就快迎接2024年，相信好多人都會約埋一大班親朋好友齊齊倒數，如果玩通宵都未夠盡興，不如順便去觀賞2024年第一個日出啦。今次小編為大家推薦8大元旦睇日出地點同路線，唔單止方便易去，唔驚蕩失路，仲有多個靚景打卡位，即睇以下元旦日出地點介紹及前往方法啦！
圖片來源：Instagram @missssschloe、@lamhoyan3845、@lamei.poodle、@pricillalahaha、@york.york.freestyle_traveler、香港旅遊發展局、Flickr@Raita Futo、《新聞女王》劇照 | 撰文：Icy
元旦日出 | 地點1 – 紅香爐峰
位於港島區寶馬山嘅紅香爐峰只有230米高，路程唔算崎嶇，全程30分鐘就可以輕鬆到達山頂。雖然途中會經過較為斜嘅山徑以及需攀爬大石，但登上紅香爐峰後，就可以飽覽城市風以及維港海景。由於景觀十分開揚，所以好適合賞日出，啱晒忙碌嘅都市人或者行山新手啊！
【INFO】 前往方法：於銅鑼灣站乘搭25號小巴，於寶馬山總站落車，再沿著聖貞德中學旁邊嘅階梯進入山徑
元旦日出 | 地點2 – 格仔山
最近大熱劇集「新聞女王」中，張家妍（李施嬅飾）經常去釋放壓力嘅地方就係格仔山。位於樂富嘅格仔山唔單止鄰近地鐵站，由起步到登上山頂都只需要約30至45分鐘，路程平坦易走，係市區行山賞日出嘅好去處！以前嘅格仔山主要為飛機引航，方便機師將飛機降落，因此外型特別髹上紅白相間嘅格子圖案，非常矚目。雖然山高只有海拔98米，但山頂景觀開揚，可遠望九龍仔一帶嘅景色。
【INFO】 前往方法：由樂富地鐵站A出口出發，沿著聯合道直行，就會到達登山入口，登上山頂需順著樂富配水庫休憩花園方向走
元旦日出 | 地點3 – 鯉魚門石礦場
鯉魚門三家村歷史達150多年，保留住舊式香港漁村以及避風塘風貌，別具香港本土特色。揸車或搭車去到鯉魚門牌坊，穿過三家村走入後方嘅石礦場，需時唔使30分鐘，沿路都係平地，可以輕鬆欣賞無敵大海景以及遠望對岸繁華嘅港島景緻，吸引唔少人前往賞日出！
【INFO】 前往方法：由油塘地鐵站A2出口出發，轉乘24號綠色小巴至三家村渡輪碼頭，沿著海鮮檔及民居往前走，就會到達石礦場
元旦日出｜地點4 – 嘉頓山
相信大家都唔會對嘉頓山感到陌生，地理位置十分方便易去，只需要由深水埗地鐵站D1出口步行約15分鐘，到達嘉頓山入口後，再沿着400多級嘅樓梯路往上走，就能夠直達賞日出嘅最佳位置。雖然嘉頓山只係一座約高90米嘅小山，但位於半高處俯瞰密密麻麻嘅城市街景，暫時從繁忙嘅都市抽離，帶俾人充電嘅感覺！
【INFO】 前往方法：由深水埗地鐵站D1出口出發，經過高登電腦中心，步行約15分鐘後，就會到達位於嘉頓麵包廠房附近嘅嘉頓山入口
元旦日出｜地點5 – 九龍灣平山
位於九龍灣彩德邨嘅小山丘「平山」，山高約188米，由九龍灣地鐵站B出口出發，經過天橋再沿着彩榮路斜路向上走，直至登上山頂都只需大概30分鐘。係山頂上可以遠眺九龍半島同啟德機場，以及飽覽獅子山日出美景，啱晒大家倒數完之後，即興約埋親朋好友上山賞日出！
【INFO】 前往方法：由九龍灣地鐵站B出口出發，經過天橋再沿着彩榮路斜路向上走，到達位於迴旋處嘅平山入口
元旦日出｜地點6 – 紅燈山
位於何文田同土瓜灣附近嘅紅燈山，海拔約高106米。傳聞喺舊啟德機場年代，紅燈山曾設有閃住紅燈光嘅燈塔，因而得名。紅燈山全程都係石屎路，所以登山難度唔高，只需大約30分鐘就可到達觀景草地。喺何文田上配水庫遊樂場及常樂街花園，其實已經見到城市美景，如果想登頂都只需要再行前少少。現時附近設有涼亭及洗手間等配套，加上交通四通八達，因此成為大家輕鬆快閃上山睇日出嘅好選擇！不過紅燈山上山路線較狹窄，大家上山時要小心安全。
【INFO】 前往方法：由何文田地鐵站B2出口出發，步行至京士柏食水配水庫閘口，再沿著梯級走上12號山頂
元旦日出｜地點7 – 太平山頂
講到欣賞香港都市靚景嘅最佳位置，點少得太平山頂。太平山頂海拔達428米，企喺山頂最高點可以鳥瞰整個維港景色，日出美景無阻擋咁映入眼簾。睇完日出之後，仲可以沿著山頂環迴步行徑晨運，從多角度欣賞香港島風景。由於元旦通常比較多人選擇係太平山頂賞日出，所以建議大家係日出時間前兩三個小時就出發霸定位啦！
【INFO】 前往方法：由中環地鐵站J2出口出發，步行約15分鐘即可到達中環花園道山頂纜車總站入口（凌晨出發建議乘坐的士或步行上山頂）
元旦日出｜地點8 – 石澳沙灘
如果想去遠少少賞日出，感受香港郊外山水美景，不妨選擇去石澳沙灘。石澳沙灘擁有水清沙幼嘅環境同一望無際嘅海景，聽住陣陣海浪聲，同身邊重要嘅人一齊迎接2024年第一個日出，可謂非常寫意！沙灘附近仲會有數間士多以及餐廳，欣賞完日出就可以順便嘆返個靚早餐啦。
【INFO】 前往方法：由筲箕灣地鐵站A3出口出發，轉乘9號城巴或紅色公共小巴前往石澳沙灘
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
