深圳超市 | 近年唔少香港人鍾意北上玩樂，順便去超市採購高CP值嘅日用品及食品。深圳超市選擇多到數唔晒，無論大型連鎖超市、平價批發超市，定係高品質精品超市，都總有一間啱你心水。小編為大家精選咗8間深圳超市，地點超近地鐵站，仲可以免費註冊會員，盡享激抵優惠，即睇以下介紹啦！
圖片來源：小紅書@四葉草🍀、@快樂的藍天100、@小短手霸王龍、@小红薯61A6B1EF、@財神的寵兒🌸、@李培友、@Lincr、@wu鴨b來啦、@可可冰奶🎀、@浅蓝粉色大汁花🌸、@小loo要減肥 | 撰文：Icy
深圳超市推介 | 1. 盒馬鮮生
位於羅湖萬象食家嘅「盒馬鮮生」，鄰近羅湖口岸，方便掃貨後過關帶返香港。超市佔地達4萬平方尺，售賣逾4000種新鮮食材及外國進口商品。當中包括即撈即煮嘅海鮮區、中西合璧嘅熟食區、自家新鮮出爐嘅烘焙區、有多個人氣品牌嘅美食廣場等等。為提升貨品流轉速度，「盒馬鮮生」仲會定期推出減價優惠，無需成為會員亦可享受！
【INFO】 盒馬鮮生 地址：深圳羅湖區筍崗街道梅園路71號萬象食家B2層 營業時間：每日08:30–23:00 交通：深圳地鐵7號線「筍崗站」A出口
深圳超市推介 | 2. 盒馬奧萊
同樣位於羅湖嘅「盒馬奧萊」，雖然店舖面積比較細，但仍被譽為超市界嘅outlet，專門售賣即將到期嘅廉價商品，以及成本較低嘅自家品牌產品。而最吸引嘅係每晚8點之後，部份商品會推出「折上折」清貨優惠，價格平得相當震撼，不過結帳前記得免費註冊做會員，先至可以享有優惠價～
【INFO】 盒馬奧萊 地址：深圳羅湖區深南東路深業東嶺7A棟 營業時間：每日08:00-22:00 交通：深圳地鐵2號線「黃貝嶺站」A出口
深圳超市推介 | 3. 山姆超市
「山姆超市」屬於美國沃爾瑪旗下嘅會員制超市品牌，目前於深圳設有四間分店，其中前海旗艦店佔地超過32萬平方呎。「山姆超市」主打倉儲式大包裝商品，以批發價出售，非常適合需要大量採購家庭用品嘅顧客。商品類別包羅萬有，涵蓋熟食、新鮮肉類及海鮮、蔬果、冷藏食品等等，仲有各地進口嘅高品質食品～
【INFO】 山姆超市 地址：深圳南山區怡海大道5246號 營業時間：每日09:00–22:00 交通：深圳地鐵1號線「鯉魚門站」A出口
深圳超市推介 | 4. 永輝超市
位於國貿站嘅「永輝超市」於今年6月重新開業，裝潢及各個產品區域都非常整齊。雖然整體價格比「山姆超市」稍貴，但貨品種類繁多，無捆綁式銷售，顧客亦無需註冊會員。商品包括零食、酒水飲品、家居日用品、水果等等，店內仲有熟食試食區及美食廣場，售賣肉扒及海鮮等美食，而晚上8點後部份食品更會有八折優惠！
【INFO】 永輝超市 地址：深圳羅湖人民南路2028號金光華廣場B2層 營業時間：每日08:00–22:00 交通：深圳地鐵1號線「國貿站」A出口
深圳超市推介 | 5. 大潤發超市
位於龍華街道嘅「大潤發超市」佔地面積非常大，商品種類多元化，除咗有一般柴米油鹽及日用品外，更涵蓋至玩具、衣物、床上用品、五金電器、體育用具等等。另外「大潤發超市」設有會員制度，只要下載電話app就可以註冊，亦會不定期舉行$1商品特賣活動，吸引唔少顧客前來搶購～
【INFO】 大潤發超市 地址：深圳龍華街道和平路147號 營業時間：星期一至四08:30-22:00 / 星期五至日08:30-22:30 交通：深圳地鐵4號線「清湖站」D出口
深圳超市推介 | 6. 沃爾瑪
「沃爾瑪」係全球知名大型連鎖超市品牌，規模龐大，於深圳香梅北站附近設有樓高兩層嘅旗艦店，到處都係特登北上掃貨嘅香港人。「沃爾瑪」最大優勢就係貨品選擇夠多，促銷活動多，無需做會員都可以享有優惠。店內仲設有多個試食攤位，無論三文魚、牛奶、水果、餅乾等等都可以試啱先買～
【INFO】 沃爾瑪 地址：深圳福田區香梅北路2001號 營業時間：每日08:00-22:30 交通：深圳地鐵2號線「香梅北站」D出口
深圳超市推介 | 7. 天虹超市
「天虹超市」係深圳比較老牌嘅連鎖超市，雖然未及「山姆超市」或「沃爾瑪」般大型，但勝在夠貼地親民，貨品種類齊全，價格亦非常划算，適合日常生活所需。平日都吸引唔少香港人專程北上掃貨，購買即食麵、零食、來自唔同產地嘅新鮮蔬果、肉類、烘焙產品等等。
【INFO】 天虹超市 地址：深圳福田區中航路中航城君尚購物中心E區2層 營業時間：每日08:30-22:00 交通：深圳地鐵1號線「華強北站」C出口
深圳超市推介 | 8. OLE精品超市
「OLE精品超市」定位為高端超市品牌，雖然整體價格比其他超市稍貴，但正所謂一分錢一分貨，產品質素有保證，吸引唔少追求品質嘅高消費顧客。貨品主打精緻生活風格，包括歐洲進口紅酒、空運海鮮、有機蔬果、精緻烘焙食品等等，不論係自用、送禮或招待客人都非常體面～
【INFO】 OLE精品超市 地址：深圳南山區文心五路33號海岸城購物中心西區負1樓 營業時間：每日10:00-22:00 交通：深圳地鐵11號線「後海站」D1出口
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
