日本新鈔 | 相信大家每年都有機會去幾次日本，而日本將會喺7月正式發行新鈔，如果準備去日本玩嘅大家就要留意啦！如果本身仲持有舊鈔嘅話，究竟又用唔用得呢？
圖片來源：国立印刷局、網上圖片 | 撰文：Hedy
日本財務省早前宣布將會喺7月3日發行新鈔，當中包括10000日圓、5000日圓以及1000日圓。新紙幣上正面嘅肖像人物更會分別變為涉澤榮一、津田梅子以及北里柴三郎。而背面亦都分別改為東京車站、紫藤花以及神奈川沖浪裏等背景。每個人物肖像都採用咗全像3D技術，喺偽造防範上面做足功夫！
日本新鈔 | 手持舊鈔可用嗎？
相信大家最近可能都趁匯率低嘅時候，換定唔少日元，留待去旅行嘅時候用。咁如果大家仲手持舊鈔，又可唔可以用呢？其實無論係新鈔定係舊鈔，大家都可以繼續使用，絕對可以繼續攞住舊鈔去買嘢，完全唔需要擔心！日本財務大臣鈴木亦都強調，目前流通嘅日本紙幣，喺發行新鈔後可繼續使用！反而攞到新鈔嘅人士要注意啦，因為唔係任何地方都必定用到！
日本新鈔 | 未必100%支援新鈔
由於日本將會喺7月3日先會全面換新鈔，當大家攞到新鈔後未必可以喺全部嘅系統入面都用到。根據日本財政部喺5月嘅調查發現，主要超市嘅自動售票機同收銀機，使用新鈔嘅完成度可達80%至90%，而對於投幣式停車場以及餐廳嘅食券機僅50%，飲品自動販賣機更只得20%至30%，所以去邊都未必100%支援新鈔，有機會都要帶定啲舊鈔以便不時之需。
延伸閱讀：【香港12大找換店推介、唱Yen最抵一定要去呢2間？ 】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
