史努比博物館 | 位於東京嘅史努比博物館終於都重新開幕啦！一行到門口就已經有巨大史努比開口迎接你，入面仲有新嘅打卡位同展覽。即刻睇睇重開後有邊6大亮點！
圖片來源：官方圖片 | 撰文：Hedy
東京史努比博物館係位於加利福尼亞州聖羅莎嘅Charles M. Schulz博物館全球唯一分館。今次經過大規模更新之後，終於喺2月開始重新開放，新增展覽以及唔同嘅展示品，簡直就係Snoopy粉絲朝聖必到嘅地方！
史努比博物館亮點1. 漫畫門票
平時有收藏開門票嘅粉絲們有福了！查爾斯舒茲自1950年，近50年來17,000多幅嘅漫畫作品，將會成為門票設計！大家可以收到由當日日期出版嘅漫畫，成為極具收藏紀念價值嘅門票，獨一無二之餘又可以紀錄當日美好嘅日子。
史努比博物館亮點2. 巨型史努比入口
當你嚟到史努比博物館嘅時候，巨型嘅史努比已經喺入口處乖乖咁等緊大家，相信喺入口位置就已經吸引到大家打卡影相！張開口嘅史努比更會帶領我哋進入《PEANUTS》嘅世界，走入驚喜之旅。
史努比博物館亮點3. 雲朵造型鏡子
行入博物館之後，大家更可以細心留意天花板上面嘅裝飾，會有以雲朵為造型嘅鏡，超適合同朋友或者另一半對住鏡打卡，夠晒可愛！鏡上面亦都有唔同Snoopy嘅角色，歡迎旅客嘅到來。
史努比博物館亮點4. 史努比奇妙屋
相信史努比粉絲一定已經入手咗大量公仔同產品，而喺史努比奇妙屋入面，依照「每個人的博物館，由每個人製作」嘅理念，呢個展覽都擺放由全世界粉絲所捐贈嘅商品，當中包括玩具、公仔、文具以及衫等等，簡直就係每位粉絲都想擁有嘅屋企！
史努比博物館亮點5. PEANUTS漫畫長廊
喺呢個歷史長廊入面匯集咗有關《花生漫畫》嘅劇集同埋當中嘅生活瑣事，展示咗相關嘅復古商品，原創複製品以及幻片燈。大家更可以觀賞牆上面獨特可愛嘅動畫。
史努比博物館亮點6. 史努比房間
滿滿嘅史努比都會喺度出現，當中一隻巨大嘅訓覺史努比超可愛！博物館翻新之後更新增「覺醒」表演，透露圖像、燈光以及音樂去增加表演，喺牆上嘅史努比更會逐漸變大！
【INFO】 SNOOPY MUSEUM TOKYO 票價：成人（預售票$94/當日票$104）/ 中學生（預售票$42/當日票$52）/ 4歲至小學生（預售票$21/當日票$31） 營業時間：平日：10:00至18:00（最後入場時間: 17:30) / 週末及假日：10:00至19:00（最後入場時間: 18:30) 地址：東京都町田市鶴間3-1-4 網上訂票：https://bit.ly/48Q1544
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
