韓國櫻花2026 | 每年3月底到4月初，都係韓國最浪漫嘅櫻花季，到處洋溢浪漫嘅氣氛。今次小編精選7大韓國賞櫻必訪景點，交通方便又超好打卡，仲有最新花期預測，即刻bookmark啦！
圖片來源：韓國觀光公社、首爾市官方網站、小紅書@雪地里的雪兔、小紅書@Zoio、小紅書@一天一杯西瓜汁、小紅書@左哥勇闖天涯、小紅書@桃子書書、小紅書@七娘 | 撰文：Icy
最近韓國觀光公社公布咗2026年最佳賞櫻時間，櫻花由開花到最美高峰期通常約一星期後，而全韓國嘅最佳賞櫻期大致集中喺3月下旬至4月上旬。
韓國賞櫻景點 | 1. 石村湖
石村湖佔地達66,000坪，環湖散步路全長約2.5公里，沿途種植約1,000棵櫻花樹，形成一條浪漫嘅櫻花步道。粉色花海與清澈湖水、附近嘅樂天世界城堡互相輝映，景色靚到好似走進童話世界！櫻花季期間，現場仲會舉行音樂祭、街頭表演、圖騰繪畫等各式活動，充滿春日氣息～
【INFO】 石村湖 地址：韓國首爾松坡區三學士路136 開放時間：每日24小時開放 前往方法：乘搭首爾地鐵2號線，於「蠶室站」下車，從2號出口步行約5分鐘
韓國賞櫻景點 | 2. 慶熙大學
位於東大門區嘅慶熙大學，以充滿氣勢嘅哥德式宮殿建築聞名，整個校園都散發住濃厚嘅古典氣息。每到4月初櫻花盛開嘅時候，校園大道兩旁、噴水池附近及小公園一帶，都會開滿櫻花，粉色花海配上歐式校園建築，畫面特別浪漫～
【INFO】 慶熙大學 地址：韓國首爾東大門區回基洞1號 開放時間：每日24小時開放 前往方法：乘搭首爾地鐵1號線，於「回基站」下車，從1號出口步行約10分鐘
韓國賞櫻景點 | 3. 首爾林
首爾林鄰近潮流聖地聖水洞商圈，周邊林立各式特色咖啡店與品牌小店，係唔少年輕人喜愛嘅散步地點。每到春季，公園11號出口附近會化身為夢幻櫻花園，橋旁一棵棵高大嘅櫻花樹連成浪漫櫻花路，淡粉色嘅櫻花綻放得十分茂密。運氣好嘅話，仲有機會見到園內漫步嘅梅花鹿～
【INFO】 首爾林 地址：韓國首爾城東區纛島路273 開放時間：每日24小時開放 前往方法：乘搭首爾地鐵盆唐線，於「首爾林站」下車，從4號出口步行約5分鐘
韓國賞櫻景點 | 4. 汝矣島輪中路
汝矣島輪中路鄰近漢江公園，全長約1.7公里嘅輪中路兩旁種滿約1,400棵櫻花樹，每到4月中旬，都會形成壯觀又浪漫嘅櫻花隧道，大家一邊散步一邊賞花，氣氛超級愜意。今年4月8日至12日期間仲會舉行汝矣島櫻花節，現場設有舞台表演、小食攤位同夜間點燈等活動，氣氛非常熱鬧！
【INFO】 汝矣島輪中路 地址：韓國首爾永登浦區汝矣島洞 開放時間：每日24小時開放 前往方法：乘搭首爾地鐵9號線，於「國會議事堂站」下車，從6號出口步行約5分鐘
韓國賞櫻景點 | 5. 昌慶宮
昌慶宮建於朝鮮王朝時期，宮殿環境清幽典雅，散發濃厚歷史氣息，因此吸引唔少遊客專程著上韓服嚟打卡。每到4月中旬，宮殿周邊會化身成一片淡粉色嘅櫻花海，花朵盛放與古典建築相映成趣。除咗櫻花之外，仲可以欣賞到梅花、山茱萸同杜鵑花等花卉，充滿詩意～
【INFO】 昌慶宮 地址：韓國首爾鐘路區昌慶宮路185 開放時間：每日09:00-21:00（逢星期一休息） 前往方法：乘搭首爾地鐵4號線，於「惠化站」下車，從4號出口步行約10分鐘
韓國賞櫻景點 | 6. 自由公園
如果唔想喺市區同人迫，距離首爾約1小時車程嘅自由公園都係一個唔錯嘅賞櫻點。公園入面嘅櫻花樹特別高大，沿住階梯一直走到松月洞童話村，道路兩旁幾乎都被櫻花包圍，花瓣隨風飄落，畫面特別浪漫。唔少韓劇例如《鬼怪》，都曾經喺呢度取景！
【INFO】 自由公園 地址：韓國仁川廣域市中區濟物梁路232號街46 開放時間：每日24小時開放 前往方法：乘搭首都圈電鐵1號線，於「仁川站」下車，從1號出口步行約5分鐘
韓國賞櫻景點 | 7. 一山湖水公園
位於首爾近郊嘅一山湖水公園，面積達30萬坪。公園環境開揚寬敞，散步非常舒服，唔會覺得擠迫。唔少韓劇例如《原來是美男》、《Dream High》等等，都曾經喺呢度取景！每逢櫻花季，湖畔都會被粉色櫻花海包圍，沿途仲設有鞦韆同長凳，非常適合影靚相，感受春天氣氛～
【INFO】 一山湖水公園 地址：韓國京畿道高陽市一山東區湖水路595 開放時間：每日24小時開放 前往方法：乘搭首都圈電鐵3號線，於「鼎缽山站」下車，從1號出口步行約10分鐘
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
