日本賞楓 | 又就快到秋天飛日本賞楓嘅時候喇～最近日本氣象協會公布咗2025年第一波最佳賞楓時間，所以小編藉此精選10大超人氣日本賞楓景點，交通好方便，適合一家大細或閨蜜情侶一齊去打卡，快啲plan定行程啦！
圖片來源：日本氣象協會、weathernews.jp、X@Takao_Tozan、豐田市官方旅遊網站、X@mesoru0501、THE嵐山、舞鶴公園官網、福岡市官方旅遊指南、Instagram@ohoripark_fukuoka | 撰文：Icy
日本賞楓季節一般由10月中旬開始，紅葉期大致持續至12月上旬，視乎地區氣溫。今年日本氣象協會預測，10月氣溫較常年偏高，預料紅葉期亦會稍為延遲。關東地區最快要到10月底先開始轉紅，而關西及九州等地區將於11月中旬迎來最佳紅葉期。
日本賞楓景點 | 1. 六義園
位於東京都嘅六義園係一座歷史悠久嘅庭園，以壯觀嘅假山及大泉水景觀見稱，令人彷彿穿越時空到日本江戶時期。園內種植超過500棵楓樹及銀杏樹，每年11月下旬，園方都會舉辦「夜間特別觀賞」活動，點燈後嘅庭園洋溢浪漫氛圍，湖面更會倒映出朱紅與金黃交織嘅紅葉，格外迷人！
【INFO】 六義園 地址：東京都文京區本駒込6-16-3113-0021 開放時間：每日09:00-17:00 前往方法：乘搭東京地鐵南北線或JR山手線，於「駒込車站」落車，步行約10分鐘 夜楓點燈日期：2025年11月28日至12月9日 夜楓點燈時間：18:00-20:30 夜楓點燈入場費：1,000日圓 官方網站：https://bitly.cx/kGAFQ
日本賞楓景點 | 2. 小石川後樂園
位於東京都嘅小石川後樂園係一座充滿江戶風情嘅迴遊式庭園，亦係東京現存最古老嘅日式庭園之一。園內種植約500棵楓樹，每年11月下旬至12月上旬，整個庭園都會染上鮮紅嘅秋色，配上池塘、假山等傳統景致，散發濃厚嘅古典氛圍。
【INFO】 小石川後樂園 地址：東京都文京區後樂1-6-6 開放時間：每日09:00-17:00 入場費：成人300日圓、65歲以上長者150日圓、小學生以下免費 前往方法：乘搭東京地鐵丸之內線或南北線，於「後樂園站」中央口落車，步行約8分鐘 官方網站：https://bitly.cx/w2Ri
日本賞楓景點 | 3. 高尾山
高尾山距離東京都約50分鐘車程，交通十分方便。山腳設有纜車及吊車，無論係輕鬆行山定一日遊都非常適合。山上有紅葉台、藥王院等著名建築，沿途種植超過10,000棵楓樹，每年11月中旬至12月上旬，紅葉都會鋪滿整個山頭，天氣晴朗時仲可以喺山頂遠眺富士山美景！
【INFO】 高尾山 地址：東京都八王子市高尾町 開放時間：24小時開放 前往方法：從新宿站出發，乘搭京王特急到「高尾山口站」，全程約50分鐘 官方網站：https://bitly.cx/5UYVe
日本賞楓景點 | 4. 香嵐溪
位於愛知縣嘅香嵐溪，沿著巴川兩岸種植約4,000棵楓樹，每年11月中旬至下旬，整個山谷都會被紅葉染紅，猶如一條豔麗嘅紅葉隧道。當地更會舉辦「紅葉祭」，日落後嘅夜間點燈活動將整個溪谷點亮，營造出與白天截然不同嘅夢幻景致～
【INFO】 香嵐溪 地址：愛知縣豐田市足助町飯盛 開放時間：24小時開放 前往方法：從名古屋出發，乘搭地鐵名古屋本線到「東岡崎站」， 轉乘名鐵巴士至「香嵐溪站」，全程約2小時 官方網站：https://bitly.cx/7MSKg
日本賞楓景點 | 5. 德川園
位於名古屋嘅德川園係一座池泉迴遊式庭園，佔地約4.5公頃，融合江戶時代嘅建築風格同自然景觀。園內種植約300棵楓樹，每年11月中旬至下旬，德川園都會被紅葉點綴，期間仲會舉辦「錦帶纏繞德川園紅葉祭」，讓遊客喺燈光映照下感受濃厚嘅秋日氣氛。
【INFO】 德川園 地址：愛知縣名古屋市東區德川町1001 開放時間：每日09:30–17:00 前往方法：從名古屋出發，乘搭地鐵名城線到「大曽根站」3號出口，步行約15分鐘 官方網站：https://bitly.cx/gIbPx
日本賞楓景點 | 6. 箕面公園
箕面公園雖然位於大阪近郊，但從市區乘搭電車就可以輕鬆到達。公園佔地約83.8公頃，設有多條登山步道，沿途種滿楓樹。每年11月中旬至下旬，都會吸引大量遊客前來賞楓，配合箕面大瀑布等自然景觀，景色如詩如畫！記得唔好錯過當地特色小食，以可使用楓葉製作嘅炸楓葉，酥脆又爽口～
【INFO】 箕面公園 地址：大阪府箕面市箕面公園1-18 開放時間：24小時開放 前往方法：由大阪市區乘搭阪急電車，車程約30分鐘，於「箕面站」落車，再步行約5分鐘至公園入口 官方網站：https://bitly.cx/g2T6L
日本賞楓景點 | 7. 嵐山渡月橋
位於京都嘅嵐山渡月橋擁有千年歷史，木橋橫跨大堰川，氣勢十足。每年11月中旬至12月上旬，周邊山頭都會被楓葉染成一片火紅，吸引無數遊客慕名而來。而每年11月第二個星期日，當地更會舉辦一日限定嘅「嵐山紅葉祭」，屆時來自天龍寺、野宮神社等地嘅船隻，會於河上巡遊並進行傳統表演，別具賞楓風情！
【INFO】 嵐山渡月橋 地址：京都府京都市右京區嵯峨天龍寺造路町 開放時間：24小時開放 前往方法：由京都JR車站乘搭「嵯峨野線」到「嵯峨嵐山站」，步行約10分鐘/乘搭京福電車於「嵐山站」落車，步行約2分鐘 官方網站：https://bitly.cx/PGKSg
日本賞楓景點 | 8. 萬博紀念公園
位於大阪吹田市嘅萬博紀念公園，佔地面積達260公頃，係大阪著名嘅賞楓名所之一。每年11月中旬至12月上旬，園內楓葉轉紅，吸引唔少遊客前來賞楓。紅葉主要集中喺中世地區嘅茶室周邊，以及環繞園內最大水池「心字池」一帶，日式庭園與自然風光相互融合，營造出雅緻嘅秋日氛圍～
【INFO】 萬博紀念公園 地址：大阪府吹田市千里萬博公園 開放時間：每日09:30至17:00（逢星期三休息） 前往方法：從大阪單軌電車線「萬博記念公園站」出發，步行約5 分鐘 官方網站：https://bitly.cx/N1B2
日本賞楓景點 | 9. 舞鶴公園
舞鶴公園係福岡市內著名嘅賞楓勝地，保存住歷史悠久嘅城堡遺跡，別具古意。城堡設有觀景平台，讓遊客可以從高處俯瞰市區美景。每年11月中旬至12月上旬，楓葉逐漸轉紅，落葉將公園草地鋪成地毯，漫山遍野嘅景色非常迷人。
【INFO】 舞鶴公園 地址：福岡市中央区城内1-4 開放時間：每日09:00-18:00 前往方法：從「天神站」出發，往西步行約20分鐘 官方網站：https://bitly.cx/7nkF
日本賞楓景點 | 10. 大濠公園
同樣位於福岡市中心嘅大濠公園，佔地約39.8公頃，以寬廣湖泊同自然景緻聞名，整個公園圍繞湖岸而建。每年11月中旬至12月下旬，湖畔兩側嘅楓樹同銀杏陸續轉色，火紅與金黃交織，倒映喺湖面上。湖邊設有環湖步道，大家可以一邊漫步，一邊欣賞紅葉美景，享受寧靜時光。
【INFO】 大濠公園 地址：福岡縣福岡市中央區大濠公園1-2 開放時間：24小時開放 前往方法：乘搭福岡市地下鐵於「大濠公園站」落車，步行約5分鐘 官方網站：https://bitly.cx/o6iqJ
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
