正所謂「中秋佳節興團圓」，除咗一家大細一齊食餐飯、品嚐月餅之外，食返碗暖笠笠嘅湯圓亦係其中一個好意頭嘅傳統習俗，象徵「人月兩團圓」。小編就為大家介紹6間香港老字號糖水舖，當中多間曾獲得米芝蓮認證，無論傳統中式糖水或湯圓都有質素保證，今個中秋就最愛嘅人一齊品嚐啦！
圖片來源：Facebook @地茂館甜品、@晶晶甜品、@甘露甜品、Openrice @9upeat、@Wildchildcarol、@rbylife、@JoyfullFoodstagram、@susanfan0706、@joanlaw22、@愛食、@WaiMingTin、@kermitfatfatfat、福元湯圓｜撰文：Icy
| （廣告時間） |
中式糖水推介｜1. 地茂館甜品
來自九龍城嘅地茂館甜品係已經開業30多年嘅老字號，主打多款新鮮自家製嘅中式生磨糖水，例如合桃露、蛋白杏仁茶、芝麻糊等等，香滑滋補，多年來吸引唔少街坊，甚至係明星幫襯。
地茂館甜品出產嘅湯圓，每一粒都係由人手包製而成，外型渾圓飽滿，包住香濃嘅芝麻餡料，更帶有流心效果！而糖不甩亦同樣出色，沾上香脆嘅花生碎，口感煙韌彈牙！
（圖片來源：Facebook @地茂館甜品）
【INFO】
地址：九龍城福佬村道47號地舖 / 將軍澳廣場1-036舖 / 屯門時代廣場北翼地下43舖 / 九龍灣淘大商場三期G281舖 / 沙田好運中心3106舖
時間：星期一至日 12:00-00:00（九龍城總店）
星期一至日 12:00-23:00（將軍澳分店）
星期一至日 14:00-23:30（屯門分店）
星期一至日 13:30-00:00（九龍灣分店）
星期一至日 12:30-23:30（沙田分店）
官方網站：Facebook @地茂館甜品
中式糖水推介｜2. 佳佳甜品
來自佐敦嘅佳佳甜品開業已有40多年，其出品嘅中式糖水味道正宗，多年獲得米芝蓮認證，分店更開到去台灣！店舖裝潢看似平平無奇，但糖水選擇十分多元化，例如芝麻糊、合桃露、陳皮紅豆沙、腐竹糖水等等。
佳佳甜品主打嘅手工寧波薑汁湯圓，粒粒口感軟糯，薑汁味道十分香濃，中間芝麻餡亦非常飽滿足料，秋風起嘅時候食可以驅寒，暖一暖身！
【INFO】
地址：佐敦寧波街29號地舖
時間：星期一至日 12:00-00:30
中式糖水推介｜3. 福元湯圓
位於炮台山嘅30多年老字號福元湯圓，主打馳名爆漿湯圓，粒粒以人手製作，皮薄餡靚唔黐牙，唔怪得係2021年獲得米芝蓮嘅推薦！
湯圓有黑芝麻同花生兩款口味選擇，自家生磨餡料，再加入豬油炒香，味道香甜可口，更有流心效果。另外亦推薦大家試吓杏仁茶配湯圓，口感滑溜濃郁，加上飽滿有咬口嘅湯圓，食落好有滿足感。
【INFO】
地址：北角炮台山福元街7號利都樓地下I-1號舖
時間：星期一至日 16:00-00:00
官方網站：福元湯圓
中式糖水推介｜4. 晶晶甜品
位於灣仔嘅31年老字號晶晶甜品，主打結合傳統與創新嘅糖水甜品，好多款都係$20起。除咗留得住老顧客嘅胃，仲吸引唔少鍾意試新嘢嘅年輕顧客，所以店外經常大排長龍。
（圖片來源：Facebook @晶晶甜品）
當中老闆自創嘅酒心湯圓，餡料含有植物油同天津玫瑰露酒，配上香辣嘅薑汁，暖胃之餘又唔會太重酒味，好易入口。而奶黃湯圓就好似流心奶黃包咁，一咬落去即刻爆漿，味道香甜可口，小朋友一定會好鍾意食！
（圖片來源：Facebook @晶晶甜品）
【INFO】
地址：灣仔灣仔道8號尚翹峰地下A1號舖
時間：星期一至日 13:00-23:00
官方網站：Facebook @晶晶甜品
中式糖水推介｜5. 甘露甜品
座落於土瓜灣嘅甘露甜品，唔好睇佢店面細細間平凡無奇，其實開業已達40年，主打各種性價比高嘅傳統中式糖水，價錢大部份都係20幾蚊，充滿人情味。
（圖片來源：Facebook @甘露甜品、Openrice @susanfan0706）
店舖嘅麻蓉湯圓以香甜而又唔會太辣嘅薑汁作為湯底，大大粒嘅湯圓皮薄而且煙韌，中間麻蓉爆餡，都只售$22。秋天嘅時候同家人朋友一齊食就最溫馨啦！
【INFO】
地址：土瓜灣美景街50號
時間：星期一至日 14:30-01:00
官方網站：Facebook @甘露甜品
中式糖水推介｜6. 大良鴻輝記
屹立係荃灣嘅大良鴻輝記，已經開業20多年，一直深受街坊歡迎。店舖供應多款抵食中式糖水，例如桑寄生蓮子蛋茶、燉鮮奶、木瓜燉雪耳、合桃糊、黃金蕃薯糖水等等。另外仲有消暑之選芒果芋圓西米露，芋圓由台灣九份空運入貨，好重芋頭同地瓜味，口感「Q彈」。
（圖片來源：Openrice @joanlaw22、@愛食、@WaiMingTin）
每到中秋時分，好多人都會係度食碗熱辣辣嘅薑茶湯圓，或者買外賣生湯圓。每粒湯圓都好飽滿，外皮咬落煙韌，餡料甜度適中，同家人一齊食特別甜蜜蜜！
【INFO】
地址：荃灣川龍街8號地舖
時間：星期一至日 15:00-00:00
