鬼節 | 每年農曆七月十五日為盂蘭節，相傳呢個時候亦都係鬼門關大開嘅日子，當中原來都有10大禁忌要留意，最好喺呢個時間都要避免做，否則隨時有嘢跟你返屋企？！
圖片來源：《黑市》劇照 | 撰文：Hedy
喺民間習俗入面，鬼門關大開嘅日子代表陰陽兩界開始相通。今年農曆七月鬼門關大開嘅日子為8月3日晚上11點，直到9月2日晚上11點先會關鬼門。如果想安全渡過農曆七月，就要小心以下禁忌，並唔係鼓勵大家要迷信，不過俗語都有話：「寧可信其有，不可信其無」，所以大家都要特別小心，避免不必要嘅事情發生！
鬼節禁忌 | 1. 切忌八卦路邊燒街衣
喺盂蘭節期間，大家都會見到有唔少人喺路邊燒街衣，以祭先人或布施遊魂。呢個時間大家絕對唔好行近或者講不敬嘅說話，因為呢啲地方容易聚集唔少遊魂爭奪衣紙元寶，講錯說話隨時招惹「朋友」！
鬼節禁忌 | 2. 切忌貪心
喺路邊燒街衣嘅時候，大家或者都會見到祭品同埋銀幣，呢個時候絕對唔好貪心攞返屋企，因為呢啲銀幣係作為布施給遊魂們，如果據為己有的話就會唔吉利，隨時會令你輸一大筆錢或者生病！
鬼節禁忌 | 3. 切忌夜歸
如果大家唔係因為工作關係，就建議大家喺呢個農曆7月都要減少夜歸嘅情況，夜晚11點後正正係陰陽交替之時，靈氣亦都會相對混濁，所以大家或者會較容易見到「朋友們」出沒。想避免呢個情況，就要早啲返屋企啦～
鬼節禁忌 | 4. 入住酒店要留意！
8月絕對係旅遊嘅旺季，當大家出遊住酒店嘅時候就要特別留意，要避免住尾房，因為煞氣及陰氣都會聚集喺長走廊嘅尾房，應盡量避免入住。同時喺入房門之前先敲門，以提醒「朋友」有人入住。夜晚瞓覺嘅時候都建議要長開洗手間嘅燈，等同有陽氣喺度，咁就可以安心瞓覺～
鬼節禁忌 | 5. 夜晚要避開海邊
農曆七月嘅時候，大家喺夜晚嘅時間都應該要避免去沙灘同埋海邊，就連游夜水都要避免！相傳呢啲地方都有唔少水鬼搵替身，而水鬼嘅怨氣亦相當重，隨時會拉你落水，所以較容易出現遇溺死亡等情況。
鬼節禁忌 | 6. 切忌穿紅色黑色衣服
就連喺衣著顏色方面原來都有避忌，大家都應該避免著全身紅色以及黑色，黑色帶有不詳嘅意味，而且亦較容易招惹鬼魂。而身穿紅色衣服就似厲鬼，更容易引起鬼魂注意。
鬼節禁忌 | 7. 吹口哨
如果大家平時都有吹口哨嘅習慣，就絕對要喺呢個月嘅夜晚避免吹～相傳口哨嘅音頻同陰間頻率較為相近，只要你一吹口哨，就隨時會將遊魂野鬼召喚過嚟自己身邊。記得提提身邊吹口哨嘅朋友要注意！
鬼節禁忌 | 8. 切忌熬夜
午夜時分係陰氣最重嘅時候，而人氣亦都喺深夜最虛，所以大家應該避免熬夜，早啲返屋企同埋早啲瞓覺！
鬼節禁忌 | 9. 切忌在床邊掛風鈴
風鈴嘅鈴鐺聲容易吸引到唔同空間嘅靈體，如果本來風鈴掛喺床邊，就會令你瞓覺嘅時候更容易被入侵，隨時招惹「朋友」入屋。
鬼節禁忌 | 10. 切忌搭尾班車
同朋友出街或者慶祝生日，隨時都會因為傾得太耐計，而導致要搭尾班車。大家應該要避免今個月出夜街，由於每日夜晚11點後係陰氣最重嘅時候，係呢個時間或之後搭尾班車，隨時身邊都已經坐滿好多「朋友仔」跟你一齊返屋企～
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
