韓國一人餐廳 | 相信大家久唔久都會去一次旅行，但有時候未必同家人朋友夾到假期，好多人都會選擇獨遊，一個人近近地飛返轉日本韓國都係幾唔錯嘅體驗！今次小編就為大家推介首爾6大一人餐廳，就算一個人去韓國旅行都可以嘆燒肉、醬油蟹，仲有多款抵食韓式定食，即睇以下介紹啦！
圖片來源：Instagram @hongojib_1、Youtube @KYUTV ep.10 往十里站鱷魚炒年糕、小紅書 @Qbbb、Instagram @boseunghall、Instagram @palsikdang_official、Naver Blog @쩡스 | 撰文：Icy
韓國一人餐廳 | 首爾6大一人餐廳 1. Hongojib
去韓國旅行緊係要食燒肉！如果驚一個人尷尬嘅話，就不妨試吓Hongojib，設有多個面壁單人座位，唔需要同其他人你眼望我眼～大家可於平板上睇餐牌，有圖片支援，唔使擔心睇唔明。
將肉燒至金黃色後，然後點上秘製醬汁以及蒜蓉，再配一啖白飯，簡直係一個人食飯嘅最高享受！Hongojib嘅一人燒肉套餐平均$100港幣都唔使，好抵食呀！
【INFO】 Hongojib 地址：1 Donggyo-ro 30-gil, Mapo-gu, Seoul, 南韓 營業時間：星期一至日 11:30-22:00
韓國一人餐廳 | 首爾6大一人餐廳 2. 鱷魚炒年糕
炒年糕係韓國最出名嘅街頭小食之一，而隱身係漢陽大學附近小巷嘅「鱷魚炒年糕」，係當地超有人氣嘅小食店，連Super Junior圭賢都曾經係自家節目中大力推介～
小店招牌油炸物拌年糕，將煙煙韌韌嘅年糕搭配炸魷魚圈、炸紫菜卷等香口美食，淋上豐富醬料，份量十足，口感又多層次～
【INFO】 鱷魚炒年糕 地址：33 Majo-ro, Haengdang-dong, Seongdong-gu, Seoul, 南韓 營業時間：星期一至日 10:30-00:00
韓國一人餐廳 | 首爾6大一人餐廳 3. 豚百壽
位於弘大嘅豚百壽主打豬肉湯飯，24小時營業，設有單人座位區，對單丁人士十分友好～大家可先於平板點餐，有中文對照好方便，然後自助拎前菜，例如泡菜、醃白蘿蔔等等。
豬肉湯飯價錢大約只需$50港幣，有滿滿嘅豬肉片，米飯索飽湯汁，香濃又醇厚，仲可以自行加蝦醬或鹽巴等調味料，但建議大家原汁原味咁品嚐～
【INFO】 豚百壽 地址：74 Hongik-ro 6-gil, Mapo-gu, Seoul, 南韓 營業時間：24小時
韓國一人餐廳 | 首爾6大一人餐廳 4. 保勝會館
另一間要介紹嘅保勝會館，同樣位於弘大以及24小時營業，特別劃分咗一人座位區。店家主打熱騰騰嘅湯飯，首先會奉上前菜，泡菜非常新鮮，香辣爽脆。店內嘅招牌豬骨解酒湯，價錢只需約$60港幣，豬骨湯經長時間熬煮後，味道鮮美濃郁，配上滿滿嘅豬脊骨肉，再灑上紫蘇子粉同大蔥花，令人食過返尋味！
【INFO】 保勝會館 地址：164-6 Donggyo-dong, Mapo-gu, Seoul, 南韓 營業時間：24小時
韓國一人餐廳 | 首爾6大一人餐廳 5. 朋友食堂
位於清潭嘅朋友食堂價錢十分平民，韓式午餐定食平均只需$60港幣，所以深受韓國上班族及學生黨歡迎，連韓國著名演員李鐘碩以及東方神起允浩都曾到訪品嚐！店內有多款韓國特色套餐，例如泡菜鍋、雜菜石頭鍋飯、烤五花腩肉、辣炒豬肉定食等等。前菜選擇亦非常多，充滿韓國家常味道。
【INFO】 朋友食堂 地址：7, Dosandaero90-gil, Gangnam-gu, Seoul, South Korea 營業時間：星期一至六 11:00-23:00
韓國一人餐廳 | 首爾6大一人餐廳 6. 弘益醬蟹
韓國另一必試美食就係醬油蟹，位於弘大嘅弘益醬蟹推出醬油蟹吃到飽套餐，就算係一個人去都歡迎嘗試。如果選擇醬油螃蟹、辣醬蟹、醬油蝦無限續添套餐，每人價錢大約為$160港幣。
套餐會附送蒸蛋、泡菜煎餅等小食，醬蟹肉使用秘製醬油醃製，十分入味。大家可以試試用蟹黃撈飯，充滿鮮味，令人欲罷不能～
【INFO】 弘益醬蟹 地址：59 World Cup buk-ro, Mapo-gu, Seoul, 南韓 營業時間：星期一至日 11:30-21:30
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
