芒果呢個配搭雖然少見，但竟然出奇地夾！上枱嗰陣，刨冰會用膠片包住，一開就會有「山泥傾瀉」嘅壯觀場面，打卡必影！黑芝麻醬味道超濃郁，食落好似芝麻糊咁，另一款醬就似芝士奶蓋，同刨冰好夾。最正係入面有好多粒又甜又新鮮嘅芒果，仲有小丸子、芒果蓉同超少見嘅糖蔥等多款配料，俾你自己Mix and Match，變化出超多種組合！
【INFO】 《蘇三甜蜜》 地址: 銅鑼灣加路連山道15號地舖 營業時間: 星期一至日 14:00 - 23:00
刨冰店推介 | 11. Nun Dessert Cafe
韓式刨冰近年都成為大熱甜品之一，旺角Nun Dessert Cafe主打各式各樣嘅韓式甜品，特別係佢哋嘅鮮果雪奶！呢度嘅雪奶係將牛奶冷凍成冰再刨碎，所以冰品奶味濃郁，口感紮實，配上新鮮水果同煉奶，係一個非常清新又美味嘅配搭。Nun Dessert Cafe 嘅招牌甜品有蜜瓜雪奶同埋士多啤梨雪奶，每款雪奶份量都非常足料，刨冰上鋪滿新鮮水果，顏色鮮豔又吸引，非常適合同好友一齊分享！
【INFO】
《Nun Dessert Cafe》
地址: 旺角通菜街119號地舖
營業時間:星期一至五 14:00 - 02:00，星期六至日 13:00 - 02:00
刨冰店推介 | 12. Tommy Yummy
講起泰式雪花冰，就不得不提首先座落於中環嘅 Tommy Yummy，佢哋將泰國嘅清涼滋味帶到香港。Tommy Yummy 主打泰式芒果乳酪疊疊冰，每份份量超多，足夠2-3人分享，絕對係打卡必備！刨冰上面仲有原條芒果雪棒，一次過享受到唔同質感嘅芒果，真係芒果控嘅天堂！除咗招牌雪花冰，Tommy Yummy 仲有其他泰式甜品選擇，例如泰式奶茶雪糕、椰殻椰子雪糕等等。
【INFO】
《Tommy Yummy》
中環店
地址: 中環威靈頓街98號翡翠中心1樓
元朗店
地址: 元朗朗樂路1號元點1樓B147號舖
將軍澳店
地址: 將軍澳康城路1號The LOHAS康城3樓352A號舖
營業時間: 星期一至四 11:30 - 22:00，星期五至日 11:30 - 23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
