平機票 | 隨住近年嚟疫情放緩，唔少香港人都可以報復式旅行啦，一年最少點都要去幾次旅行～買機票應該提早幾耐買先最平？咩時間先可以買到平機票？即刻睇睇4大旅遊貼士，教你用最平價錢買機票！
圖片來源：Freepik | 撰文：Hedy
唔少人都會趁有優惠嘅時候先買機票，不過如果想買平機票唔一定要等優惠，只要參考旅遊平台Expedia發布《2024年航空旅遊秘訣》嘅年度報告，根據數以十億計機票數據，所得出以下嘅結論，幫大家喺旅程中慳多啲。想買平機票就要記得留意以下最佳預訂日期同出發日期！
平機票攻略 | 1. 買機票越早買越平？
相信大家每次去旅行嘅時候都預早計劃，但機票係咪越早買就越平呢？每日都留意機票價錢，幾時先會係最佳時機？Expedia《2024年航空旅遊秘訣》就建議要避開出發前嘅2至5個月購買，因為呢段時間機票價格應該係最高。經濟艙旅客只要出發前8至28日預訂，一般都可以節省達21%旅費。不過平衡供應情況後，都係建議大家喺出發前5個半到6個月前預訂，一般都可以比起最貴預訂日期慳近13%，咁就唔怕到時臨急臨忙先去買機票～
平機票攻略 | 2. 呢個日子訂機票最抵！
唔知大家睇機票嘅時候，會睇完就即刻買，定再等多排比較下先呢？原來預訂機票都有最佳日子，無論咩客艙等級同行程，一個禮拜入面一定要喺星期日買機票，記得要避開最貴嘅星期五～同星期五預訂嘅旅客比較，喺星期日預訂嘅旅客平均可以慳14%旅費。不過大家絕對要避開星期日出發，價錢相對比較高。如果喺星期四出發對比星期日可以慳大概16%費用！所以大家只要喺星期日買機票，避開星期日以及旺季出發就自然最抵！
平機票攻略 | 3. 旅遊趨勢
Expedia同時公開最新香港嘅旅遊趨勢，大家都比較鍾意去台北、東京同大阪等地，成為香港旅客最熱門嘅航班目的地。依家短途航班亦已經恢復至2019年嘅54%，長途航班數目就恢復至44%。
平機票攻略 | 4. 善用機票比較網站
除咗以上旅遊貼士外，小編就建議大家買機票嘅時候，搜尋唔同航空公司作比較，網路上亦有唔少機票比較網站例如Skyscanner等。只要輸入自己嘅出發地、目的地以及日期，就可以畀你一次過睇清楚唔同航空公司或者旅行社嘅價錢。入面更可以設立價格通知，當機票低過你所設定嘅價錢，就會即刻通知你，咁就絕對可以有更多機會入手平價機票啦！
延伸閱讀：【一文睇清HK Express全新票價、寄艙行李需逐件收費+上限32KG！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
