深圳主題樂園 | 深圳有多個戶外主題樂園，提供多項大小皆宜、刺激又新奇嘅遊樂設施及機動遊戲，大部份只需一票就可以玩足全日～所以今次小編又為大家帶嚟北上玩樂攻略，推薦7個必去嘅深圳戶外主題樂園，即睇以下介紹啦！
圖片來源：小紅書 @蜡笔小兮、@洛一妈妈是超人、@雨侠户外、@是心妈呀！、@爱吃红薯（游玩版）、深圳歡樂谷官方網站、紅樹林生態自然公園官網 | 撰文：Icy
深圳戶外主題樂園 | 1. 龍崗兒童公園
位於深圳市龍崗區嘅「龍崗兒童公園」，佔地面積逾32萬米，仲要係免費入場！樂園以奇幻森林為主題，設計出30多款遊樂設施及機動遊戲，讓小朋友於大自然環境中玩樂。大家可以免費玩盡園內10大無動力設施，例如密語魔卷、神樹夢網、巨鳥坡、魔力水圈、精靈森林、種子倉庫等等。而收費動力設施亦多達20項，除咗有啱小朋友玩嘅旋轉木馬、碰碰車、小火車，仲有刺激驚險嘅跳樓機、海盜船、過山車、沉船歷險、穿越雨林等等，等你同一大班朋友一齊挑戰膽量！
【INFO】 龍崗兒童公園 地址：深圳市龍崗區鹽龍大道與愛心路交匯處北側（愉園站C出口或回龍埔站D出口，步行約15分鐘） 營業時間：每日09:00-22:00 票價：免費入場，動力設施需另外收費 預約方法：於微信搜尋「龍崗兒童公園」微信公眾號，可提前24小時預約入園
深圳戶外主題樂園 | 2. 彩虹星球親子樂園
於2023年12月開幕、位於寶安區嘅「彩虹星球親子樂園」，佔地約16萬平方呎，裝潢色彩繽紛好吸睛，只需一票就可以玩盡園內逾30個無動力設施！玩樂設施包括超長彩虹滑道、粉紅色沙池、低空滑索、多人搖搖板、海盜船、鞦韆樹、火箭搖馬、跑步滾筒等等。當中「坑爹過山車」講求親子互動，由爸爸媽媽出力踩，小朋友就負責玩，從中增進親子感情～園內亦設有小食部，方便大家玩到肚餓就可以即刻醫肚！
【INFO】 彩虹星球親子樂園 地址：深圳市寶安區新橋街道星南路（馬安山站A出口轉乘的士/馬安山站D出口，步行約20分鐘） 營業時間：星期一至四 10:00-21:00 / 星期五至日 09:00-22:00 票價：每人￥65 預約方法：無需預約入園
深圳戶外主題樂園 | 3. 艾尼摩神奇樂園
上年開業嘅「艾尼摩神奇樂園」，佔地約10萬呎，以太空冒險樂園為主題，園內有20多項戶外無動力設施，包括彩虹滑道、地蹦床、天空步道、飛天城堡、森林魔網、鞦韆島、蹺蹺板等，深受小朋友歡迎。當中「飛天城堡」有6層高，包含多條長滑梯，滑梯嘅速度亦頗快，刺激感十足！現場會有職員協助小朋友上落滑梯，唔使擔心安全問題～
【INFO】 艾尼摩神奇樂園 地址：深圳市觀瀾山水田園旅遊文化園區內東側（禾花站A出口，於任屋村公交站乘搭M359/ B878，於君子布村口站落車） 營業時間：每日 10:00-18:00 票價：成人 ￥49.90 / 親子￥79.90 預約方法：無需預約入園
深圳戶外主題樂園 | 4. 深圳歡樂谷
位於南山區華僑城嘅「深圳歡樂谷」，係深圳市內極具代表性，並且係最大嘅主題樂園，佔地面積達35萬平方米！園內分為多個主題區域，包括西班牙廣場、魔幻城堡、迷你世界冒險山、西部礦鎮、香格里拉、颶風灣、陽光海岸、歡樂時光、以及瑪雅海灘水樂園。刺激嘅高空機動遊戲主要集中喺「歡樂時空」園區，例如有高空大擺錘、跳樓機、風火輪等等，等你挑戰膽量！而「魔幻城堡」及「迷你世界冒險山」有20多項合家歡嘅經典遊樂設施，例如雙層旋轉木馬、迷你賽車、蹦蹦傘、轉轉杯等等，啱晒帶小朋友去放電～
【INFO】 深圳歡樂谷 地址：深圳市南山區華僑城（於會展中心站轉乘1號線到世界之窗站，於A 出口步行9分鐘即到達） 營業時間：每日 10:00-19:00 票價：成人 ￥240 / 青少年及學生￥180 / 兒童及長者 ￥130 預約方法：深圳歡樂谷官方網站
深圳戶外主題樂園 | 5. 翠湖文體公園
位於羅湖區嘅「翠湖文體公園」，佔地約25萬平方米，係深圳市首個零碳文體公園。園內種滿綠意盎然嘅植物，內有寵物友好嘅超大草坪，提供舒適嘅大自然休憩環境，遠離城市喧囂。園內亦有多項兒童玩樂設施，例如河狸主題兒童遊樂場、小木橋、三層樓嘅旋轉滑梯及空中滑索、搖搖馬蹦牀、超長嘅流水渠道、沙池等等，小朋友一定會玩得盡興！
【INFO】 翠湖文體公園 地址：深圳市羅湖區沙灣路與太白路交叉口（於5號線布心站D出口出發，步行約10分鐘） 營業時間：24小時 票價：免費入場 預約方法：無需預約入園
深圳戶外主題樂園 | 6. 深圳青青世界
位於南山區嘅「深圳青青世界」，佔地面積約20萬平方米，以自然生態及熱帶雨林為主題，種滿綠色植物，當中特色園區包括侏羅紀公園、蝴蝶農場、瓜果園、陶藝館、花卉超市等。小朋友可以欣賞唔同種類嘅蝴蝶、參與製作陶藝、耕種瓜果蔬菜、釣魚撈鰍等活動，讓小朋友於大自然環境中玩樂，並從中學習環保及愛護地球，富有教育意義！
【INFO】 深圳青青世界 地址：深圳市南山區月亮灣青青路1號（南山站B1出口轉乘公交369，於南頭青青世界總站下車） 營業時間：平日 08:30-17:30 / 週末及假期 08:30-18:00 票價：成人￥76 / 兒童及長者 ￥40（需一天前預訂） 預約方法：https://bitly.cx/658v9z
深圳戶外主題樂園 | 7. 紅樹林生態自然公園
位於福田嘅「紅樹林生態自然公園」，集生態、休閒、遊憩、科普教育於一身，毗鄰福田紅樹林自然保護區，讓小朋友遠離繁囂，親親大自然，於綠蔭下賞魚觀鳥。園內仲會有一個戶外教室「自然力樂園」，設有平衡木、攀爬架等玩樂設施，以樹木搭建而成，並且利用再生物料製作擺設，讓小朋友從玩樂中了解大自然環境及生態～
【INFO】 紅樹林生態自然公園 地址：深圳市福田區福榮路和新洲路交匯處（東鐵綫羅湖站出發，於深圳地鐵羅湖站乘搭1號綫，於老街站轉乘3號綫前往） 營業時間：每日 06:00-23:00 票價：免費入場 預約方法：無需預約
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
