深圳動物園 | 深圳近年愈開愈多室內動物園同親子農莊，唔單止可以近距離接觸小動物，仲可以認識生態知識，寓學習於娛樂。今次小編就整理出8大超人氣深圳動物園，不論係親子放電，定係同朋友出遊，都一定搵到啱心水嘅選擇，即刻睇下邊個啱你玩啦！
圖片來源：Klook、小紅書@千羅動物樂園、小紅書@真真還是假假、小紅書@愛摸魚的生活小書、小紅書@桔子醬三三、小紅書@阿薯爬爬走、小紅書@湯姆親子遊、小紅書@關關家的PP仔、小紅書@Lannncy_ | 撰文：Icy
深圳動物園推薦 | 1. 深圳WOWO窩窩萌寵森友會
「深圳WOWO窩窩萌寵森友會」地理位置好方便，鄰近世界之窗，佔地面積達5000多平方米。園內設有多個互動區域，例如萌寵區、異寵區、鳥語苑、爬寵區，飼養近千隻小動物，包括水豚、黑鼻羊、梅花鹿、浣熊等等，每隻都健康又可愛，大家仲可以親自投喂，同小動物零距離接觸！
【INFO】 深圳WOWO窩窩萌寵森友會 地址：深圳市沙河街道東方社區深南大道9037號世界之窗 前往方法：深圳地鐵1號線「世界之窗站」H出口 營業時間：星期一至日 10:00-18:30 票價：單人票¥72、一大一小親子票¥96、二大一小家庭票¥142
深圳動物園推薦 | 2. 千羅動物樂園
「千羅動物樂園」位於光明藍鯨世界內，佔地約1300平方米，主打沉浸式體驗及親子科普教育。場內飼養超過40種動物，包括爬蟲、雀鳥、寵物豬、小貓、小鹿、兔仔等，小朋友可以近距離接觸小動物，從互動之中學習新知識。另外，場內仲設有滑梯、波波池、枕頭大戰區等兒童遊樂設施，等小朋友可以盡情放電，玩足一日都唔會悶～
【INFO】 千羅動物樂園 地址：深圳市光明區龍光藍鯨世界G層 前往方法：深圳地鐵6號線「鳳凰城站」A出口 營業時間：星期一至日 10:00-21:30 票價：一大一小親子票￥99、兩大一小親子票￥169
深圳動物園推薦 | 3. 深圳野恩動物樂園
「深圳野恩動物樂園」位於龍崗萬達廣場內，佔地達32,000平方米。場內動物種類豐富，有土撥鼠、羊駝、小羊、鸚鵡、蜥蜴，甚至小馬等可愛動物，小朋友可以近距離接觸同餵食，仲有工作人員在旁細心講解生態知識，邊玩邊學更有趣。另外，場內仲設有滑梯、波波池等娛樂設施，一站式滿足玩樂及學習需求～
【INFO】 深圳野恩動物樂園 地址：深圳市龍崗區華南二道龍崗萬達廣場4樓4022-4026號 前往方法：深圳地鐵10號線「華南城站」A出口 營業時間：星期一至日 10:00-22:00 票價：單人票加投餵包¥109、雙人票加投餵包¥190、一大一小親子票加投餵包￥154、兩大一小親子票加投餵包￥199
深圳動物園推薦 | 4. 深圳Lollypet萌寵樂園
「深圳Lollypet萌寵樂園」係一個室內迷你動物園，於羅湖及福田均設有分店，飼養超過20種小動物，例如水豚、羊駝、小香豬、浣熊、小鹿、狐獴等，性格溫馴親人。店內環境乾淨無異味，大家可以喺飼養員嘅指引下，近距離抱抱同餵飼動物，非常適合親子同遊！
【INFO】 深圳Lollypet萌寵樂園 地址：深圳市羅湖區笋崗街道筍西社區梅園路71號萬象食家第4層L418B/深圳市福田區華強北街道中航城君尚購物中心B區3樓L312A 前往方法：深圳地鐵7號線「笋崗地鐵站」A出口/深圳地鐵1號線「華強路站」B出口 營業時間：星期一至日 10:00-22:00 票價：單人票¥85、雙人票¥164、親子票¥146、長者票¥63
深圳動物園推薦 | 5. 深圳野生動物園
位於南山區嘅「深圳野生動物園」佔地達120萬平方米，園區設計仿照自然生態環境，並劃分為四大主題區，包括食草動物區、猛獸谷、表演區及科普館展廳。園內飼養及放養超過300種野生動物，遊客可以乘坐叢林巴士，近距離觀賞猛獸，甚至餵飼老虎、獅子、黑熊等。園內亦有多種珍稀動物，例如大熊貓、華南虎、金絲猴等，物種豐富又具教育意義～
【INFO】 深圳野生動物園 地址：深圳市南山區西麗湖路4086號 前往方法：深圳地鐵7號綫「西麗湖站」B出口 營業時間：星期一至日 09:30-18:00 票價：一日票¥86、2日票¥129
深圳動物園推薦 | 6. 阿多羅堡萌寵工場
「阿多羅堡萌寵工場」位於荷蘭花卉小鎮內，雖然規模唔算大型，但環境整潔溫馨，非常適合小朋友喺安全嘅環境下，接觸各種溫馴嘅小動物，例如貓咪、天竺鼠、小香豬、小鹿、雪貂、羊駝，甚至仲有小蛇、鱷魚龜、蜥蜴等稀有爬蟲類，體驗多元又有趣！
【INFO】 阿多羅堡萌寵工場 地址：深圳市南山區荷蘭花卉小鎮A4-02 前往方法：深圳地鐵1號線「大新站」B出口 營業時間：星期一至三及五 11:30-19:00、星期六及日 10:00-19:00 票價：免費入場
深圳動物園推薦 | 7. 光明K33農場恐龍主題農莊
「光明K33農場恐龍主題農莊」係深圳大型侏羅紀恐龍主題樂園，結合自然農場元素，打造多元體驗。園內設有恐龍谷、叢林穿越、叢林魔網、無動力樂園、滑草區同油菜花田等多個主題區，同時亦有萌寵互動區，小朋友可以近距離接觸同餵飼羊駝、小鹿、兔仔、鸚鵡等可愛動物，寓玩樂於學習～
【INFO】 光明K33農場恐龍主題農莊 地址：深圳市光明區新湖街道樓村一號路 K33探索農場 前往方法：深圳地鐵6號線「光明大街站」轉搭的士約10分鐘 營業時間：星期一至日 10:00-18:30 票價：單人票¥39.9、一大一小親子票¥59.9、兩大一小親子票¥89.9
深圳動物園推薦 | 8. 光明農場大觀園
「光明農場大觀園」主打農場體驗及農業科普教育，園內分為光明農科大觀園、光明滑草遊樂園、採摘園、桑基魚塘等多個主題區。大家除咗可以親近大自然、欣賞四季不同嘅花海，仲可以觀看奶牛擠奶、親手採摘農作物，體驗農耕樂趣。另外，園內亦設有小動物互動區，可以餵飼小牛、小鹿、小羊等，讓小朋友近距離接觸動物！
【INFO】 光明農場大觀園 地址：深圳市光明區光明街道逕口社區碧水路88號 前往方法：於深圳灣口岸乘坐M206路至「光明中心站」，再轉乘B807路巴士 營業時間：星期一至日 09:00-22:00 票價：成人¥73、小童¥36、長者¥36（1.2米以下小童及70歲以上長者免費入場）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
