韓國文創 | 趁住聖誕節，相信大家都買定機票，準備馬不停蹄去旅行喇！韓國首爾作為女仔行街掃貨嘅首選之地，除咗有多間藥妝店、服裝店，近年仲興起多個文創品牌，推出精緻可愛嘅文具飾品。今次小編為大家介紹9大弘大周邊選物店，睇吓有咩好物推介啦！
圖片來源：Instagram @insideobject、Instagram @butter_insta、Instagram @te.teum、Instagram @tuesday__off、Instagram @chanibear.station、Instagram @madeby.official、Instagram @zeroperzero、@muu_muu_official | 撰文：Icy
韓國選物店 | 1. Object
位於弘大地鐵站6號出口附近嘅Object旗艦店，樓高四層，係弘大嘅矚目地標之一。每一層都擺放唔同設計師嘅文創精品，例如有賓士貓HUGINN AND MUNINN、得意小動物gosimperson、短尾袋鼠Dinotaeng，售賣信紙、手機殼、布袋、馬克杯等精品，每一款都充滿少女心！
【INFO】 Object 地址：首爾特別市麻浦區臥牛山路35街13 營業時間：每日12:00-22:00
韓國選物店 | 2. Butter
位於弘大地鐵站1號出口附近嘅Butter雜貨店，店舖外觀色彩繽紛，非常可愛吸睛。店內販售各款生活用品、文具、飾品、毛公仔、旅遊用品等等，包羅萬有，並且劃分為各個區域，方便大家尋寶～室內仲設置多個得意打卡位，大家可以同朋友仔一邊行街，一邊影相留念！
【INFO】 Butter 地址：首爾特別市麻浦區楊花路153號 營業時間：每日11:00-22:00
韓國選物店 | 3. ARTBOX
講起韓國文創店，點可以唔提起ARTBOX？位於弘大地鐵站9號出口附近嘅ARTBOX，販售多種風格嘅生活小物，無論可愛、簡約、型格、趣怪類型都應有盡有，例如Sanrio可愛飾物、Care bear產品等等，滿足唔同喜好嘅朋友～店內仲會供應美妝及護膚用品，包裝精緻又實用，俘虜各位女仔嘅心～
【INFO】 ARTBOX 地址：首爾特別市麻浦區西橋洞364-26 營業時間：每日11:30-23:00
韓國選物店 | 4. TETEUM
位於弘大地鐵站3號出口附近嘅TETEUM，樓高兩層，店舖空間寬敞。TETEUM以帶住紅框眼鏡嘅得意小熊為主角，推出各式各樣嘅文具、電腦袋、餐具、明信片等精品。行到攰嘅話，仲可以去2樓嘅TETEUM cafe食件鬆餅，嘆杯咖啡，甜品賣相十分精緻，好味又igable！
【INFO】 TETEUM 地址：首爾特別市麻浦區東橋路36街15 1-2樓 營業時間：每日12:00-20:00
韓國選物店 | 5. Tuesday off
位於延南洞半地下室嘅Tuesday off，店舖小巧典雅，以法式奶油居家風為裝潢主題，售賣各款軟萌少女風精品。除咗有多款毛公仔吊飾，當中嘅餐具選物亦非常吸睛，例如有芝士造型刀叉、小鴨造型馬克杯、印有復古插畫嘅餐盤等等～
【INFO】 Tuesday off 地址：首爾特別市麻浦區延南洞390-24 營業時間：13:00-18:00（逢星期二休息）
韓國選物店 | 6. Chanibear Station
位於延南洞嘅Chanibear Station集文創商店及Cafe於一身，以自家設計嘅得意小熊為主題，推出各款雜貨小物、紀念品、甜品、飲品等等。雖然店舖唔算大，但室內設計可愛溫馨，每個角落都擺放Chanibear嘅裝飾品，同朋友行街行到攰，就可以喺度嘆個下午茶同埋打卡！
【INFO】 Chanibear Station 地址：首爾特別市麻浦區延南洞227-6 1-2樓 營業時間：13:00-20:30（逢星期一休息）
韓國選物店 | 7. made by
位於延南洞嘅made by店舖空間感十足，非常好逛，主打手帳類文創用品，例如貼紙、紙膠帶、memo紙、顏色筆等等。產品以各種動物、Q版公仔、植物為主題，畫風治癒可愛，而且價格比較便宜，好適合鐘意做手帳或自家設計明星小卡嘅朋友仔！
【INFO】 made by 地址：首爾麻浦區延禧路11 營業時間：每日12:00-22:00
韓國選物店 | 8. ZERO PER ZERO
ZERO PER ZERO集展覽、文具店及工作室於一身，主要售賣設計師自家設計以及從世界各地搜羅嘅文具好物，傳遞簡約知性嘅生活方式理念。產品風格以簡約線條及日常生活碎片為主題，例如淨色貼紙、世界地圖文件夾、護照封套等等，適用於旅行、辦公室或學習用途上，所以深受年輕人歡迎～
【INFO】 ZERO PER ZERO 地址：首爾特別市麻浦區喜雨亭路路16街32 營業時間：星期一至六 13:00-19:30、星期日13:00-16:00
韓國選物店 | 9. MU:U MU:U
MU:U MU:U係一間主打軟萌小物嘅文創用品店，與幾十位設計師合作過，設計風格相當多元化。大部份精品都係色彩繽紛，並印有可愛小動物圖案或者有趣嘅短篇漫畫，甚至有經典電影系列嘅產品，肯定會俘虜一班女生嘅心～
【INFO】 MU:U MU:U 地址：首爾特別市麻浦區城美山路 190-4 #102 營業時間：星期二至星期四、星期日 12:00-20:00 / 星期五、六 12:00-21:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
